Работењето без пауза не ја зголемува продуктивноста, напротив, може значително да ја намали. Истражувања на научници од Харвард покажуваат дека прекумерната работа води кон замор, повеќе грешки и пад на ефикасноста, создавајќи таканаречен „магичен круг“ на исцрпеност.

Според анализите, стресот почнува да расте по само два часа непрекината работа, а по четири часа може да се зголеми и до 18 проценти. Затоа, редовните паузи се клучни за одржување на концентрацијата и менталното здравје.

Кратките паузи се покажале како особено ефикасни. Дури и паузи од една до десет минути можат да помогнат во намалување на заморот и подобрување на фокусот, доколку се прават редовно. Експертите советуваат работа во циклуси, а пример, 25 минути работа со кратка пауза, по што следува подолг одмор.

Истражувањата укажуваат дека нивото на енергија кај луѓето најчесто опаѓа околу 15 часот, па затоа подолгите паузи се препорачуваат во попладневните часови, додека наутро се доволни пократки прекини.

Не секоја пауза е корисна. Прегледувањето на социјалните мрежи, што го прават голем број луѓе, може да доведе до дополнителен ментален замор наместо до одмор. Исто така, разговорите за работа за време на пауза не му дозволуваат на мозокот вистински да се „исклучи“.

Наместо тоа, експертите препорачуваат кратка физичка активност, престој на свеж воздух, разговор со блиски лица или едноставно дистанцирање од работните обврски. Дури и неколку минути движење или кратка прошетка можат значително да го подобрат расположението и концентрацијата.

Клучната порака е дека паузите не се губење време, туку неопходен дел од продуктивниот работен ден, кој помага мозокот да се „ресетира“ и да продолжи со поголема ефикасност.

Од 10 април започнува целосната примена на новиот систем за контрола на влез во Европската Унија, кој носи значајни промени за сите патници од земји кои не се членки на ЕУ, вклучително и граѓаните од регионот.

Станува збор за дигиталниот систем за влез и излез (EES), кој ја заменува досегашната практика на печати во пасошите и воведува построга контрола на престојот во шенген-зоната. При влез, покрај пасош, патниците ќе мора да даваат и биометриски податоци како отпечатоци од прсти и фотографија од лице.

Системот важи за краткорочен престој до 90 дена во период од 180 дена, без разлика дали станува збор за туристичко или деловно патување. При секое преминување на граница ќе се евидентираат личните податоци, датумите на влез и излез, како и евентуалното пречекорување на дозволениот престој.

Од Европската комисија посочуваат дека новиот систем ќе овозможи побрзи проверки, но и поефикасно откривање злоупотреби, како што се лажни идентитети или нелегален престој. Според првичните податоци, веќе се одбиени десетици илјади влезови поради неуредна документација или сомнителна цел на патување.

Во почетната фаза се очекуваат и гужви на граничните премини, особено во туристичката сезона, поради што на патниците им се препорачува да пристигнуваат порано, особено на аеродромите. Државите членки ќе имаат можност привремено да се вратат на стариот систем само во исклучителни ситуации.

За оние што патуваат со автомобил, при првиот влез по 10 април ќе биде потребно да излезат од возилото и да ги дадат биометриските податоци на граничниот премин.

Дополнително, од октомври 2026 година се планира воведување на системот ETIAS, кој ќе претставува задолжителна претходна онлајн авторизација за патување во ЕУ, со надомест од 20 евра. Одобрувањето најчесто ќе се добива за неколку минути, но во одредени случаи може да трае и до 72 часа.

Иако безвизниот режим останува во сила, новите правила значат построги контроли и поголема одговорност за патниците. Во пракса, тоа ќе значи подетални проверки на границите, но и подобра безбедност и контрола на движењето во рамки на ЕУ.

Велигденските празници традиционално носат изменето работно време кај институциите, компаниите и услугите во земјава. Во 2026 година неработни денови се 10 април (Велики Петок), 12 април (Велигден) и 13 април (вториот ден на Велигден).

10 април е Велики Петок, петок пред Велигден е неработен ден за граѓаните од православна вероисповед, додека за граѓаните од другите верски заедници е работен ден. На 12 и 13 април (Велигден и вториот ден на Велигден), како државни празници, повеќето институции, јавната администрација и дел од приватниот сектор нема да работат.

Вообичаено, во деновите околу празниците државните служби, шалтерите и управните институции работат со скратено работно време или се целосно затворени за време на неработните денови.

Трговските објекти, маркетите и трговските центри најчесто функционираат со изменет режим на работа, при што дел од нив работат со скратено работно време, а на самиот празник голем број објекти остануваат затворени.

Банките, поштите и другите услужни дејнсти, исто така, не работат во неработните денови, или имаат изменето и скратено работно време во деновите пред празниците. Во меѓувреме, јавниот превоз најчесто функционира по празничен, односно неделен возен ред, со намален број на линии.

Бидејќи работното време може да варира од институција до институција, препорачливо е граѓаните однапред да се информираат за режимот на работа на службите и услугите што планираат да ги користат.