Халкбанк АД Скопје ја промовира услугата Smart Cash, која им овозможува на корисниците да подигнат готовина од банкомат и кога ја немаат платежната картичка при рака.

Со оваа услуга, корисникот може да подигне пари од банкомат без употреба на физичка картичка, но и да испрати код за подигнување готовина на друго лице.

Од Халкбанк посочуваат дека Smart Cash е наменета да овозможи побрз, поедноставен и попрактичен пристап до готовина преку банкоматите на банката.

Повеќе информации за услугата и начинот на нејзино користење се достапни на официјалната веб-страница на Халкбанк.

Европската централна банка се очекува денеска да ги задржи каматните стапки непроменети, но да остави отворена можност за ново зголемување во септември, поради повторниот раст на цените на енергенсите и ризикот од дополнителен инфлациски притисок, објави Ројтерс.

ЕЦБ ги зголеми каматите во јуни и најави дека може да следуваат нови чекори. Сепак, поволните податоци за цените, платите, економската активност и инфлациските очекувања ја намалија потребата од брзо ново затегнување на монетарната политика.

Дополнителен притисок создава растот на цената на нафтата над 95 долари за барел, во услови на продолжување на конфликтот на Блискиот Исток. Тоа би можело да ја натера централната банка на еврозоната повторно да интервенира до есен, со цел енергетскиот шок да не предизвика поширок раст на цените.

Финансиските пазари во моментов очекуваат речиси три дополнителни зголемувања на каматите, при што првиот чекор целосно се очекува најдоцна до октомври, а вториот до февруари следната година. Сепак, повеќето економисти анкетирани од Ројтерс сметаат дека на еврозоната ќе ѝ биде потребно помало затегнување.

Инфлацијата во 21-члената еврозона во наредните месеци би можела да се движи околу три отсто, што е над целта на ЕЦБ од два отсто.

Претседателката на ЕЦБ, Кристин Лагард, се очекува да порача дека ризиците за ценовната стабилност и натаму се присутни, но истовремено да избегне дополнително зајакнување на пазарните очекувања за серија нови зголемувања.

Причината поради која ЕЦБ може да почека е тоа што засега не се појавиле очекуваните секундарни ефекти од растот на цените на енергијата. Растот на платите продолжува да забавува, пазарот на труд е релативно слаб, особено во Германија, а компаниите очекуваат дополнително намалување на притисоците за зголемување на платите.

Сепак, креаторите на монетарната политика предупредуваат дека овие ефекти може да се појават со задоцнување. Ризик претставуваат и високите температури во Европа, кои може да предизвикаат штети врз земјоделските култури и повторно зголемување на цените на храната.

Одлуката на ЕЦБ треба да биде објавена во 14:15 часот по средноевропско време, додека прес-конференцијата на Лагард е закажана половина час подоцна.

Словенечката Нова Љубљанска банка, НЛБ, соопшти дека до 21 јули обезбедила обврзувачки прифаќања за најмалку 28,9 отсто од акционерскиот капитал на „Адико банка“ во рамки на својата понуда за преземање.

НЛБ се обидува да ја преземе контролата врз банката, која е насочена кон пазарите во Југоисточна Европа, во услови на конкурентска трка со „Рајфајзен банк интернешнл“.