Цените на суровата нафта продолжија да растат и на почетокот на неделата, откако се зголемија стравувањата од поширока ескалација на конфликтот поврзан со Иран и Блискиот Исток.

Растот следува по нападот врз нуклеарната електрана „Барака“ во Обединетите Арапски Емирати, како и по новите напади со дронови насочени кон ОАЕ и Саудиска Арабија. Властите во ОАЕ соопштија дека го истражуваат потеклото на нападите и порачаа дека го задржуваат правото на одговор.

Цената на нафтата „брент“ порасна за 1,82 проценти и достигна 111,30 долари за барел, додека американската WTI нафта се искачи за 2,10 проценти, на 107,60 долари за барел. И двата реперни типа минатата недела забележаа раст од над седум проценти, поттикнати од стравувањата за нарушување на снабдувањето.

Дополнителна неизвесност на пазарите создаваат и најавите дека американскиот претседател Доналд Трамп ќе разговара со советниците за национална безбедност за можни воени опции поврзани со Иран.

Иранскиот министер за надворешни работи Абас Арагчи изјави дека Техеран нема доверба во САД, но дека и понатаму е подготвен и за дипломатски разговори и за можен обновен конфликт.

Во фокусот на глобалните пазари останува и Ормутскиот теснец, низ кој поминува речиси една петтина од светските испораки на нафта и течен природен гас. Теснецот претставува една од најважните извозни рути за производители како Саудиска Арабија, Ирак и Катар.

Цената на златото забележа нов пад на почетокот на трговската недела, приближувајќи се до поддршката од 4.500 долари, што според анализите може да отвори простор за дополнително слабеење на вредноста на благородниот метал.

Аналитичарите посочуваат дека продажниот притисок и натаму останува силен, додека краткорочниот тренд се движи во негативна насока.

Во анализата се наведува дека цената продолжува да се движи под ЕМА50, што создава дополнителен негативен притисок и го зајакнува очекувањето за продолжување на надолниот тренд.

Техничките индикатори, според проценките, покажуваат дека дел од состојбата на препродаденост е ублажена, со што се отвора можност за нови загуби во краток рок.

Пазарите внимателно ги следат движењата на златото, кое традиционално се смета за сигурно засолниште во услови на економска неизвесност и нестабилност на глобалните финансиски пазари.

Американските и светските берзи денеска се соочуваат со пад, додека цените на нафтата нагло пораснаа поради новите изјави на американскиот претседател Доналд Трамп поврзани со ситуацијата околу Ормутскиот теснец и конфликтот со Иран.

Цената на нафтата „брент“ порасна за повеќе од 3 проценти и надмина 109 долари за барел, откако Трамп во интервју за „Фокс њуз“ изјави дека САД немаат потреба Ормутскиот теснец да остане отворен, иако глобалните енергетски резерви брзо се намалуваат. Подоцна, по разговорите со кинескиот лидер Си Џинпинг во Пекинг, Трамп изјави дека и двете страни сакаат конфликтот со Иран да заврши.

Поради растот на цените на нафтата, американските берзански фјучерси забележаа пад, при што технолошкиот индекс Насдак-100 се намали за повеќе од 1 процент. Меѓу најпогодените беа акциите на компаниите од секторот за чипови, кои претходните денови бележеа силен раст.

Во меѓувреме, приносот на 10-годишните американски државни обврзници се искачи над 4,5 проценти, што повторно ги засили стравувањата од инфлација поради повисоките цени на енергенсите.

Падови беа регистрирани и на азиските пазари. Јужнокорејскиот индекс Коспи загуби повеќе од 6 проценти, додека јапонскиот Никеи 225 исто така ослабе поради растот на производствените цени во април, предизвикан од поскапувањето на нафтата и нафтените деривати.

Инвеститорите внимателно ги следат и случувањата во Велика Британија, каде што расте притисокот врз британскиот премиер Кир Стармер. Приносите на британските државни обврзници пораснаа, а британската фунта ослабе во однос на доларот.