Во НЛБ Галерија се одржа традиционален настан посветен на јубилејците и пензионерите на НЛБ Банка, кои со посветеност, тимски дух и колегијалност ја градат организацијата повеќе од четири децении.

Оваа година, вкупно 64 вработени го прославуваат својот јубилеј:

• 29 вработени со 10 години посветена работа
• 35 вработени со 20 години континуиран придонес

Особено беше одбележан придонесот на 7 пензионирани вработени, кои низ децениите оставија значајна трага во развојот на НЛБ Банка.

На настанот присуствуваше Управата на Банката, која им упати искрена благодарност на сите колеги за нивниот труд и посветеност. Претседателот на Управниот одбор, Тони Стојановски, истакна дека мудроста, колегијалноста и силниот тимски дух на јубилејците и пензионерите се темелот врз кој Банката гради развој, иновации и успех повеќе од четири децении.

„Им честитаме на сите јубилејци и пензионери и од срце им благодариме за нивната улога во градењето на 40-годишната успешна приказна на Банката. Без нив, оваа приказна не би била истата. Сè што е создадено заедно ќе продолжи да се унапредува, како и секогаш – со силен тимски дух“, истакна Стојановски.

НЛБ Банка со благодарност им честита на сите јубилејци и пензионери, чиј придонес е неизбришлив дел од 40-годишната успешна приказна на Банката.

Почнувајќи од денес, 12.12.2025 година, по усвојувањето на измените и дополнувањата на Статутот од страна на Собранието на акционери, Стопанска банка а.д. Битола и официјално го добива новото име АЛТА банка АД Битола, или скратено – АЛТА банка.

Успешната аквизиција на Стопанска банка а.д. Битола од страна на АЛТА банка АД Белград беше финализирана во октомври 2025 година, со што банката доби нов мнозински акционер кој, заедно со поврзаните субјекти, поседува 93,2571% од капиталот.

Со ребрендирањето, АЛТА банка АД Битола станува дел од АЛТА Група – современа финансиска групација со седиште во Белград, која ги обединува банкарските, платежните и инвестициските услуги. Како регионален лидер, групацијата работи согласно европските вредности и највисоките стандарди, со јасен фокус на иновации, дигитализација и врвен квалитет на услугите.

АЛТА Банка АД Белград е една од најзначајните членки на групацијата, која во 2024 година ја доби наградата за најбрзорастечка банка во Република Србија. Усогласувањето со нејзините стандарди ќе отвори нови можности за АЛТА банка АД Битола, вклучувајќи развој на иновативни производи, современи дигитални решенија и унапредено клиентско искуство, секако со целосно почитување на домашните финансиски регулативи.

Амбицијата на АЛТА банка АД Битола е да стане значаен фактор во банкарскиот сектор во Македонија, поддржувач на локалната економија и активен учесник во развојот на регионалната соработка.

За клиентите и деловните партнери, најважно е дека работењето продолжува непречено, со задржување на стабилноста, сигурноста и континуитетот на услугите. Сите експозитури остануваат на истите локации, со воведување на нов визуелен идентитет на АЛТА банка.

„За постоечките клиенти не се потребни никакви дополнителни активности – сите постojни сметки, платежни картички, електронско банкарство и договори остануваат целосно валидни и функционални. Податоците на клиентите се целосно заштитени, а сите законски регулативи строго се почитуваат. Производите, услугите и каналите за поддршка продолжуваат да функционираат без промени. Клиентите ќе бидат навремено информирани за сите понатамошни активности кои ќе придонесат за уште подобро банкарско искуство“, велат од АЛТА банка АД Битола.

Министерот за култура и туризам, Зоран Љутков; генералниот извршен директор на Стопанска банка АД-Скопје, Хрисула Кутуди и директорот на Природонаучниот музеј – Скопје, Ивица Заркадов, денеска потпишаа Меморандум за тригодишно стратешко партнерство, со кој се воспоставува соработка за модернизација и дигитално обогатување на музејот. Потпишувањето на меморандумот се случува во пресрет на 100-годишниот јубилеј од основањето на оваа музејска институција во следната 2026 година.

Министерот Љутков во изјава за медиумите изрази благодарност до Стопанска банка што ја препозна важноста и потенцијалот на музејот како национален центар за еколошко и научно образование.

„Овој Меморандум е потврда за тоа како јавниот и приватниот сектор можат успешно да соработуваат за создавање подобри услови за учење, иновативни културни и научни содржини и за поддршка на младите генерации. Особено ме радува што проектите што ќе се реализираат, од „Магичната соба“ до подобрената пристапност, модерната веб-страница и новите дигитални алатки, директно ќе влијаат врз развојот на љубопитноста, знаењето и креативноста кај најмладите посетители“, потенцираше Љутков.

Генералниот извршен директор и претседател на Управниот одбор на Стопанска банка, Хрисула Кутуди, нагласи дека Банката негува долга традиција во поддршката на образованието, науката и јавните институции.

„Ми претставува особено задоволство да бидам денеска тука како претставник на тимот на Стопанска банка, посветени на новото партнерство со Природонаучниот музеј и со Министерството за култура и туризам. Стопанска банка негува долга традиција на поддршка на образованието, науката и на јавните институции. Се надевам дека со ова партнерство ќе придонесеме за нови интерактивни искуства за илјадниците деца кои го посетуваат Музејот секоја година продолжувајќи ја со тоа научната мисија градена веќе еден век. Им благодарам на Министерството за нивната насока и поддршка и на тимот на Музејот за нивната енергија и инспирација во соработката со нашиот тим. Со нетрпение очекувам да се сретнеме повторно тука на отворањето на новите дигитални поставки“, истакна Кутуди.

Директорот на Природонаучниот музеј, Ивица Заркадов, изрази благодарност до Стопанска банка за значајната донација од 150.000 евра, која ќе овозможи обновување на влезниот портал и холот, изградба на првата интерактивна „MAGIC ROOM“ во Македонија и целосна модернизација на веб-страницата. Тој истакна дека овие промени ќе го направат музејот поатрактивен за учениците, младите и за туристите, како и дека ова претставува прва ваква поголема донација директно вложена во музејската зграда, во неговото стогодишно постоење.