Цените на златото пораснаа во текот на утринското тргување на азиските пазари, поттикнати од слабеењето на американскиот долар и намалувањето на цените на нафтата, што ги охрабри инвеститорите да ги пренасочат средствата кон сигурни засолништа.

Спот цената на златото порасна за 0,4 отсто и достигна 4.450,16 долари за унца, додека фјучерсите на златото за испорака во август забележаа раст од 0,2 отсто и се искачија на 4.477 долари за унца.

Во исто време, цените на нафтата се намалија по силниот раст забележан во претходната сесија. Нафтата Брент поевтини за 67 центи или 0,69 отсто и се тргуваше по 97,14 долари за барел, додека американската сурова нафта WTI падна за 62 центи или 0,65 отсто, на 95,40 долари за барел.

Позитивниот тренд се прошири и на останатите благородни метали. Среброто поскапе за 0,8 отсто на 73,26 долари за унца, платината забележа раст од 0,2 отсто и достигна 1.863,25 долари, а паладиумот порасна за 0,5 отсто на 1.307,67 долари за унца.

Аналитичарите оценуваат дека утринскиот пад на цените на нафтата е резултат на профитирање од претходниот силен раст, како и на привременото смирување на тензиите во регионот на Персискиот Залив, што овозможило техничка корекција на пазарот.

Златото и натаму останува една од најатрактивните инвестиции во услови на неизвесност на финансиските пазари, инфлаторни притисоци и очекувања поврзани со идните потези на американската централна банка.

Економијата на Северна Македонија забележа реален раст од 3,1 отсто на годишно ниво во првиот квартал од 2026 година, што претставува забавување во однос на растот од 3,8 отсто регистриран во последниот квартал од 2025 година, покажуваат податоците на Државниот завод за статистика.

Бруто домашниот производ (БДП) во периодот јануари–март достигнал 240,6 милијарди денари по тековни цени.

Извозот на стоки и услуги е зголемен за 6,2 отсто во споредба со истиот период лани, додека увозот пораснал за 5,2 отсто.

Финалната потрошувачка бележи раст од 3,2 отсто на годишно ниво и учествува со 86,4 отсто во структурата на БДП.

Според официјалните податоци, македонската економија во 2025 година остварила реален раст од 3,5 отсто, по растот од 3 отсто во 2024 година. И покрај забавувањето на почетокот на годинава, економската активност останува во позитивна зона, поттикната од растот на трговијата и потрошувачката.

На светот му е потребен нов економски блок составен од Европската Унија и нејзини истомисленици во Азија за да се зачува глобалната трговија заснована на правила и да се ублажат последиците од политиките на американскиот претседател Доналд Трамп, се наведува во нов извештај на британскиот истражувачки центар Четам хаус.

Автор на анализата е Крион Батлер, поранешен директор за меѓународни економски прашања во Секретаријатот за национална безбедност на Владата на Обединетото Кралство и учесник на самитите на Г7 и Г20.

Во извештајот се предлага формирање на таканаречен „трет економски пол“, кој во почетната фаза би го сочинувале земјите од Европската Унија и членките на Сеопфатниот и прогресивен договор за транспацифичко партнерство (CPTPP). Според авторот, овие држави се посветени на почитување на меѓународните трговски правила и би можеле да создадат силен економски простор независен од најголемите светски сили.

Предложениот сојуз би ги исклучил САД и Кина. Во извештајот се наведува дека Вашингтон направил драматичен пресврт во однос на воспоставените трговски правила, додека Пекинг никогаш целосно не се придржувал до принципите на Светската трговска организација.

Анализата посочува дека земјите од ЕУ и CPTPP заедно создаваат околу 32 проценти од светскиот бруто-домашен производ, а како потенцијални партнери се споменуваат и Јужна Кореја, Бразил, Турција и Јужна Африка.

Според Четам хаус, постои голема веројатност економските политики на администрацијата на Трамп во иднина значително да влијаат врз економскиот раст и стабилноста на САД, но и на пошироката светска економија.

Во извештајот се оценува дека Велика Британија би можела да има важна улога во развојот на ваквата иницијатива, но се нагласува дека потребата од „трет економски пол“ постои независно од тоа која администрација се наоѓа во Белата куќа.