Компаниите што вложуваат стотици милијарди долари во развојот на вештачката интелигенција со години тврдат дека новата технологија ќе им овозможи на луѓето да работат помалку. Но, анализата на Би-би-си покажува сосема поинаква слика во самите АИ компании, каде дел од вработените работат и до 90 часа неделно.

Уште пред четири години директор за инженерство во Google прогнозираше дека вештачката интелигенција ќе овозможи четиридневна работна недела до 2025 година. И OpenAI годинава ги повика компаниите да почнат да тестираат четиридневна работна недела без намалување на платите, со образложение дека АИ наскоро ќе може значително да ја зголеми продуктивноста.

Сепак, поранешен технички вработен во OpenAI за Би-би-си изјавил дека самата компанија никогаш не тестирала четиридневна работна недела. Тој ја опишал работната култура како исцрпувачка, со чести кризни состаноци, работа за време на викендите и строги оценки на работниот учинок.

Според неговото сведоштво, вработените неретко доаѓале на работа и во сабота или недела за да ги завршат заостанатите обврски или да проверат дали се појавиле проблеми.

Слични пораки за влијанието на вештачката интелигенција испраќаат и други технолошки компании. Anthropic, на пример, истакнува дека неговиот АИ алат Claude може самостојно да работи околу седум часа без пауза, додека Марк Закерберг повеќепати зборуваше за тоа дека АИ драматично го менува начинот на работа и им овозможува на помал број луѓе да постигнат повеќе.

Но, според сегашни и поранешни вработени, токму луѓето што ги развиваат овие алатки често работат значително повеќе од вообичаените 40 часа неделно.

Во Meta, дел од вработените годинава биле ненадејно префрлани во тимови што работат на итни проекти поврзани со вештачката интелигенција. Еден сегашен и еден поранешен вработен рекле дека меѓу себе тоа го нарекувале „регрутација“, бидејќи практично немале можност да го одбијат префрлањето.

Работното време во овие тимови, според нивните сведоштва, често траело до доцна во ноќта и за време на викендите, а дел од вработените имале чувство дека се постојано достапни и надвор од официјалното работно време.

Така, додека технолошките гиганти ја претставуваат вештачката интелигенција како алатка што треба да донесе поголема продуктивност и пократко работно време, сведоштвата од нивните редови укажуваат дека трката за развој на АИ засега создава и силен притисок врз дел од вработените.