Гувернерката Анита Ангеловска-Бежоска учествуваше на меѓународната конференција „Повторно поврзување на глобалната економија“, на која најпрво се обрати заменик извршната директорка на Меѓународниот монетарен фонд, Гита Гопинат, свое обраќање имаше и извршната директорка на Банката за меѓународни порамнувања, Андреа Махлер, а учествуваа гувернери од повеќе земји во светот.

„Геоекономската фрагментација претставува ризик за глобалната економија. Иако сè уште не се согледуваат негативни ефекти врз регионот на Западен Балкан, нема сомнение дека геополитичките ризици се на историски високо ниво и можат да доведат до намалување на трговијата и финансиските приливи. Земјите од Западен Балкан, како мали и отворени економии, можат да ги ублажат ефектите од неповолните геополитички состојби на повеќе начини. Во услови кога меѓународните корпорации ја преоценуваат географската локација на своите производствени капацитетите, обидувајќи се да ги намалат оперативните ризици во работењето, регионот на Западен Балкан може да биде привлечен за преместување на европските бизниси. Преселувањето на странските производствени капацитети од ЕУ во нашиот регион ќе донесе повисоки странски директни инвестиции, поголема трговска размена, како и пренесување искуства, знаења и напредни технологии. Предностите на земјите од регионот се нивната географска близина до ЕУ, кандидатскиот статус на дел од земјите, пониските трошоци по единица производ и високо квалификуваната работна сила. Сепак, за да се искористат овие можности, треба да се направат структурни реформи, со цел земјите од регионот да станат попривлечни за странските инвеститори“, ова беше истакнато од гувернерката Ангеловска-Бежоска во рамките на 15. годишна конференција организирана од Комитетот за преобразување на Бретон Вудс и Централната банка на Перу,  што се одржа во Куско.

Преселувањето на производствените капацитети, дури и во мал обем, може да има значително влијание врз економскиот раст, којшто според студијата од Меѓународниот монетарен фонд (ММФ) за земјите од Западен Балкан би се зголемил меѓу 3% и 10% од БДП. „Интеграцијата на земјите од Западен Балкан во глобалната економија во изминатите две децении е значително зголемена. Трговската размена бележи раст од 25 п.п. од БДП, додека финансиската интеграција бележи раст од 70 п.п. од БДП, а ова претставуваше главната движечка сила на доходната конвергенција на регионот“, посочи гувернерката Ангеловска-Бежоска којашто истакна дека е од исклучително значење да се продолжи со интеграцијата, зашто за малите економии таа е предуслов за повисок раст на доходот.

Гувернерката Ангеловска-Бежоска учествуваше на панел-дискусијата „Економската фрагментација, регионалните блокови и нивното влијание врз глобалната финансиска архитектура“, заедно со Фелипе Лараин, професор по економија на Католичкиот универзитет во Чиле, Дејвид Пасарели, директор на Универзитетскиот центар за истражување на политиките на Обединетите нации, Елина Рибакова од Американскиот институт за меѓународна економија Петерсон, а претседавач на панел-дискусијата беше Хозе Урибе, претседател на Резервниот фонд на Латинска Америка.