Министерството за финансии одбележува една година од приклучувањето на Македонија кон Единствената област за плаќања во евра (СЕПА), реформа со која се овозможија побрзи, поедноставни и поефикасни плаќања во евра за граѓаните и компаниите.

Од Министерството посочуваат дека со приклучувањето кон СЕПА е направен значаен чекор во усогласувањето на домашниот платен систем со европските стандарди, со што се создадени услови за поефикасно извршување на плаќањата во евра.

„Пред една година направивме важен чекор кон европските стандарди во плаќањата. Денес, граѓаните и компаниите имаат побрзи, поедноставни и поефикасни плаќања во евра“, се наведува во објавата на Министерството за финансии.

Од институцијата нагласуваат дека станува збор за важна реформа, со која се овозможила практична имплементација на СЕПА од страна на Народната банка и деловните банки.

Приклучувањето кон СЕПА претставува значаен чекор во интеграцијата на македонскиот финансиски систем во европскиот платен простор. Со тоа се создаваат можности за поедноставни прекугранични трансакции во евра, што е особено важно за компаниите кои соработуваат со странски партнери, но и за граѓаните кои вршат или примаат плаќања од странство.

Од Министерството истакнуваат дека СЕПА е конкретен пример за тоа како реформите можат да донесат директни придобивки за граѓаните и деловниот сектор.

„СЕПА е пример дека реформите не се само промени во законите – туку конкретни придобивки за граѓаните и бизнисот“, порачуваат од Министерството за финансии.

Оттаму најавуваат дека ќе продолжат со спроведување на реформите насочени кон модернизација на финансискиот систем и негово понатамошно усогласување со европските стандарди.

Flex Group продолжува со вториот дел од својата осуммесечна програма ставајќи фокус врз развојот на лидерските и менаџерските капацитети преку градење на емоционална писменост и примена на менторски стилови. 

Во рамките на овој модул, Верита Акташ, ја одржа обуката „Емоционална интелигенција и тренинг вештини за ментори“, на која учесниците работеа на теми што се дел од секојдневието на секој менаџер и тоа: како личните емоции влијаат врз начинот на кој комуницираме и носиме одлуки, како се препознава она што се случува во тимот и како се води разговор со цел развој на вработениот.

Еден од главните фокуси беше емоционалната писменост. Притоа учесниците истражуваа како тие влијаат врз односите, врз реакциите при работа под притисок, врз комуникацијата и на крајот, врз начинот на кој се водат луѓето, наместо досегашното сфаќање дека емоциите треба да останат надвор од работното место.

Вториот дел беше посветен на менторството како пристап во развојот на луѓето. Преку активно слушање, поставување на отворени прашања и ненаметливо насочување на вработениот кон самостојно наоѓање на решение и нови идеи, лидерите се стекнаа со нова алатка за развивање на потенцијалите на својот тим. Преку GROW моделот, учесниците вежбаа како разговорот 1 на 1 со член на својот тим може да се помести од: „Еве што треба да направиш“ кон: „Како ти самиот да дојдеш до нови идеи, предлози и пристапи кон секојдневното работење?“.

Токму тоа е и идејата на Flex Group Leadership Academy – лидерството да се развива континуирано, преку знаења и вештини применливи во секојдневната работа затоа што доброто водење, не значи секогаш да го имаш одговорот, туку да знаеш да слушаш и да го поставиш вистинското прашање.

Клириншката куќа Клириншки интербанкарски системи АД Скопје (КИБС) го одбележа својот 25-годишен јубилеј на свечен настан со претставници на банките, државните институции и партнерите. Во изминатиот четврт век, КИБС прерасна од заедничка визија на банките за ефикасен платен промет во носител на дигиталната трансформација и сигурен столб на финансиска инфраструктура ‒ инфраструктура што е доверлива, безбедна, современа и подготвена за она што доаѓа.

Секое плаќање, примање средства, електронско потпишување или идентификување зависи од системи што работат тивко, во позадина. Токму таа невидлива инфраструктура веќе 25 години ја гради КИБС. Ги поврзува банките и институциите, ги пренесува информациите и ги потврдува идентитетите – сигурно, точно и навреме.

„Во далечната 2001 година, Македонија направи голем чекор кон создавање современ и европски финансиски систем. Како дел од таа трансформација беше создаден КИБС – со јасна задача да изгради инфраструктура што ќе овозможи побрз, посигурен и поефикасен проток на плаќањата“, изјави Горан Анастасовски, претседател на Управниот одбор и генерален директор на КИБС.

Од платниот промет, КИБС наскоро се прошири и во областа на дигиталната доверба. Уште во 2003 година го воведе електронскиот потпис, а потоа следуваа електронски печат, временски жиг и платформа за електронско потпишување. Во 2020 година стана квалификуван давател на доверливи услуги, усогласен со македонската и европската регулатива eIDAS. Во 2021 година, заедно со Nextsense ја создаде OneID – првата национална шема за електронска идентификација.

Следниот голем чекор се инстант плаќањата. Во 2025 година, КИБС стана лиценциран оператор на инстант плаќања и ја заокружи инфраструктурата КИБС Инстант, која ќе овозможи плаќањата да се извршуваат моментално, 24 часа дневно, 7 дена во неделата. Многу наскоро, преку банките, платежните институции и решението СТРЕЛА овие придобивки ќе станат дел од секојдневието на граѓаните, компаниите и институциите.

Сепак, за овој развој не се најважни системите, туку луѓето. „Зад сите овие бројки, лиценци, системи и технологии стојат луѓето – во КИБС, во нашите банки и партнери и во институциите со кои споделуваме заедничка цел: да создадеме современа, сигурна и конкурентна дигитална економија“, истакна Горан Анастасовски. Во знак на благодарност за долгогодишната соработка, КИБС им додели признанија на своите долгогодишни партнери од банкарскиот сектор, државните институции и од ИТ-секторот.

„Затоа, не славиме само 25 години постоење. Славиме 25 години доверба, партнерство, иновации и заеднички успех“, додаде тој.

Технологиите ќе продолжат да се менуваат, плаќањата ќе бидат сè побрзи, а идентитетот сè подигитален. Но, она што веќе 25 години го гради КИБС останува исто: довербата, како главна водилка за следниот четврт век.

За КИБС

Клириншка куќа Клириншки интербанкарски системи АД Скопје (КИБС) е основана во 2001 година и обезбедува инфраструктура за мали меѓубанкарски плаќања, инстант плаќања, други услуги поврзани со плаќања, шеми за електронска идентификација, квалификувани доверливи услуги, како и други ИКТ-услуги.