Народната банка ги повикува младите истражувачи да учествуваат на Конкурсот за годишната награда за најдобар труд од областа на макроекономијата, банките и банкарските системи.

Целта на наградата е да се поттикнат научноистражувачката работа и развојот на економската мисла, но и да се даде поголема афирмација на младите стручни кадри во земјава.

Право на учество имаат државјани на Република Северна Македонија на возраст до 35 години. Пријавениот истражувачки труд треба да содржи осврт на македонската економија.

Трудовите може да бидат подготвени на македонски, албански или англиски јазик. Дозволено е учество и со веќе објавен труд, под услов тој да е објавен по 1 јануари 2025 година.

За најуспешните истражувачи се предвидени и парични награди. Авторот на прворангираниот труд ќе добие 130.000 денари, додека за второрангираниот труд е предвидена награда од 65.000 денари.

Крајниот рок за доставување на трудовите е 1 февруари 2027 година.

Деталите за условите за учество, начинот на пријавување, критериумите за оценување и целокупната постапка се наведени во Конкурсот за доделување на годишната награда на Народната банка за 2027 година.

Комерцијална банка организира наградна игра за корисниците на Visa картички, во која главната награда е средба со фудбалската ѕвезда Ламин Јамал и можност за следење натпревар на Барселона во живо на „Камп Ноу“.

Во наградната игра учествуваат плаќањата направени до 31 октомври 2026 година со Visa Debit, Visa Classic Revolving, Visa Classic Standard, Visa Signature и Visa Gold картичките на Комерцијална банка.

Со секоја трансакција корисниците добиваат кодови за учество, додека плаќањата преку Google Pay, Apple Pay или Garmin Pay носат по два кода.

Главната награда вклучува средба со Ламин Јамал за добитникот и негов придружник, како и фудбалско искуство поврзано со Барселона.

Извлекувањето на добитникот е закажано за 3 ноември 2026 година.

АЛТА банка АД Битола е најавена како бронзен партнер на регионалниот настан MicroBalkans 2026 | Lending Reimagined, кој ќе се одржи на 24 и 25 септември во хотелот „Холидеј Ин“ во Скопје.

Банката нуди широк спектар финансиски услуги за физички и правни лица, меѓу кои кредитирање, штедење, платежни картички, трансакциски сметки и дигитално банкарство.

АЛТА банка АД Битола, поранешна Стопанска банка Битола, во 2025 година стана дел од српската ALTA Group, а во декември истата година го презеде новото име.

Со долгогодишно присуство на финансискиот пазар во Северна Македонија, банката со учеството на MicroBalkans 2026 се вклучува во регионалниот дијалог за развојот на нови модели и современи решенија во финансиските услуги.

Настанот MicroBalkans 2026 | Lending Reimagined е во организација на Групацијата на небанкарски финансиски институции во Северна Македонија и ќе обедини претставници од финансискиот сектор со фокус на трендовите, иновациите и идниот развој на кредитирањето и финансиските услуги во регионот.