Халкбанк АД Скопје доби нова докапитализација во вредност од 40 милиони евра од матичната банка Halkbankası AŞ, со што дополнително ја зајакнува својата позиција на македонскиот банкарски пазар.

Со најновото зголемување на капиталот, вкупната актива на Халкбанк АД Скопје достигна 2,15 милијарди евра, додека вкупниот капитал на Банката сега изнесува 412 милиони евра.

Од Банката посочуваат дека ова е уште една потврда за континуираната поддршка од матичната банка, која и во изминатите години инвестираше во развојот и капиталното јакнење на Халкбанк во земјава.

Новата докапитализација, според Банката, ќе овозможи поголем кредитен потенцијал, поддршка за компаниите и граѓаните, како и натамошни вложувања во дигитални и финтек решенија.

„Оваа докапитализација е потврда дека Халкбанк не е само финансиска институција, туку долгорочен партнер на македонската економија. Со поддршка од нашиот силен сопственик, продолжуваме да градиме банка која е синоним за доверба и напредок“, велат од Банката.

Оттаму додаваат дека со засилен капитал и стабилна актива, Банката ќе продолжи да финансира развојни проекти и да обезбедува поддршка за домашната економија во услови на глобални економски предизвици.

Халкбанк АД Скопје нуди кредитна линија за поддршка на одржливи земјоделски активности, наменета за микро, мали и средни претпријатија, како и за индивидуални земјоделци и трговци поединци.

Кредитната линија е наменета за финансирање на работен капитал и инвестициони потреби поврзани со одржливо земјоделство, согласно квалификуваните активности утврдени во листата за одржлива земјоделска активност.

Износот на кредитите се движи од 5.000 до 250.000 евра, со рок на отплата до пет години. Корисниците ќе можат да изберат месечни, квартални или полугодишни ануитети.

Банката нуди варијабилна каматна стапка од 5,5 проценти за кредити со рок до 36 месеци, односно 5,75 проценти за кредити со рок над 36 месеци.

Надоместокот за обработка изнесува од 1,3 до 1,5 проценти.

Како дополнителен бенефит, корисниците ќе имаат поддршка преку организирани работилници и обуки за фармери, а достапна е и грант-компонента за одржливо земјоделство до 1.000 евра, до исцрпување на предвидениот буџет.

Од Халкбанк АД Скопје информираат дека заинтересираните можат да добијат повеќе информации во најблиската филијала или експозитура на банката.

Дваесет и пет европски банки, меѓу кои „ABN AMRO“, „Sabadell“, „Rabobank“, „Bankinter“, „Bank of Ireland“, „Handelsbanken“ и „Nordea“, се приклучија на европски конзорциум кој работи на лансирање на криптовалута поврзана со еврото.

Конзорциумот, основан минатата година од компанијата „Qivalis“, сега брои 37 финансиски институции од 15 земји, вклучувајќи и големи европски банки како „ING“, „BNP Paribas“ и „BBVA“.

Проектот има за цел да понуди европска алтернатива на постојните stablecoin решенија во корелација со американскиот долар и да ја намали зависноста од американските системи за дигитални плаќања, истовремено отворајќи простор за развој на блокчејн-базирани финансиски инструменти, вклучително и токенизација на средства како обврзници и недвижности.

И покрај растечкиот интерес, Европската централна банка останува претпазлива во однос на потенцијалните придобивки од ваквите иницијативи.

Stablecoin е вид криптовалута поврзана со традиционална валута (фиат), која најчесто се користи во тргување со дигитални средства. На глобалниот пазар доминираат американските издавачи „Tether“ и „Circle“, кои заедно имаат стотици милијарди долари во оптек.

Во Европа досега побарувачката за stablecoin решенија поврзани со еврото останува ограничена. Крипто-одделот на „Société Générale“ лансираше евро stablecoin во 2023 година, но неговата циркулација засега останува релативно мала.

Фото: ledgerinsights.com