Министерство за финансии на Северна Македонија соопшти дека двете водечки меѓународни агенции за кредитен рејтинг Standard & Poor’s и Fitch Ratings го потврдиле стабилниот кредитен профил на државата, со непроменети оценки и стабилни изгледи.

„Стандард и Пурс“ изврши редовен полугодишен преглед на кредитниот рејтинг на земјата, без објавување нов извештај, што укажува дека клучните економски и фискални фактори остануваат непроменети. Во меѓувреме, „Фич“ спроведе ревизија со исход „Review – No Action“, односно без промена на постојниот рејтинг и без дополнителен извештај.

Според последните објавени оценки, „Стандард и Пурс“ го задржува рејтингот на ниво „BB-“ со стабилен изглед, додека „Фич“ го потврдува рејтингот „BB+“, исто така со стабилни изгледи.

Од Министерството за финансии оценуваат дека оваа потврда е јасен сигнал за стабилноста на макроекономските политики, умереното ниво на јавниот долг и способноста на државата навремено да ги сервисира финансиските обврски. Воедно, се нагласува континуитетот во спроведувањето на економските политики и отпорноста на економијата во услови на глобална неизвесност.

Агенциите посочуваат дека економскиот раст е поддржан од засилените јавни инвестиции, особено во инфраструктурата, како и од растот на личната потрошувачка.

Министерката за финансии, Гордана Димитриеска-Кочоска, истакна дека потврдата на рејтинзите претставува значаен сигнал за доверба во економските политики и дополнителен поттик за продолжување на реформите со цел одржлив економски раст и подобар животен стандард.

Организацијата ОПЕК+ предупредува дека штетите врз енергетските ресурси на Блискиот Исток може да имаат долгорочни последици врз глобалното снабдување со нафта, дури и по евентуалното завршување на конфликтот со Иран. И покрај тоа, групата одобри симболично зголемување на производствените квоти за наредниот месец.

По состанокот на министерскиот надзорен одбор, беше истакнато дека обновата на оштетената инфраструктура е сложен и скап процес кој бара време. Воедно беше нагласено дека секое нарушување, било преку напади врз енергетски постројки или прекини на извозните рути, дополнително го дестабилизира пазарот и ја отежнува рамнотежата во снабдувањето.

Пазарот на нафта веќе подолг период ги чувствува последиците од случувањата, при што цените минатиот месец се искачија на речиси 120 долари за барел. Овој раст следеше по нападите врз клучни енергетски објекти и затворањето на Ормускиот теснец, што значително го наруши глобалното снабдување.

Дополнителна неизвесност внесуваат и сигналите за можни понатамошни тензии, што влијае врз растот на цените и нестабилноста на пазарот.

Пред почетокот на кризата, членките на ОПЕК+ и нивните партнери веќе започнаа постепено враќање на производството кое беше намалено во 2023 година. По период на релативна стабилност на почетокот од годинава, од април беше донесена одлука за зголемување на производството.

Од ОПЕК+ најавуваат внимателно следење на состојбите на пазарот и подготвеност за дополнителни мерки со цел стабилизирање на глобалното снабдување. Според нив, тековната нерамнотежа има пошироки последици, не само врз енергетскиот сектор, туку и врз глобалната економија и синџирите на снабдување.

Цената на суровата нафта бележи осцилации во текот на последните внатредневни тргувања, откако се задржа под актуелното ниво на отпор од 105 долари за барел. Пазарот се обидува да создаде позитивен импулс што би можел да помогне во пробивање на оваа граница, додека во исто време се намалува состојбата на прекупеност, сигнализирана од индикаторите за релативна сила.

Според анализата, се појавуваат и негативни сигнали од техничките индикатори, што ја оправдува моменталната нестабилност и колебање на цената.

Сепак, и покрај краткорочните флуктуации, доминантниот тренд на краток рок останува нагорен. Овој тренд е поддржан од движењето на цената долж поддржувачка тренд-линија, како и од фактот што нафтата се тргува над 50-дневниот експоненцијален подвижен просек (EMA50), што дополнително ги зголемува шансите за раст во блиска иднина.