КБ Прво пензиско друштво АД Скопје ја прошири својата продажна мрежа со вклучување на ТТК Банка АД Скопје како нов продажен канал. Со ова партнерство се отвораат нови можности за поголема достапност на пензиските услуги и унапредување на пазарното присуство на Друштвото.

„Нашата цел е да им овозможиме на граѓаните сигурност и доверба во нивната иднина. Со проширувањето на продажната мрежа преку ТТК Банка АД Скопје, им нудиме поголема достапност и транспарентност“ – изјави Иван Стојановиќ, втор генерален директор на КБ Прво пензиско друштво АД Скопје.

Од ТТК Банка АД Скопје м-р Димитри Трповски, член на Управниот одбор и генерален директор за комерцијално банкарство изјави: „Веруваме дека оваа соработка ќе создаде додадена вредност за нашите клиенти и ќе придонесе за посигурно и поодржливо финансиско планирање на иднината“.

По тој повод, овој месец се одржа првата заедничка работна средба под мотото „Вашиот потенцијал. Нашата поддршка. Заеднички успех!“, на која беа поставени темелите за стабилна, долгорочна и стратешка соработка меѓу двете институции.

Вклучувањето на ТТК Банка АД Скопје како нов продажен канал претставува значаен чекор кон зајакнување и дисперзирање на продажната мрежа на КБ Прво, со цел поблиска комуникација со членовите и поефикасна поддршка во процесот на донесување информирани финансиски одлуки.

Развојот на широка и достапна продажна мрежа претставува важен придонес кон реформираниот пензиски систем, подигнување на пензиската свесност и едукација на населението за значењето на навременото и одговорно финансиско планирање.

КБ Прво пензиско друштво АД Скопје верува дека ова партнерство ќе создаде додадена вредност за сите засегнати страни и ќе претставува цврста основа за континуиран развој.

КБ Прво пензиско друштво АД Скопје, веќе 20 години е лидер на пазарот на задолжителни и доброволни пензиски фондови на македонскиот пазар на пензиско осигурување. Со повеќе од две децении искуство, доверба од 305 280 членови во задолжителниот и доброволниот пензиски фонд (Извор: www.mapas.mk – 31.01.2026 година) и континуирани инвестиции во едукација и развој, Друштвото останува посветено на обезбедување сигурна иднина и одржлив пензиски систем за сите граѓани.

Супервизор на капитално финансирано пензиско осигурување е Агенцијата за супервизија на капитално финансирано пензиско осигурување (МАПАС) www.mapas.mk тел.  02/ 32 24 229

Претседателката на Европската централна банка (ЕЦБ), Кристин Лагард, ја разгледува можноста да ја напушти функцијата пред истекот на нејзиниот мандат во октомври 2027 година, со цел да овозможи сегашниот француски претседател Емануел Макрон да има влијание во изборот на нејзиниот наследник, објави „Фајненшл тајмс“.

Според наводите, Лагард сè уште нема донесено конечна одлука за датумот на евентуалното заминување, но постои интерес клучна улога во изборот на новиот претседател на ЕЦБ да имаат Макрон и германскиот канцелар Фридрих Мерц.

Стравувањата дека крајната десница би можела да победи на француските претседателски избори во 2027 година дополнително ја засилуваат неизвесноста околу процесот.

Од ЕЦБ официјално соопштија дека не е донесена никаква одлука, нагласувајќи дека Лагард е целосно фокусирана на својата мисија и тековните обврски.

Реакцијата на пазарите засега е умерена, приносите на обврзниците и курсот на еврото останаа речиси непроменети, што укажува дека инвеститорите не очекуваат ваквиот развој да донесе значителни промени во монетарната политика.

Македонската банкарска асоцијација ја информира јавноста дека согласно Законот за платежни услуги и платни системи, со кој во националното законодавство е транспонирана Директивата (ЕУ) 2015/2366 за платежни услуги на внатрешниот пазар (PSD2), од 1 март 2026 година започнува примената на засилена автентикација на корисниците (Strong Customer Authentication – SCA) при извршување одредени платежни трансакции.

Засилената автентикација ќе се применува кај платежни трансакции иницирани на далечина, и тоа:

• плаќања со платежни картички при електронска трговија, како и
• кредитни трансфери иницирани преку интернет-банкарство или мобилни апликации на банките.

Воведувањето на засилената автентикација има за цел подигнување на нивото на безбедност на електронските плаќања, намалување на ризикот од неовластени трансакции и подобра заштита на корисниците на платежни услуги, при што електронските и дигиталните плаќања ќе продолжат да се извршуваат непречено, со дополнителен безбедносен чекор.

Засилената автентикација се заснова на користење на најмалку два од следните три меѓусебно независни елементи:

1. Елемент на знаење – нешто што го знае корисникот (на пример лозинка или ПИН),
2. Елемент на поседување – нешто што го поседува корисникот (на пример мобилен уред, токен или платежна картичка),
3. Елемент на својство – нешто што е својствено за корисникот (биометриски податоци, како отпечаток од прст или препознавање лице).

Во таа насока, досегашните начини на потврда на трансакции, како што се еднократни кодови доставени преку СМС или електронска пошта, кои се користат во рамки на постојните 3-D Secure решенија, ќе бидат заменети или надградени со посовремени и побезбедни механизми, во согласност со барањата на засилената автентикација.

Секоја банка, согласно законската рамка и сопствените технички и организациски можности, самостојно ќе го дефинира моделот на засилена автентикација, односно комбинацијата на елементи што ќе ги применува, поради што начинот на автентикација и корисничкото искуство може да се разликуваат од банка до банка.

Во рамки на процесот на воведување на засилената автентикација, банките ќе пристапат кон информирање и едукација на своите клиенти за применуваните решенија, постапките за автентикација и практичните чекори при извршување на платежни трансакции, преку сопствените комуникациски канали.

Примената на засилената автентикација претставува значаен чекор во усогласувањето на платниот систем со европската регулаторна рамка, придонесувајќи кон зголемена сигурност, доверба и заштита на корисниците при користење на современите електронски платежни услуги.

Македонската банкарска асоцијација, заедно со банките-членки, останува посветена на унапредување на безбедноста и стабилноста на платниот промет, како и на поддршка на процесите на дигитализација и модернизација на платежните услуги.