Народната банка одлучи да ја зголеми основната каматна стапка за 0,25 процентни поени, односно од 4 на 4,25 отсто, со цел да одговори на засилените инфлациски ризици и неизвесностите поврзани со глобалните економски случувања.

Одлуката била донесена на редовната седница на Извршниот одбор за поставеноста на монетарната политика, при што биле земени предвид најновите податоци за домашната економија, состојбите на девизниот пазар и меѓународното окружување.

Во Народната банка посочуваат дека и покрај стабилизацијата на побарувачката на девизи во последниот период, економските последици од геополитичките тензии и натаму се присутни. Дополнително, инфлацијата иако забавува, останува на релативно високо ниво, што бара претпазлив пристап во водењето на монетарната политика.

Според последните податоци, годишната стапка на инфлација во мај се намали на 4,8 отсто, во споредба со 5,7 проценти во април. Сепак, централната банка предупредува дека растот на цените на енергенсите и понатаму претставува ризик кој може да се прелее и врз останатите сегменти на економијата.

На крајот на мај девизните резерви достигнале 5,21 милијарди евра и остануваат во сигурната зона, додека девизниот пазар функционирал стабилно без потреба од интервенции на централната банка.

Домашната економија, според оценките на Народната банка, и понатаму покажува отпорност. Во првиот квартал од годинава бруто-домашниот производ пораснал за 3,1 отсто, што е во согласност со претходните проекции. Истовремено, кредитната активност продолжува да расте со посилно темпо од очекуваното, што дополнително влијае врз домашната побарувачка.

Од Народната банка нагласуваат дека ќе продолжат внимателно да ги следат движењата во домашната и светската економија и дека остануваат посветени на одржување на стабилноста на девизниот курс на денарот во однос на еврото и на зачувување на ценовната и финансиската стабилност.

Управниот совет на Европската централна банка (ЕЦБ) донесе одлука за зголемување на сите три клучни каматни стапки за 25 базични поени, што претставува прво покачување од 2023 година наваму.

Согласно одлуката, каматната стапка на депозитниот инструмент ќе изнесува 2,25 отсто, стапката за главните операции за рефинансирање 2,40 отсто, а каматната стапка на маргиналниот кредитен инструмент 2,65 отсто. Новите стапки ќе стапат во сила на 17 јуни.

Од ЕЦБ соопштија дека војната на Блискиот Исток создава дополнителни инфлациски притисоци и дека одлуката за зголемување на каматите е дел од сценаријата со кои се проценува влијанието на енергетските шокови врз економијата на еврозоната.

Според новите проекции на експертите на ЕЦБ, вкупната инфлација во еврозоната во просек ќе достигне три проценти во 2026 година, 2,3 проценти во 2027 година и два проценти во 2028 година. Основната инфлација, без енергија и храна, се очекува да изнесува 2,5 проценти во 2026 и 2027 година и 2,2 проценти во 2028 година.

Во однос на мартовските прогнози, инфлациските очекувања за 2026 и 2027 година се ревидирани нагоре поради повисоките цени на енергијата, кои се очекува да влијаат и врз цените на храната, стоките и услугите.

Истовремено, ЕЦБ ги намали прогнозите за економскиот раст. Според новите процени, економијата на еврозоната ќе порасне за 0,8 проценти во 2026 година, 1,2 проценти во 2027 година и 1,5 проценти во 2028 година. Намалените прогнози се резултат на посилното влијание на конфликтот врз пазарите на суровини, реалните приходи и довербата на потрошувачите и компаниите.

Претседателката на ЕЦБ, Кристин Лагард, изјави дека изгледите остануваат неизвесни и дека постојат ризици и за повисока инфлација и за послаб економски раст.

„Не се обврзуваме однапред на одредена патека на каматните стапки“, порача Лагард на прес-конференцијата по седницата на Управниот совет.

Халкбанк АД Скопје ја промовира можноста за целосно дигитално аплицирање за кредит преку своето електронско банкарство, насочувајќи ја кампањата кон граѓаните кои планираат летни патувања и други лични проекти.

Под мотото „За патувањето што долго го чекаш, а летово конечно доаѓа на ред“, од банката истакнуваат дека онлајн кредитот овозможува брза и едноставна апликација без посета на експозитура, со што плановите на клиентите можат побрзо да станат реалност.

Според информациите објавени од Халкбанк, кредитот може да се користи за различни лични потреби, а процесот на аплицирање е целосно дигитализиран.

Онлајн кредитот нуди можност за износ до 1,5 милиони денари и рок на отплата до 120 месеци. Од банката посочуваат дека не се наплаќа провизија за обработка на кредитот, ниту за предвремена отплата, а апликацијата е без дополнителни трошоци.

Услугата е достапна преку електронското банкарство на Халкбанк, овозможувајќи им на клиентите брзо и едноставно да поднесат барање за кредит од каде било и во кое било време.