Вредноста на биткоинот падна под 77.000 долари на азиските пазари, откако растот на цените на нафтата и приносите на американските државни обврзници предизвика дополнителен притисок врз ризичните средства.

Биткоинот се спушти на околу 76.500 долари, додека инвеститорите сè повеќе очекуваат дека американските Федерални резерви нема да брзаат со намалување на каматните стапки. Според пазарните проценки, шансите ФЕД да ги задржи каматите непроменети во јуни се 98 проценти, а во јули 94 проценти.

Во исто време, приносот на 30-годишните американски обврзници достигна 5,13 проценти, највисоко ниво од 2007 година, што дополнително ги намалува интересот и атрактивноста на средства кои не носат принос, како што е биткоинот.

Анализите покажуваат дека речиси 60 проценти од вкупната понуда на биткоин не била поместена повеќе од една година, додека количината на биткоини на крипто-берзите е на најниско ниво во последните шест години.

Сепак, експертите предупредуваат дека краткорочните инвеститори остануваат ранливи на нови падови, особено во услови на нестабилни глобални пазари и засилени инфлаторни притисоци.

Пазарите оваа недела внимателно ќе ги следат финансиските резултати на NVIDIA, новите податоци за инфлацијата во САД, како и развојот на законските регулативи поврзани со криптовалутите во Вашингтон.

Биткоинот се наоѓа пред важен технички момент, додека неговата цена се движи непосредно под две клучни долгорочни нивоа што аналитичарите внимателно ги следат.

Според податоците на Glassnode, биткоинот моментално се тргува под 200-дневниот едноставен подвижен просек (200SMA) од 82.455 долари и под 200-дневниот експоненцијален подвижен просек (200EMA) од 82.027 долари.

Аналитичарите оценуваат дека зоната меѓу 82.000 и 82.500 долари претставува силен отпор кој може да одреди дали најголемата криптовалута повторно ќе влезе во долгорочен раст.

200-дневниот едноставен подвижен просек ја пресметува просечната цена на затворање во последните 200 дена, при што секој ден има еднаква тежина, додека експоненцијалниот просек повеќе ги нагласува поновите движења на цената.

Биткоинот првпат падна под 200-дневниот просек кон крајот на ноември 2025 година, кога цената се повлече од околу 108.000 долари. Обидот за закрепнување во јануари не успеа да го врати нивото од 97.000 долари, а до февруари 2026 година биткоинот се спушти до околу 60.000 долари.

Сепак, дел од аналитичарите гледаат причини за претпазлив оптимизам. Според платформата CheckonChain, биткоинот и натаму се држи над неколку важни нивоа на просечна куповна цена.

128-дневниот подвижен просек моментално се наоѓа на 75.700 долари, додека таканаречениот „True Market Mean“ е околу 78.200 долари. Просечната куповна цена на краткорочните инвеститори, кои купувале во последните 155 дена, изнесува околу 78.400 долари.

Фактот што биткоинот се тргува над овие нивоа укажува дека поголемиот дел од поновите инвеститори сè уште се во добивка, што ја намалува опасноста од панично продавање и дополнителен притисок врз цената.

Пазарот сега внимателно следи дали биткоинот ќе успее повторно да ја претвори зоната од 82.000 до 82.500 долари во стабилна поддршка за нов раст.

Биткоинот во понеделник накратко ја надмина границата од 80.000 долари, првпат од јануари, поттикнат од зголемениот апетит на инвеститорите за поризични средства, растот на азиските берзи и очекувањата за нови добивки во американскиот технолошки сектор.

Најголемата криптовалута достигна 80.594 долари, што е највисоко ниво од 31 јануари, пред делумно да ги избрише добивките и да продолжи со тргување нешто под оваа граница. Растот го следеа и други големи криптовалути, вклучувајќи ги етер и солана, иако со поскромни добивки.

Биткоинот од почетокот на американско-израелскиот конфликт со Иран пораснал за околу 20 проценти, што укажува дека пазарот на дигитални средства засега го издржал геополитичкиот шок и растот на цените на нафтата предизвикан од конфликтот. Дел од оптимизмот произлегува и од очекувањата дека во САД би можел да се постигне договор за клучна одредба поврзана со приносите на стабилните криптовалути, што би отворило пат за поширок законодавен пакет во Сенатот.

Позитивното расположение на криптопазарот се совпаѓа со поширокото закрепнување на ризичните средства. Азиските берзи се приближуваат до рекордните нивоа од февруари, поддржани од подобри од очекуваните резултати на технолошките компании. Во исто време, пазарите ги проценуваат спротивставените сигнали поврзани со Иран и Ормутскиот теснец, откако американскиот претседател Доналд Трамп најави дека САД ќе почнат да ги насочуваат бродовите што не се дел од конфликтот низ овој стратешки важен премин.

Сепак, од Иран доаѓаат предупредувања дека секое американско мешање во Ормутскиот теснец би можело да се смета за кршење на примирјето, што значи дека геополитичкиот ризик и понатаму е присутен. И покрај тоа, биткоинот во последните месеци постепено се опоравува по силниот пад од рекордните нивоа.

Криптовалутата во октомври минатата година достигна историски максимум над 126.000 долари, по што следуваше повеќемесечен пад до околу 60.000 долари во февруари. Опоравувањето делумно е поттикнато од зголемената институционална побарувачка, при што американските биткоин ETF-фондови во петокот забележаа нето прилив од 630 милиони долари.