Најголемите американски банки ги надминаа очекувањата на Волстрит во резултатите за вториот квартал, поттикнати од силниот раст на приходите од инвестициско банкарство и тргување со акции.

Меѓу банките што денеска ги објавија своите финансиски извештаи се JPMorgan Chase, Bank of America, Goldman Sachs, Wells Fargo и Citigroup, а речиси сите прикажаа подобри резултати од очекуваните.

JPMorgan Chase оствари приходи од 58,02 милијарди долари, над прогнозите од 50,19 милијарди долари, додека добивката по акција достигна 6,14 долари. Главниот извршен директор Џејми Дајмон изјави дека сите главни сегменти од работењето забележале рекордни приходи, додавајќи дека американската економија покажува значителна отпорност, поддржана од инвестициите во вештачка интелигенција, фискалните мерки и посилното вработување.

Bank of America исто така ги надмина очекувањата со приходи од 31,7 милијарди долари и добивка од 1,21 долари по акција. Извршниот директор Брајан Моjнихан оцени дека станува збор за едно од најсилните тримесечја во историјата на банката, истакнувајќи дека сите деловни сегменти забележале двоцифрен раст на нето-добивката.

Goldman Sachs објави особено силни резултати, со приходи од 20,34 милијарди долари и добивка по акција од 20,98 долари. Приходите од тргување со акции пораснале за 72 проценти, а инвестициското банкарство забележало раст од 55 проценти, поттикнат од голем број иницијални јавни понуди на акции и активности на пазарот на спојувања и преземања.

Citigroup ја пријави највисоката квартална заработка во последната деценија. Банката оствари приходи од 24,77 милијарди долари и добивка по акција од 3,15 долари, додека нето-добивката достигна 5,8 милијарди долари. Главната извршна директорка Џејн Фрејзер најави зголемување на дивидендата за 12 проценти и почеток на програма за откуп на акции во вредност од 30 милијарди долари.

Позитивни резултати објави и Wells Fargo, со добивка од 2 долари по акција и приходи од 22,62 милијарди долари. Извршниот директор Чарли Шарф оцени дека банката има корист од силната американска економија и подобрените услови за работење.

И покрај силните финансиски резултати, дел од банкарските акции забележаа пад во претпазарното тргување, бидејќи инвеститорите внимателно ги следат прогнозите на раководствата за остатокот од годината, особено во услови на геополитички тензии и неизвесност околу инфлацијата и каматните стапки.

Извор: CNBC

Годишната инфлација во Србија во јуни се намали на 2,7 отсто, од 3,5 проценти во мај, покажуваат податоците на српскиот завод за статистика.

Забавувањето главно се должи на падот на цените на храната и безалкохолните пијалаци, кои во јуни биле пониски за 3,7 отсто во споредба со истиот месец минатата година. Оваа категорија има најголемо учество во потрошувачката кошница.

Истовремено, трошоците за домување, вода, електрична енергија, гас и други горива пораснале за 9,5 отсто на годишно ниво, додека цените во транспортот се зголемиле за 7,7 проценти.

На месечно ниво, потрошувачките цени во Србија во јуни пораснале за 0,2 отсто, по растот од 0,3 проценти во мај.

Народната банка на Србија очекува инфлацијата дополнително да забави до септември, а потоа да се движи околу горната граница на целниот опсег од 1,5 до 4,5 отсто. Според процените, инфлацијата би требало повторно да се врати во целниот опсег до средината на 2027 година.

Вредност на реализирани онлајн трансакции

Според најновите податоци на НБРСМ за трансакции на места на продажба за е- трговија (без трансакциите со електронски пари), во првиот квартал од 2026 година вкупната вредност на онлајн трансакциите достигнала 16,355.96 милиони денари, односно 265.95 милиони евра, што претставува раст од 18.1% во однос на истиот период минатата година. Во оваа вредност се вклучени онлајн купувањата на македонските граѓани кај домашни и странски е-продавници, како и купувањата на странски потрошувачи кај македонските е-трговци.

При тоа, во првиот квартал од 2026 година, кон македонските е-трговци биле реализирани онлајн трансакции во вредност од 9,608.64 милиони денари, односно 156.24 милиони евра, што претставува раст од 16.5% во однос на истиот период минатата година. Од оваа сума, домашните иматели на платежни картички реализирале трансакции во вредност од 8,617.27 милиони денари (140.12 милиони евра), што е 15% повеќе во однос на истиот период лани, додека странските иматели на платежни картички реализирале онлајн трансакции кон македонските е-трговци во вредност од 991.37 милиони денари, односно 16.2 милиони евра, што претставува раст од 32.5%. Овој тренд покажува дека домашните е-продавници сè повеќе успеваат да привлечат и купувачи од странство.

Од друга страна, македонските потрошувачи продолжуваат активно да купуваат и од странски е-продавници, при што во првиот квартал реализирале онлајн трансакции во вредност од 6,747.31 милиони денари, односно 109.71 милиони евра, што претставува раст од 20.3% во однос на истиот период минатата година.

Број на реализирани онлајн трансакции

Покрај растот на вредноста, продолжува да расте и бројот на онлајн купувања. Во првиот квартал од 2026 година биле реализирани 7,662.7 илјади онлајн трансакции, што претставува раст од 16.4% во однос на истиот период минатата година.

Притоа, кон македонските е-трговци бројот на направените е-трансакции изнесува 3,966.7 илјади и е за 17.5% повеќе во однос на истиот период лани.

Најголем пораст на бројот на направените е-трансакции од 44.4% е забележан од странски иматели на платежни картички кон домашни е-трговци, што дополнително го потврдува зголемениот интерес на странските купувачи за македонските онлајн продавници.

Во меѓувреме, домашните иматели на платежни картички кон странски е-трговци реализирале 3270.6 трансакции, што претставува раст од 12.2%.

„Податоците за првиот квартал од 2026 година потврдуваат дека е-трговијата во Македонија продолжува стабилно да расте. Двоцифрениот раст и на вредноста и на бројот на онлајн трансакции покажува дека дигиталното купување станува сѐ повообичаен избор за потрошувачите. Особено охрабрува фактот што расте купувањето кај домашните е-трговци, како од домашните, така и од странските купувачи. Растот од над 32% во вредност и над 44% во број на трансакции од странски картички кон домашни е-трговци е показател дека македонските компании стануваат поконкурентни и надвор од домашниот пазар. Во исто време, анализата покажува дека просечната вредност на трансакциите кај домашните е-продавници благо се намалува, што укажува дека потрошувачите купуваат почесто. Тоа е позитивен сигнал дека онлајн купувањето станува дел од секојдневните навики, а не само канал за повремени или поголеми набавки. Дополнително, позитивен сигнал е што во текот на првото тромесечје се регистрирани 59 новоотворени онлајн продажни места. Тоа покажува дека сѐ повеќе компании ја препознаваат е-трговијата како можност за раст и инвестираат во сопствено дигитално присуство, со што се збогатува понудата за домашните потрошувачи и се создаваат подобри услови за понатамошен развој на секторот. Овие резултати се дополнителен поттик да продолжиме да работиме на подобрување на условите за е-трговија, зголемување на довербата во дигиталните плаќања, поддршка на домашните компании и создавање поконкурентен дигитален пазар.” – вели Претседателката на АЕТМ, д-р. Нина Ангеловска Станков.

Просечна вредност на трансакција

Иако вкупната вредност на онлајн купувањата продолжува да расте, анализата покажува дека просечната вредност на една трансакција кај домашните е-продавници благо се намалува.

Кај трансакциите од домашни картички кон домашни е-трговци, просечната вредност се намалила од 36 на 35.3 евра односно за 2.2%. Овој тренд е во согласност со фактот дека бројот на трансакции ( кој бележи раст од 17.5%) расте побрзо од нивната вкупна вредност ( која бележи раст од 15%), што укажува дека македонските потрошувачи трошат помалку по трансакција кај домашните продавници. Кај странските картички кон домашните е-трговци, просечната вредност се намалила од 41.3 на 37.9 евра (што представува намалување од 8.2%), што исто така укажува дека странските купувачи реализираат повеќе поединечни купувања.

Спротивно на тоа, кај трансакциите од домашни картички кон странски е-трговци, просечната вредност пораснала од 31.3 на 33.6 евра, што претставува пораст од 7.3%.

Вкупно, просечната вредност на една онлајн трансакција изнесувала 34.7 евра, што претставува раст од 1.5% во однос на истиот период минатата година.

Нови отворени е-продавници

Во текот на првото тромесечје од 2026 година, регистрирани се 59 новоотворени онлајн продажни места, што претставува значаен показател за зголемена понуда и заинтересираност на бизнисите да влезат во е-просторот.

Овој тренд упатува на сѐ поголема свесност кај трговците за потребата од присуство на интернет пазарот, како и на поволни услови за развој на онлајн продажбата.

Инаку, Асоцијацијата за е-трговија останува посветена на континуирано информирање и едукација на пазарот, преку подготовка на релевантни анализи и организирање на настани кои го поттикнуваат развојот на е-трговијата во регионот. Во таа насока, годишната регионална анализа за состојбата на е-трговијата претставува значаен извор на податоци за сите засегнати страни, додека 9-тата регионална конференција за е-трговија, која ќе се одржи на 3 ноември 2026 година во Националната опера и балет во Скопје, ќе понуди нови можности за едукација, размена на искуства и вмрежување. Повеќе информации за конференцијата се достапни на следниот линк: https://ecommerceconference.mk/