Во насока на обезбедување соодветна медицинска и рехабилитациска поддршка за настраданите во пожарот во Кочани, Фондацијата „Заедно за едно“, основана од Македонската банкарска асоцијација, набави и испорача во ЈЗУ Општа болница Кочани 90 (деведесет) комплети S-Touch C1 ракавици за пасивна рехабилитација.

Секој комплет се состои од терапевтска ракавица, контролер и клон ракавица и претставува современо технолошко решение за спроведување на пасивни рехабилитациски третмани кај пациенти со нарушена моторика на горните екстремитети, како резултат на изгореници, повреди или невролошки состојби.

Со оваа донација значително се унапредуваат капацитетите на болницата за обезбедување континуирана и квалитетна рехабилитација, што е од особена важност во процесот на закрепнување на пациентите погодени од трагичниот настан.

„Остануваме посветени на обезбедување соодветни услови за лекување и рехабилитација и на континуирана поддршка на здравствените установи во справувањето со последиците од овој немил настан“, истакнуваат од Фондацијата „Заедно за едно“.

Британските граѓани се повикани да посветат внимание на старите монети, откако беше потенцирано на исклучително редок примерок кој денес вреди вистинско богатство. Станува збор за монети со ликот на кралот Едвард VIII, од кои една беше продадена во 2020 година за дури еден милион фунти (1,14 милиони евра).

Вредноста на колекционерските монети зависи од повеќе фактори, но реткоста речиси секогаш е пресудна. Колку е поретка монетата, толку колекционерите се поспремни да издвојат поголеми суми. Токму ова е случај со еден посебен примерок од многу специфичен период од британската историја.

Во видео објавено на социјалната мрежа „TikTok“, експерт познат како „Волшебник за собирање монети“ им советуваше на следбениците да внимаваат на монети со ликот на кралот Едвард VIII. Монетите на Едвард VIII се исклучително ретки и меѓу најскапите во британската нумизматика. Тој владеел само 326 дена во 1936 година, пред да абдицира за да се ожени со Волис Симпсон, што довело до уставна и политичка криза.

Поради краткото владеење, ниту една монета со неговиот лик официјално не била пуштена во оптек. Сепак, биле изработени неколку пробни примероци, вклучувајќи златни суверени и пени, кои денес се сметаат за едни од најретките британски монети.

Според податоци од аукциски куќи, еден златен суверен на Едвард VIII бил купен во 2014 година од американски колекционер за 516.000 фунти, а во 2020 година бил препродаден за речиси двојно повисока сума на анонимен британски колекционер. Со достигната цена од околу еден милион фунти ја прави најскапата британска монета некогаш продадена.

Експертите советуваат дека секој кој поседува ваков примерок може да има во рацете исклучително вреден колекционерски предмет, чија цена со текот на времето дополнително расте.

Фото: canadiancoinnews.com

Американската агенција за царина и гранична заштита соопшти дека на полноќ ќе ја прекине наплатата на царините воведени минатата година врз основа на Законот за меѓународни вонредни економски овластувања (IEEPA), откако Врховниот суд на САД ги прогласи за незаконски.

Од агенцијата информираа дека од една минута по полноќ ќе бидат деактивирани сите царински кодови за наплата на овие давачки, со што формално престанува нивната примена на американските пристаништа и гранични премини.

Суспензијата се совпаѓа со воведувањето на новата глобална царина од 15%, која претседателот Доналд Трамп ја активираше врз основа на друго законско овластување, со цел да ги замени поништените царини. Новиот режим отвора дополнителни прашања за влијанието врз трговските текови, цените и глобалниот економски раст.

Агенцијата не појасни зошто наплатата продолжила неколку дена по судската одлука, што предизвика реакции и критики од дел од увозниците и трговските партнери на САД.