Разговараме со Снежана Станковиќ, претседателка на Управниот одбор на Сава пензиско друштво, за предизвиците со кои се соочува пензискиот систем и демографските трендови кои влијаат врз неговата одржливост.

Според неа, бројките јасно покажуваат дека традиционалниот модел на финансирање на пензиите станува сè потешко одржлив.

„Првиот столб повеќе не може целосно да ја исполни својата обврска. Тоа значи дека сите ние како граѓани сме загрозени во периодот кога нема да бидеме работно активни“, вели Станковиќ.

Таа потсетува дека во минатото системот функционирал во сосема поинакви економски и демографски услови.

„Во времето кога првиот столб бил функционален, три до четири вработени ‘издржувале’ еден пензионер“, објаснува таа.

Но денес, додава Станковиќ, реалноста е значително променета.

„Во Македонија денес имаме сооднос од околу 1,7 вработен на еден пензионер“, посочува таа.

Според неа, овие податоци не бараат сложени анализи – статистиката сама по себе го покажува притисокот врз системот.

„Зборуваме за бројки што јасно ја покажуваат насоката во која се движи општеството“, вели Станковиќ.

Слични трендови, нагласува таа, се присутни и на европско ниво.

„Проценките биле дека во Европа во 2040 година двајца вработени ќе издржуваат еден пензионер, но денес тој сооднос веќе е околу 1,5 спрема 1“, објаснува таа.

Прогнозите за следните децении се уште позагрижувачки.

„Во 2050 година се очекува само 1,17 вработени да издржуваат еден пензионер“, предупредува Станковиќ во разговорот за FinSight.

Според неа, токму овие демографски промени ја отвораат потребата од нови модели на штедење, инвестирање и долгорочно планирање на пензиската сигурност.

Разговараме со Снежана Станковиќ, Претседателка на Управниот одбор на Сава пензиско друштво, за новите законски измени и промените во начинот на инвестирање на средствата во пензиските фондови.

Таа објаснува дека досега сите членови во пензискиот фонд биле опфатени со една заедничка инвестициска стратегија, без разлика на возраста или профилот на ризик.

„Средствата се инвестираа врз основа на единствена инвестициска стратегија која важеше за сите членови, независно од нивната возраст“, вели Станковиќ.

Со новите законски измени, во рамките на истиот пензиски фонд ќе се формираат различни под-фондови, односно портфолија со различен степен на ризик и инвестициски пристап.

„Сега се предвидуваат растечко, балансирано и конзервативно портфолио, чија суштина е различна инвестициска стратегија и различен ризик“, објаснува таа.

Кај растечкото портфолио, фокусот е ставен на долгорочни инвестиции и повисок потенцијал за принос.

„Растечкото портфолио подразбира инвестициска стратегија на долг рок со финансиски инструменти со повисока ризичност, што овозможува и повисоки приноси“, посочува Станковиќ.

Балансираното портфолио, додава таа, е комбинација од умерен ризик и умерен принос.

„Кај балансираното портфолио имаме умерена инвестициска стратегија и умерен ризик“, вели Станковиќ.

Конзервативното портфолио, пак, е наменето за членови кај кои сигурноста има најголемо значење.

„Тука фокусот е на заштита на средствата, особено за пензионерите или лицата пред пензија, кога ликвидноста и сигурноста се најважни“, нагласува таа.

Според Станковиќ, секоја од трите стратегии ќе има различна структура на инвестиции и различни ограничувања за финансиските инструменти во кои ќе може да се вложуваат средствата на членовите.

Гостин во FinSight е Дарко Дедиќ, со кого разговараме за значењето на животното осигурување, финансиската заштита на семејствата и навиките на граѓаните кога станува збор за долгорочна сигурност.

Во интервјуто, Дедиќ објаснува што всушност опфаќа животното осигурување, кои се најчестите дилеми што ги имаат граѓаните и колку средства е потребно да се издвојуваат за една полиса. Разговараме и за тоа што се случува доколку осигуреникот во одреден период не може да ја плаќа полисата, дали таа престанува да важи и какви можности постојат за продолжување на осигурувањето.

Посебен акцент е ставен и на прашањето што добива осигуреникот по истекот на полисата, дали животното осигурување опфаќа само заштита на животот или и дополнителни покритија, како и што се случува со кредитните обврски во случај на смрт на осигуреникот.

Во разговорот се отвора и темата за развојот на животното осигурување во Македонија, споредбата со европските пазари и потребата од поголема финансиска едукација и подигнување на свеста кај граѓаните за придобивките од оваа форма на финансиска заштита.

Следете го целото интервју со Дарко Дедиќ на YouTube каналот на FinSight.

Новинар: Наташа Мерсовска