Најбогатиот човек во светот, Илон Маск, смета дека штедењето за пензија наскоро ќе стане бесмислено, бидејќи со развојот на вештачката интелигенција ќе настане општо изобилство.

Извршниот директор на Tesla и SpaceX важи за голем оптимист кога станува збор за вештачката интелигенција. Според него, луѓето не треба да се оптоваруваат со создавање заштеди за далечната иднина, што е спротивно на советите на многу финансиски експерти.

„Не грижете се за оставање пари на страна за пензија за 10 или 20 години. Тоа нема да биде важно“, изјави Маск во подкастот Moonshots with Peter Diamandis.

Неговиот контроверзен став произлегува од визијата за свет трансформиран од брзиот напредок на вештачката интелигенција, роботиката и енергетиката. Маск очекува дека до 2030 година вештачката интелигенција ќе ја надмине интелигенцијата на сите луѓе заедно, а бројот на хуманоидни роботи ќе го надмине бројот на луѓе на Земјата. Според него, AI ќе ги замени луѓето во традиционалните професии, особено во канцелариските и интелектуалните занимања.

„Сè освен физичкото обликување на атомите, вештачката интелигенција веројатно веќе може да го извршува – половина или повеќе од половина од работните места. Таквиот напредок може да доведе до огромно зголемување на продуктивноста, далеку над она што луѓето можат да го замислат како изобилство“, оцени Маск.

Според неговите зборови, наместо универзален основен доход, иднината би можела да донесе систем во кој „секој може да има што и да посака“. Во такви околности, платата, штедењето и животниот стандард нема да имаат исто значење како денес.

Тој истакна дека во следните пет години, благодарение на вештачката интелигенција, дури и луѓето без заштеди би можеле да имаат здравствена грижа подобра од сегашната. Исто така, можно е да исчезнат ограничувањата во достапноста на производи, услуги и образование.

Ставовите на Маск се надоврзуваат на неговите претходни проценки дека во наредните 10 до 20 години вештачката интелигенција и хуманоидните роботи ќе извршуваат поголем дел од работата, поради што верува дека парите би можеле да станат небитни.

Во таков свет, работата би станала прашање на личен избор и слободно време, слично како денешното занимавање со спорт или играње видео-игри.

„Ако сакате да работите, тоа е исто како кога можете да отидете во продавница и да купите зеленчук или да го одгледувате во сопствената градина. Потешко е да го одгледувате сами, но некои луѓе го прават тоа затоа што уживаат во тоа“, изјави Маск на Американско-саудискиот инвестициски форум.

Сепак, тој предупредува и на можните негативни последици од општество во кое луѓето нема да мора да заработуваат за живот. Како што посочи, таквата реалност може да доведе до длабока криза на смислата, пренесува Fortune.

Извор: Bankar.me

Министерството за финансии на Северна Македонија на 5 мај ќе им понуди на инвеститорите државни хартии од вредност во вкупен износ од 1,9 милијарди денари, што е приближно 31 милион евра, покажуваат податоци на Народната банка.

Станува збор за редовна аукција на државни записи и обврзници, преку која државата обезбедува средства за финансирање на буџетските потреби.

Интересот за ваквите инструменти традиционално доаѓа од домашни институционални инвеститори, како банки, пензиски и инвестициски фондови, кои ги користат како сигурна форма на вложување.

Во време кога дигиталните решенија сè повеќе го обликуваат начинот на кој управуваме со пари, „Iute Pay“ го отвора својот прв студентски иновациски предизвик во Македонија – иницијатива што има за цел да им даде глас на младите во креирањето на иднината на плаќањата.

Преку овој предизвик, студентите добиваат можност не само да развијат креативни идеи, туку и да ги претворат во концепти со реален потенцијал за примена. 

Фокусот е ставен на тоа како дигиталниот паричник „Iute Pay“ може да стане дел од секојдневието –прилагодено на потребите на новата генерација корисници.

Предизвикот е отворен за тимови од студенти кои ќе треба да креираат концепт за позиционирање и користење на „Iute Pay“, да ја раскажат својата идеја преку кратко видео од 60 секунди и да ја дополнат со едноставна презентација. 

Процесот е дизајниран да биде динамичен и достапен, оставајќи простор за креативност, иновативно размислување и различни пристапи – од маркетинг стратегии, до продукт идеи.

Најдобрите концепти ќе бидат избрани преку јавно гласање, што дополнително ја отвора можноста за видливост и вклучување на пошироката јавност. 

Победничките тимови ќе освојат награди до 3.000 евра, но уште поважно – ќе добијат шанса нивната идеја да биде разгледана како дел од реални кампањи и развојни процеси.

„Веруваме дека најдобрите идеи доаѓаат кога ќе им се даде простор на младите да размислуваат слободно и храбро. Овој предизвик е покана тие да не ја чекаат иднината, туку сами да ја создадат“, вели Александар Петковски, Извршен Директор на „Iute Pay“.

Овој повик и студентски предизвик е реализиран во партнерство со Факултетот за електротехника и информациски технологии при Универзитет „Св. Кирил и Методиј“(ФЕИТ), кој ја препозна вредноста на оваа иницијатива, преку  активна вклученост на студентите во развојот на платформата за јавно гласање. Нивниот придонес овозможи функционално и современо дигитално искуство, преку кое најдобрите идеи ќе бидат избрани токму од публиката.

Иницијативата има за цел да поттикне нова генерација на креативци, иноватори и идни финтек професионалци, кои ќе размислуваат практично, дигитално и со фокус на корисничко искуство. Воедно, претставува и чекор напред кон градење подлабока врска помеѓу индустријата и младите таленти, отворајќи простор за нивно активно учество во креирање на современи финансиски решенија.

Пријавувањето на тимови е отворено до 18. мај на платформата futurefinance.iute.mk.

Повеќе за отворениот повик, правилата, условите и целосниот бриф се достапни тука.