Ревидирана е временската серија на податоци за платниот биланс за периодот од 2003 година до јуни 2026 година, при што ревизијата опфаќа одредени компоненти на тековната и капиталната сметка. Новиот пристап овозможува попрецизна класификација на трансакциите и поинаква распределба на дел од приливите што претходно биле евидентирани како секундарен доход.

Суштината на ревизијата е во новиот метод на процена, заснован на анкетни истражувања, експертски оценки и нови, посеопфатни извори на податоци. Како резултат на тоа, нето-менувачкото работење, кое претходно било евидентирано во рамките на секундарниот доход, сега се распределува во повеќе категории – лични трансфери, односно дознаки, надомест на вработени, капитални трансфери, услуги поврзани со патување и извоз на стоки.

Најголема промена е забележана кај личните трансфери, односно дознаките, кои според ревидираните податоци се повисоки за 8,7 процентни поени од БДП.

Повисоки се и приливите од капитални трансфери, за 0,6 процентни поени од БДП, додека приливите по основ на надомест на вработени се зголемени за 0,5 процентни поени од БДП.

Ревизијата носи промени и кај услугите поврзани со патувањето. Според новата методологија, суфицитот кај патувањето е понизок во просек за 1,5 процентни поени од БДП во однос на претходно објавените податоци.

Кај стоковната размена, ревидираните податоци покажуваат повисока вредност на извозот, што резултира со намалување на дефицитот во трговската размена во просек за 3,1 процентни поени од БДП.

Како резултат на прераспределбата на одделните компоненти, ревидираната временска серија покажува и умерено зголемување на дефицитот на тековната сметка, во просек за 0,6 процентни поени од БДП.

Ревизијата се однесува на временската серија од 2003 година до јуни 2026 година и има за цел подобра класификација на трансакциите во платниот биланс преку користење поширок сет извори и унапредена методологија за процена.

Со новиот пристап, дел од приливите што досега биле групирани во една поширока категорија се распределуваат според нивната економска природа, со што се добива подетална слика за изворите и структурата на прекуграничните текови.

Кредитната активност на банките во август годинава забележала раст од 0,7 отсто на месечно и 13,6 отсто на годишно ниво, покажуваат најновите податоци на Народната банка. Раст е забележан и кај кредитите на домаќинствата и кај корпоративниот сектор.

Вкупните депозити, пак, во август се зголемиле за 1,6 отсто во однос на претходниот месец, додека на годишна основа растот изнесува 9 отсто. Зголемување е регистрирано и кај депозитите на домаќинствата и кај компаниите.

Кај корпоративниот сектор, депозитите пораснале за 6,2 отсто на месечно и 6,1 отсто на годишно ниво. Кредитите на компаниите, пак, во август се зголемиле за 0,6 отсто на месечно ниво, додека годишниот раст забрзал на 15,1 отсто. Зголемувањето целосно произлегува од кредитирањето во домашна валута.

Депозитите на населението во август се намалиле за 0,4 отсто во однос на јули, но на годишна основа се повисоки за 10,2 отсто. Орочените депозити на домаќинствата пораснале за 0,6 отсто месечно и за 5,8 отсто годишно.

Кредитите на населението продолжиле да растат, и тоа за 0,7 отсто на месечно и 12,3 отсто на годишно ниво. Потрошувачките кредити бележат годишен раст од 12,2 отсто, а станбените кредити од 16,2 отсто.

Истовремено, паричната маса во август се зголемила за 1,3 отсто на месечно и за 8,2 отсто на годишно ниво.

Европската централна банка и националните централни банки во Европската Унија предлагаат да се укине обврската издавачите на стејблкоини да чуваат минимален дел од своите резерви како депозити во банки, објави Reuters.

Во моментов, според правилата на MiCA, издавачите на стејблкоини треба да чуваат 30 отсто од резервите како банкарски депозити, а кај поголемите издавачи тој удел изнесува 60 отсто. Централните банки предлагаат ова правило да се замени со барање одреден минимален дел од резервите да биде вложен во средства што доспеваат во рок од еден до пет работни дена.

Според Европскиот систем на централни банки, чувањето на резервите како банкарски депозити може да ја промени структурата на финансирање на банките, бидејќи постабилните депозити на граѓаните би можеле да бидат заменети со депозити од издавачи на стејблкоини, кои се почувствителни на пазарни движења.

Европските монетарни власти предупредуваат и на ризиците поврзани со таканаречените модели на повеќекратно издавање на стејблкоини, кај кои токените издадени во ЕУ се третираат како заменливи со оние издадени надвор од Унијата. Според нив, ваквите модели можат да создадат ризици за финансиската стабилност.

Централните банки дополнително укажале дека европските регулатори се соочуваат со значителни предизвици во спроведувањето на правилата за крипто-секторот, бидејќи дел од компаниите што не се усогласени со прописите и натаму имаат пристап до клиенти во ЕУ.