Сониа Виеира, регионален директор за Европа во Engine by Starling, на конференцијата „Reinventing Banking for the Digital Age“ зборуваше за тоа како Starling Bank – лидер на дигиталната трансформација во британското банкарство – успеа да ја претвори технологијата во конкурентска предност и подобро клиентско искуство.

Од класично до дигитално банкарство

Сè започнува со Ен Боден, поранешна банкарка со повеќе од 30 години искуство, која одлучи да ја напушти корпоративната кариера и да создаде банка која служи на луѓето, а не на бирократијата. Така се роди Starling Bank, првата целосно дигитална банка во Велика Британија која успеа да комбинира лојалност на клиентите и профитабилност.

Со над 4 милиони клиенти и оперативни трошоци трипати пониски од традиционалните банки, Виеира потенцира дека технологијата не е трошок, туку темел на раст, доверба и ефикасност.

Engine by Starling – платформа за глобална дигитална трансформација

Успехот на Starling доведе до создавање на Engine – технолошка платформа која им овозможува на банки ширум светот да ја користат истата инфраструктура за брза дигитална трансформација.

Клучните принципи на Engine се:

– одлично клиентско искуство – едноставно, интуитивно и транспарентно;

– внатрешна ефикасност – овластување на вработените преку интегриран систем;

– брзина и флексибилност – способност за брзо реагирање на нови пазарни можности.

Виеира истакна дека Engine не гради банки, туку двигатели што им овозможуваат на банките да се движат со брзината на своите клиенти.

Глобално присуство: од Велика Британија до Балканот

Виеира сподели примери за успешна имплементација на Engine. Во Австралија, помогнале во креирање на нова дигитална единица во стара банка со 150-годишна историја, процес кој траел помалку од една година. На Балканот, Salt Bank, дигиталната филијала на Banca Transilvania во Романија, постигнала пазарен удел од 4% за шест месеци и се искачила меѓу топ 10 банки во земјата, со над 500.000 клиенти.

Клучот за успех според Виеира бил интегриран систем кој ги обединува сите услуги, човечки контакт преку 24/7 центар со реални советници и иновативен модел на лојалност – првите 8.000 клиенти станале „основачи“ со посебни привилегии и учество во сопственоста.

Банкарството на иднината: AI, податоци и човечки вредности

Виеира заклучи дека дигиталната ера не ја заменува човечката врска, туку ја засилува со технологија што ја разбира индивидуалноста на клиентот. Банките на иднината ќе бидат AI-driven, но value-led, потпирајќи се на податоци, но водени од човечки вредности.

Таа порача до регионалните банки: Не чекајте технологијата да ве стигне – станете дел од неа.

Народната банка и Агенцијата за катастар на недвижности денеска потпишаа Меморандум за соработка, со кој се воспоставува рамка за унапредена размена на податоците и информации од заемен интерес, во функција на подобрување на аналитичките и институционалните активности на двете институции.

Меморандумот, кој го потпишаа гувернерот на Народната банка, д-р Трајко Славески, и директорот на Агенцијата за катастар на недвижности, Иван Живковски, претставува основа за систематска и безбедна размена на информации, пред сѐ од Регистарот на цени и закупнини што го води Катастарот како дел од Геодетско-катастарскиот информациски систем.

Преку оваа соработка, Народната банка ќе ги збогати анализите на ризиците од пазарот на недвижности како важен сегмент во рамки на нејзините активности за придонесување кон постигнување и одржување на финансиската стабилност.

Овој документ е одраз на заемната определба на Народната банка и Агенцијата за катастар на недвижности за интензивирање на меѓуинституционалната соработка, базирана на принципите на професионалност, транспарентност и ефикасност, во насока на унапредување на квалитетот на податоците и политиките од јавен интерес.

Владата на Република Северна Македонија го достави до Собранието Предлог-законот за изменување и дополнување на Законот за данокот на додадена вредност (ДДВ), со кој се предлага укинување на досегашното ослободување од плаќање ДДВ при увоз на пратки со мала вредност до 22 евра, испорачани од странство кон домашни примачи.

Со новите измени, ослободувањето ќе важи само за мали пратки од некомерцијална природа, испратени од физичко лице до физичко лице, доколку нивната вредност не надминува 22 евра во денарска противвредност. Исклучени се пратки што содржат алкохол и алкохолни пијалаци, парфеми, тоалетни води, како и тутун и тутунски производи.

Ова значи дека онлајн купувањата од странски веб-страници, без разлика на вредноста, ќе бидат предмет на оданочување со ДДВ, што ја усогласува земјата со европската пракса, имајќи предвид дека Европската унија уште во 2021 година го укина истиот праг за ослободување.

Иако Предлог-законот е веќе поднесен во Собранието, поради тековните локални избори не може да се стави на гласање во овој момент. Според најавите од Министерството за финансии, се очекува измените да бидат разгледани и изгласани на собраниска седница кон средината на ноември, веднаш по завршувањето на изборниот процес.

Од Министерството за финансии посочуваат дека измените нема да имаат негативни фискални последици врз Буџетот, ниту ќе бараат дополнителни финансиски средства за спроведување. Сепак, експертите предупредуваат дека поштенските оператори и Царината ќе се соочат со зголемен број пратки што ќе треба да бидат обработени со ДДВ-обврска, што може да создаде административен притисок.

Со измената на член 27-б од Законот за ДДВ се додава нова точка (2-а) и се брише старата точка (26-а), со што се затвора можноста за ослободување на пратки до 22 евра од странство.

Со укинувањето на ослободувањето од ДДВ, на удар ќе бидат најмногу малите пратки од платформи како Temu, Shein, AliExpress и слични онлајн продавници, преку кои македонските потрошувачи најчесто нарачуваат евтини производи под 20 евра. Овие пратки досега пристигнуваа без дополнителни давачки, но со новите измени ќе мора да минат царинска постапка и да се пресмета ДДВ, што ќе ја зголеми конечната цена за купувачите и може да го намали интересот за вакви нарачки.

Новите одредби ќе стапат во сила осмиот ден од објавувањето во „Службен весник на Република Северна Македонија“, по нивното усвојување од страна на Собранието.