Германската Commerzbank најави укинување на 3.000 работни места како дел од стратегијата со која сака да ја зголеми профитабилноста и да се одбрани од обидот за преземање од страна на италијанската UniCredit. Банката сака да им покаже на акционерите дека може самостојно да создаде поголема вредност, без продажба на конкурентот.

Според најавите, UniCredit проценува дека вредноста на германската банка изнесува околу 37 милијарди евра, додека раководството на Commerzbank смета дека понудата е прениска и дека стратегијата на италијанската банка носи ризици.

Во исто време, германската банка објави подобри резултати од очекуваните. Нето-добивката во првиот квартал пораснала за 9,4 проценти, на 913 милиони евра, во споредба со 834 милиони евра една година претходно. Банката ги зголеми и финансиските цели до 2028 година, но најави и околу 450 милиони евра трошоци за реструктурирање поради отпуштањата.

Аналитичарите предупредуваат дека отпуштањата во банкарскиот сектор не се само мерка за кратење трошоци, туку можат да влијаат и врз квалитетот на услугите, особено ако се намалуваат работни места поврзани со клиентите и локалните филијали. Commerzbank има важна улога во финансирањето на германските мали и средни компании, па секое слабеење на мрежата може да влијае и врз деловните односи со клиентите.

Од германскиот синдикат ver.di велат дека најголемиот дел од кратењата се очекува да бидат во централата и секторите, каде што има поголеми можности за примена на вештачка интелигенција. Портпаролката Даниела Милутин изјави дека засега не се очекува затворање филијали или намалување на услугите за клиентите.

Сепак, синдикатот предупредува дека доколку UniCredit ја преземе контролата врз банката, постои ризик од дополнителни отпуштања и затворање филијали, особено во регионите каде што мрежите на двете банки се преклопуваат.

Извор: Finansije.hr

Комерцијална банка во соработка со Skopje City Mall нуди подарок-картички што претставуваат практично решение за сите што сакаат да изберат подарок за своите најблиски без ризик да погрешат во изборот.

Подарок-картичките се достапни во износи од 1.000, 3.000 и 5.000 денари и можат да се користат во голем број продажни места во Skopje City Mall. Тие се наменети за различни пригоди, како родендени, свадби, новогодишни празници и други свечени моменти.

Од Банката посочуваат дека картичките се со модерен дизајн, доаѓаат во посебно пакување и овозможуваат додавање уникатна посвета, со што подарокот добива дополнителна лична вредност.

Постапката за добивање е едноставна – заинтересираните треба да посетат експозитура на Комерцијална банка и да го изберат посакуваниот износ. Картичките се издаваат веднаш и без потреба од пополнување формулари.

Подарок-картичката не е персонализирана и може да ја користи секое лице што ја поседува. Средствата на картичката може да се трошат повеќекратно во продажните места во Skopje City Mall што се дел од програмата, во рок од шест месеци од денот на купувањето.

Корисниците можат во секое време да ја проверат состојбата на картичката преку интернет-страницата на Банката или на шалтерите на Комерцијална банка.

НЛБ, најголемата банка од Словенија, објави меморандум за доброволна јавна понуда за преземање на австриската Адико Банк АГ, со што официјално започна процесот на една од позначајните банкарски аквизиции во регионот.

Според објавените информации, НЛБ банка нуди 29 евра во готовина по акција, а понудата се однесува на сите акции на Адико банка. Словенечката банка има цел да обезбеди најмалку 75 отсто од гласачките права, што би ѝ овозможило целосна контрола врз банката.

Доколку НЛБ успее да ги преземе сите 19,5 милиони акции на Адико банка по понудената цена, вредноста на трансакцијата би достигнала околу 565 милиони евра.

Периодот за прифаќање на понудата трае до 22 јули 2026 година, со можност за продолжување до крајот на октомври доколку бидат исполнети одредени услови.

НЛБ банка и претходно го најавуваше интересот за преземање на Адико банка, оценувајќи ја како стратешки важна аквизиција поради нејзиниот фокус на работење со население, како и со мали и средни претпријатија.

Потенцијалното преземање дополнително би ја зајакнало позицијата на НЛБ групацијата во Југоисточна Европа, каде што веќе има значително присуство преку мрежа на банки и финансиски институции.

Адико банка е создадена од поранешниот систем на Хипо Алпе-Адриа банка, а во последните години е насочена кон дигитално банкарство и кредитирање на граѓани и компании.

Објавувањето на меморандумот претставува формален чекор во процесот на преземање, кој сè уште треба да помине низ регулаторни процедури и да добие одобренија од надлежните институции.

Во меѓувреме, и Рајфајзен банка интернационал, најави намера да поднесе доброволна јавна понуда за преземање на сите издадени акции на Адико банка кои не се во сопственост на самата банка.