Извршниот одбор на Народна банка на Република Северна Македонија издаде претходна согласност за именување на г-ѓа Димитра Доима за член на Надзорниот одбор на Стопанска банка АД – Скопје, со мандат од четири години. Ова назначување ја потврдува намерата на Банката да воведе врвна меѓународна експертиза во својот Надзорен орган.

Димитра Доима е активен член на NBG Групацијата уште од септември 2019 година, кога се приклучи како Директор за финансиско планирање и управување со перформансите. Од октомври 2023 година е назначена за Заменик генерален директор, што ја одразува нејзината зголемена одговорност и клучна улога во финансиското управување на групацијата.

Образованието што го стекнала на Универзитетот во Атина, каде дипломирала по економија и бизнис, како и на Универзитетот во Кардиф, кадешто се стекнала со магистерскиот степен и докторска титула во меѓународни финансии и банкарство, ѝ обезбедува солидна теоретска основа и глобален пристап кон финансиските предизвици. Овие академски достигнувања не само што претставуваат силен темел за развој на нејзината професионална кариера, туку и овозможуваат аналитички пристап, критичко размислување и стратешка визија во доменот на банкарството и финансиите.

Покрај академската надградба, нејзината професионална траекторија вклучува искуство во повеќе реномирани финансиски институции каде што активно придонесувала во развојот на модерни банкарски производи, управување со ризици и дефинирање на регулаторни политики. Комбинацијата од домашно и меѓународно искуство ѝ овозможува длабоко разбирање на комплексноста на финансиските пазари, како и адаптивност кон динамичните глобални трендови.

Со доаѓањето на Доима во Надзорниот одбор, Банката добива значителна надворешна перспектива и искуство во областа на финансиското планирање, ризиците и стратешкото управување. Позицијата ѝ беше утврдена како независен член, што ја подцртува нејзината улога во обезбедување на транспарентност и објективност уште на највисоко ниво во надзорот.

Надзорниот одбор е составен од седум членови именувани од Собранието на акционери со мандат од четири години со право на реизбор. Најмалку ¼ од членовите на Надзорниот одбор се независни членови.

1. Маринис Стратопулос – Претседател на Надзорен одбор на СБ;
2. Сашо Ќосев – Заменик Претседател, Независен член на Надзорен одбор на СБ;
3. Владимир Филиповски – Независен член на Надзорен одбор на СБ;
4. Георгиос Тагарис – член на Надзорен одбор на СБ;
5. Георгиа Толиа – член на Надзорен одбор на СБ;
6. Панајотис Карандреас – член на Надзорен одбор на СБ.

Со назначувањето на Димитра Доима, Стопанска банка АД – Скопје потврдува дека продолжува со унапредување на управувачките механизми преку интеграција на високообразовани и професионално афирмирани кадри, подготвени да ги засилат капацитетите на Банката во период на зголемена регулаторна и финансиска динамика.

ТТК Банка АД Скопје доби нов независен член во својот Надзорен одбор во името на Слаѓан Михајловски, Главен извршен директор на „Инфините Солутионс“. Неговото назначување е со мандат од четири години, а беше предложен од страна на основачот и најголем акционер на ТТК Банка, компанијата „Тетекс“ од Тетово.

Михајловски е дипломиран инженер на ФЕИТ – насока ИКТ, со повеќе од две децении искуство во ИТ индустријата. Тој е претседател на Комитетот за софтвер и ИКТ услуги при стопанската комора МАСИТ, а активно учествува и како советник на проект на Светската банка за дигитализација на здравствениот систем во Северна Македонија.

Иако не поседува акции во ТТК Банка, Михајловски има 30% сопственички удел во „Инфините Солутионс“, компанија која се занимава со развој на напредни ИТ решенија.

Актуелниот состав на Надзорниот одбор на ТТК Банка го сочинуваат:

• Бобан Гоговски – Претседател на Надзорен одбор;
• Владо Камбовски – Заменик-претседател на Надзорен одбор и независен член;
• Драгица Јовановска – Член на Надзорен одбор;
• Златко Черепналкоски – Член на Надзорен одбор;
• Евгенија Трпкоска – Член на Надзорен одбор;
• Михаил Петковски – Независен член на Надзорен одбор.

Со новото надополнување, Надзорниот одбор на ТТК Банка добива дополнителна експертиза од областа на информациските технологии, што е особено значајно во услови на интензивна дигитална трансформација во банкарскиот сектор.

Трите најголеми банки во земјава наскоро ќе објават нови тарифници со намалени надоместоци за извршување платни услуги − најави гувернерот на Народната банка, д-р Трајко Славески, во интервју за емисијата „Трилинг“. Оваа позитивна најава следи по интензивниот дијалог што Народната банка го води со банкарскиот сектор за унапредување на пристапот на граѓаните до поефикасни и до подостапни услуги.

Како дел од заложбите за зголемување на ефикасноста во платниот промет, Народната банка неодамна направи важна промена во моделот на работење на системот за порамнување на меѓубанкарските плаќања – МИПС. Со воведувањето нови правила и со намалувањето на трошоците за користење на овој систем, банките ќе остваруваат значителни заштеди.

„Нашата интервенција во МИПС ослободи значителен износ на средства кај банките и го намали нивниот оперативен трошок. Со ова се создаде простор за пренесување на дел од тие заштеди кон клиентите, преку намалување на надоместоците – нешто што веќе го гледаме како резултат“, изјави гувернерот Славески.

Тој посочи дека Народната банка, иако е регулатор, води постојан дијалог со банкарскиот сектор и делува и како партнер, со цел да се унапредат услугите и да се зголеми задоволството кај корисниците.

„Разговараме со банките да одиме и чекор подалеку – кон разумна и општествено одговорна политика на тарифи. Тоа не е само во интерес на клиентите, туку и на банките, коишто преку вакви потези ги зајакнуваат сопствениот углед и довербата кај јавноста“, изјави гувернерот Славески.

Народната банка и натаму ќе ја поттикнува конкуренцијата и модернизацијата на платниот промет, а со либерализацијата на пазарот се очекува уште поголем притисок за намалување на трошоците за граѓаните и за деловната заедница. 

„Позитивните сигнали што веќе ги добиваме се резултат на нашиот пристап заснован на аргументи и партнерски дијалог со банкарскиот сектор. Очекуваме дека наскоро и останатите банки ќе ги следат овие примери“, додаде гувернерот.

Народната банка и во иднина ќе биде посветена на создавањето регулативна рамка којашто ќе поттикне развивање на квалитетни и ефикасни финансиски услуги достапни за сите граѓани и компании во земјава.