Од полноќ ќе важат нови цени на горивата, откако Регулаторната комисија за енергетика донесе одлука со која малопродажните цени на нафтените деривати во просек се намалуваат за 0,27 проценти во однос на претходната пресметка.

Според новата одлука, од 30 јуни 2026 година, од 00:01 часот, ЕУРОСУПЕР БС-95 ќе се продава по максимална цена од 84,50 денари за литар, додека ЕУРОСУПЕР БС-98 ќе чини 86,50 денари за литар. Двата бензина поскапуваат за 0,50 денари.

Дизел горивото ЕУРОДИЗЕЛ БС поевтинува за 0,50 денари и неговата нова максимална цена ќе изнесува 80 денари за литар.

Цената на Екстра лесното масло за домаќинство не се менува и останува 79,50 денари за литар. Мазутот М-1 НС поевтинува за 0,796 денари за килограм и ќе се продава по цена од 41,495 денари за килограм.

Од РКЕ посочуваат дека при пресметката се земени предвид движењата на референтните цени на светските берзи, каде што е забележано намалување кај бензините, дизелот, екстра лесното масло и мазутот. Истовремено, курсот на денарот во однос на доларот бил повисок за 1,5132 проценти во споредба со претходната пресметка.

Регулаторната комисија нагласува дека утврдените цени се максимални. Трговците на големо и мало имаат можност горивата да ги продаваат и по пониски цени од највисоките дозволени.

Германскиот автомобилски гигант „Фолксваген“ се соочува со една од најтешките одлуки во својата историја. Компанијата, која со децении важи за симбол на германската индустриска моќ, подготвува длабока реорганизација што би можела да донесе масовно намалување на бројот на вработени, затворање производствени погони и нова корпоративна структура.

Според информациите што ги објавија германскиот „Manager Magazin“ и агенцијата „Ројтерс“, раководството на групацијата разгледува план со кој би можеле да бидат укинати до 100.000 работни места. Тоа би било двојно повеќе од претходно договорената програма со синдикатите од крајот на 2024 година, кога беше предвидено до 2030 година да се намалат околу 50.000 позиции.

Плановите, според извештаите, веќе биле претставени од извршниот директор Оливер Блуме пред највисокото раководство, а за нив треба да расправа и Надзорниот одбор на состанок закажан за 9 јули. Од „Фолксваген“ не ги коментираат доверливите документи, но признаваат дека групацијата мора да помине низ сериозни промени.

Една од најдраматичните мерки што се разгледува е затворање на четири фабрики во Германија. Според информациите, производството постепено би можело да запре во погоните на „Фолксваген“ во Хановер, Цвикау и Емден, како и во фабриката на „Ауди“ во Некарсулм. Со тоа би биле директно погодени повеќе од 45.000 работни места.

Производството во овие фабрики, според планот, би престанало откако актуелните модели ќе го завршат својот животен циклус, без да бидат заменети со нови. Сепак, спроведувањето на ваков план нема да биде лесно, бидејќи „Фолксваген“ има договор со синдикатите за заштита на работните места до крајот на 2030 година, додека кај „Ауди“ таквата гаранција важи до 2033 година.

Работничкиот совет и моќниот синдикат IG Metall веќе најавуваат силно противење на можни затворања фабрики и масовни отпуштања.

Реорганизацијата не се однесува само на намалување на трошоците. Според објавените информации, раководството размислува основниот бренд „Фолксваген“ и бизнисот со автомобилски компоненти да ги издвои во посебни компании. Таквата структура би можела во иднина да ѝ овозможи на групацијата полесно да привлекува капитал или одделни делови од бизнисот да ги листира на берза.

Покрај тоа, се планира и кратење на инвестициите за околу 15 проценти во следните пет години, на нешто повеќе од 130 милијарди евра.

Причините за ваквите радикални чекори се поврзани со сè поголемиот притисок врз компанијата. Во првиот квартал од годинава нето-добивката на групацијата се намалила за 28 проценти, на 1,56 милијарди евра, додека приходите паднале за два проценти, на 75,7 милијарди евра.

Дополнителен проблем се американските царини, кои според проценките на компанијата создаваат околу четири милијарди евра дополнителни годишни трошоци. Истовремено, „Фолксваген“ се соочува со сè посилна конкуренција на кинескиот пазар, каде што веќе ја загуби долгогодишната лидерска позиција. Во 2024 година беше престигнат од BYD, а во 2025 година падна и зад Geely. Само во првиот квартал продажбата на групацијата во Кина се намалила за околу 20 проценти.

Скапата транзиција кон електрични возила, конкуренцијата од кинеските производители, царините во САД и падот на профитабилноста го ставаат „Фолксваген“ пред одлуки кои до неодамна изгледаа незамисливо.

Американската Канцеларија за контрола на странски средства, OFAC, го продолжи рокот до 25 јули за општата лиценца што им овозможува на компаниите да преговараат со рускиот нафтен гигант „Лукоил“ за купување на неговите странски бизниси.

Претходниот рок истекуваше на 27 јуни, но со новото продолжување се остава дополнително време за разговори и за можни условни договори поврзани со продажбата на Lukoil International GmbH, компанија преку која „Лукоил“ управува со дел од своите меѓународни средства.

Одлуката е дел од поширокиот санкциски режим на САД кон руски компании и лица, воведен во контекст на руската војна против Украина. Преку ваквите лиценци, OFAC дозволува ограничени активности кои инаку би биле забранети со санкциите, но само под конкретни услови и во строго определен временски период.

Според американските правила, дозволата не значи целосно укинување на санкциите, туку овозможува одредени трансакции и разговори поврзани со потенцијална продажба на странските средства на „Лукоил“. OFAC задржува право да ја повлече лиценцата доколку процени дека страните не водат сериозни и добронамерни преговори за отуѓување на средствата.

Продолжувањето на рокот е значајно и за пазарите во Југоисточна Европа, каде што „Лукоил“ има присуство преку повеќе компании и малопродажни мрежи. Потенцијалната продажба на странските средства на рускиот нафтен гигант би можела да има влијание врз сопственичката структура и работењето на дел од неговите бизниси надвор од Русија.

Засега не се објавени детали за тоа кои компании се вклучени во разговорите, ниту дали постои конкретен договор за купување на странските средства на „Лукоил“.