На годишниот состанок на регионалниот проект за техничка помош во областа на финансиската едукација, поддржан од ОЕЦД и Министерството за финансии на Холандија, што се одржува во Сараево во организација на Централната банка на Босна и Херцеговина, гувернерот на Народната банка, д-р Трајко Славески, истакна дека во услови на зголемени економски ризици и брза дигитализација, финансиската едукација и дигиталната писменост се неопходни за користење на предностите од финансиските услуги и за обезбедување сеопфатен раст. 

„Во време кога инфлацијата расте и кога има зголемени каматни стапки и широка достапност на дигиталните финансиски услуги, се јавува нужна потреба од јакнење на финансиската и дигиталната писменост. Дигитализацијата носи нови можности, како поефикасни и поевтини финансиски услуги, но истовремено создава и нови ризици – од онлајн измами, прекумерно задолжување, до загрозување на личните податоци“, порача гувернерот.

Тој зборуваше на панел-дискусијата на тема „Унапредување на финансиската едукација за посилен раст“, на која учествуваа гувенерите на централните банки на Босна и Херцеговина и Молдавија, заменик-гувернерката на Грузија и вицегувернерот на Хрватска. Разговорот беше насочен кон улогата на финансиската едукација во зајакнувањето на економскиот раст, како и во справувањето со новите ризици предизвикани од дигитализацијата на финансиските услуги.

Гувернерот Славески нагласи дека посебно внимание треба да им се посвети на младите и на потрошувачите со ограничено финансиско искуство. „Зголемувањето на финансиската и дигиталната писменост е од огромна важност за граѓаните и за претприемачите за да можат да ги препознаат придобивките, но и ризиците од новите дигитални финансиски производи и услуги. Само така можеме да ја искористиме дигитализацијата како алатка за поголема вклученост и стабилен економски раст“, додаде тој.

Во рамките на зголемувањето на вклученоста, Народната банка ги спроведува и активностите на иницијативата „Кодекс за финансирање на жените претприемачи“ (WeFi Code), како национален координатор, заради намалување на родовиот јаз во пристапот до финансии и поддршка на женското претприемаштво. Во оваа иницијатива, покрај Народната банка, се вклучени 18 институции од јавниот, приватниот и граѓанскиот сектор, меѓу кои шест банки и две штедилници.

Народната банка со своето учество ја потврди својата заложба за унапредување на финансиската едукација, дигиталната писменост и вклученоста, во услови на брзи економски и технолошки промени.

Српската Алта Банка, која ја купува Стопанска банка Битола, најави изградба на своето ново седиште во Белград – кулата „Alta Tower“. Проектот ќе комбинира деловен, станбен, трговски и угостителски простор, како и нов јавен плоштад, со цел да создаде современ центар за бизнис и заедница.

Кулата ќе има 35 ката и вкупна површина од 79.470 квадратни метри. Дизајнот е дело на британската архитектонска фирма „Заха Хадид“ (ZHA) во соработка со белградското биро „Биро Кјуб Партнерс“ (BCP). Според авторите, архитектурата ја отсликува основната мисија на банката – стабилност, безбедност и отпорност – додека обезбедува современа работна средина и поттикнува соработка и иновации.

View this post on Instagram

A post shared by Zaha Hadid Architects (@zahahadidarchitects)

Изградбата на кулата на местото на сегашното седиште на Алта Банка е симбол на динамичниот раст на институцијата, која во 2023 година забележа 22 пати поголем раст во споредба со претходната година. Од ова лето, банката ја прошири услугата на сметки за електрична енергија и отвори шалтери во полициски станици низ цела Србија.

Сопственикот на банката, Давор Мацура, кој започна со менувачници и денес управува со повеќе компании, претходно инвестираше во големи недвижнини, вклучително и земјиштето на поранешниот IMT во Нов Белград, каде планира изградба на станбено-деловен комплекс „Зелена линија“.

Проектот „Alta Tower“ ја потврдува амбицијата на Алта Банка да го зацврсти своето присуство на српскиот пазар и да постави нови стандарди во комбинираната деловна и станбена инфраструктура.

Европската централна банка (ЕЦБ) влегува во двегодишен период на значајни промени на врвот, при што две третини од членовите на Извршниот одбор ќе бидат заменети, вклучувајќи ја и претседателката Кристин Лагард. Процесот се очекува да започне на состанокот на министрите за финансии на еврозоната во Луксембург, каде ќе се отворат првите дискусии за наследниците на сегашните лидери на институцијата.

Најважната позиција за наследник на потпретседателот Луис де Гиндос ја привлекува вниманието на европските финансиски пазари. Меѓу споменуваните кандидати се гувернерот на Банката на Финска, Оли Рен, како и економистите Клара Рапосо од Португалија и Кристина Папаконстантину од Грција. Во игра се и директорката на Европската инвестициска банка, Надја Калвино, и гувернерот на Хрватската национална банка, Борис Вујчиќ.

Покрај тоа, ЕЦБ наскоро ќе има нов главен економист, што се очекува да биде од стратешко значење за Франција. Кандидатите на оваа позиција вклучуваат поранешната главна економистка на ОЕЦД, Лоренс Бун, професорката по економија Хелен Реј, заменик-гувернерката на Банката на Франција Агнес Бенаси-Сер, како и главната економистка на ММФ, Пјер-Оливие Гуринча.

Според шпекулациите, Холанѓанецот Клас Нот и Шпанецот Пабло Ернандез де Кос се потенцијални наследници на претседателката Лагард. Германија, која досега не го имала претседателството на ЕЦБ, разгледува кандидати како Јоаким Нагел и Изабел Шнабел, но земјата се соочува со предизвик поради веќе високото присуство во други европски институции, вклучително и претседателството на Европската комисија и Надзорниот одбор на ЕЦБ.

Новите лидери на ЕЦБ ќе имаат стратешка улога во одлучувањето за каматните стапки, проширувањето на еврозоната, справувањето со глобалната економска фрагментација и воведувањето на дигиталното евро, што е клучен чекор за зајакнување на економската безбедност и меѓународната позиција на заедничката валута.