Швајцарскиот град Цуг бележи зголемен интерес од милијардери, инвеститори и мултинационални компании, особено по зголемената геополитичка неизвесност на Блискиот Исток, која го намали статусот на Дубаи како сигурна дестинација за капитал.

Иако има само околу 130.000 жители, Цуг е најбогатиот кантон во Швајцарија. Во него се регистрирани повеќе од 40.000 компании, а секој осми жител е милионер. Благодарение на поволниот даночен систем, политичката стабилност и предвидливата деловна средина, кантонот со децении привлекува глобални компании и инвеститори.

Покрај тоа што е седиште на големи меѓународни компании, Цуг е познат и како „Крипто Долина“, еден од водечките европски центри за блокчејн и крипто-индустријата. Посебно атрактивен е швајцарскиот модел на оданочување, кој во одредени кантони овозможува даночните обврски да се пресметуваат според животните трошоци, наместо според вкупниот приход или богатство.

Сепак, силниот прилив на капитал има и своја цена. Побарувачката за недвижности значително ги зголеми цените на становите и куќите, кои денес се меѓу највисоките во Европа, а сè повеќе локални жители се соочуваат со високи трошоци за домување.

И покрај тоа, финансиската состојба на кантонот останува исклучително стабилна. Буџетскиот суфицит овозможува пониски трошоци за јавни услуги и здравствено осигурување, што дополнително ја зголемува атрактивноста на Цуг.

Во услови на геополитички ризици, повисоки даноци во дел од европските земји и глобална економска неизвесност, Цуг продолжува да ја зацврстува својата позиција како една од најпосакуваните светски дестинации за инвеститори и мобилен капитал.

Годишната инфлација во Романија забави на 10,42% во јуни, во однос на 10,85% во мај, покажуваат најновите податоци на романскиот Национален институт за статистика (INS).

Најсилен раст и натаму бележат цените на услугите, кои на годишно ниво се зголемиле за 13,67%, додека цените на непрехранбените производи пораснале за 12,29%, а храната поскапела за 5,75%.

На месечно ниво, индексот на потрошувачките цени во јуни пораснал за 0,06% во споредба со мај. Притоа, цените на храната се намалиле за 0,44%, додека услугите и непрехранбените производи забележале раст од 0,49%, односно 0,19%.

Аналитичарите на „Erste Group“ оценуваат дека мај најверојатно го означил врвот на инфлацијата за 2026 година и очекуваат поизразено забавување во наредните месеци, поттикнато од поволни базни ефекти. Нивната прогноза е дека инфлацијата до крајот на годината ќе се намали на 5,9%, доколку не дојде до нови надворешни шокови, особено поврзани со глобалните цени на енергенсите.

Во меѓувреме, Централната банка на Романија ја задржа референтната каматна стапка на 6,5%, без промена, продолжувајќи внимателно да ги следи инфлациските движења и економските ризици.

Како изгледа иднината на дигиталните плаќања кога идеите ги создаваат младите генерации?

Одговорот го дадоа студентите кои беа дел од првиот IutePay студентски иновациси предизвик– иницијатива на Иуте Македонија која ги поврза академската заедница и индустријата, отворајќи простор младите да креираат решенија за реални бизнис предизвици.

Во изминативе недели, студентски тимови од повеќе високо-образовни институции низ земјава работеа на развој на иновативни концепти за лансирање на IutePay – новиот дигитален паричник на Иуте. Нивните идеи беа резултат на истражување, тимска работа, креативно размислување и желба да понудат решенија што ќе одговорат на потребите на новата генерација корисници.

По првичната презентација на решенијата, беа избрани 10 храбри тимови и решенија кои излегоа надвор од комфор зоната, со што започна и јавниот дел од предизвикот. Специјално креираната платформа за онлајн гласање овозможи јавноста да ги поддржи своите фаворити, а за време на гласањето беше посетена повеќе од 50.000 пати, генерирајќи илјадници интеракции.

И конечно…победниците:

🥇 ГенВоЗен – Факултет за електротехника и информациски технологии (ФЕИТ), УКИМ-Скопје
🥈 УМО – Brainster Next College
🥉 TripleFun – Економски факултет, УКИМ-Скопје

“Вечерва не наградивме само три тима. Прославивме генерација млади луѓе кои имаат храброст да создаваат, да иновираат и да ја обликуваат иднината. Целта на иницијативата беше многу повеќе од избор на победничка идеја. Таа беше создадена за да им дадеме простор на младите да размислуваат поинаку, да  предизвикаат статус кво и да покажат дека иднината се создава со храброст, знаење и визија“, истакнаа од Иуте.

На завршниот настан, покрај официјалното прогласување на победниците, трите најдобри тимови ги претставија своите идеи пред присутните гости, претставници од академската заедница, партнери и медиуми.

Вистинскиот успех на овој предизвик е  создавањето на простор каде идеите добија сцена, додека соработката помеѓу академијата и индустријата доби нова димензија.

Иуте континуирано инвестира во дигитализација, иновации и создавање на нови искуства за корисниците.

Но, исто толку важна е и инвестицијата во луѓето кои ќе ја креираат иднината.

Затоа, IutePay студентскиот иновациски предизвик е само почеток на приказна која има за цел да инспирира нови генерации млади иноватори.

Иуте упатува голема благодарност до сите тимови, соработници, партнери и членови на академската заедница кои беа дел од оваа приказна изминативе месеци.

“Вашите идеи, енергија, ентузијазам и храброст се причината поради која веруваме дека најдоброто допрва доаѓа”, посочија од тимот на Иуте.