Европската централна банка и националните централни банки во Европската Унија предлагаат да се укине обврската издавачите на стејблкоини да чуваат минимален дел од своите резерви како депозити во банки, објави Reuters.

Во моментов, според правилата на MiCA, издавачите на стејблкоини треба да чуваат 30 отсто од резервите како банкарски депозити, а кај поголемите издавачи тој удел изнесува 60 отсто. Централните банки предлагаат ова правило да се замени со барање одреден минимален дел од резервите да биде вложен во средства што доспеваат во рок од еден до пет работни дена.

Според Европскиот систем на централни банки, чувањето на резервите како банкарски депозити може да ја промени структурата на финансирање на банките, бидејќи постабилните депозити на граѓаните би можеле да бидат заменети со депозити од издавачи на стејблкоини, кои се почувствителни на пазарни движења.

Европските монетарни власти предупредуваат и на ризиците поврзани со таканаречените модели на повеќекратно издавање на стејблкоини, кај кои токените издадени во ЕУ се третираат како заменливи со оние издадени надвор од Унијата. Според нив, ваквите модели можат да создадат ризици за финансиската стабилност.

Централните банки дополнително укажале дека европските регулатори се соочуваат со значителни предизвици во спроведувањето на правилата за крипто-секторот, бидејќи дел од компаниите што не се усогласени со прописите и натаму имаат пристап до клиенти во ЕУ.

Околу 80 вработени во Стопанска банка АД – Скопје вчера учествуваа во крводарителска акција, покажувајќи хуманост и солидарност преку доброволно дарување крв.

Од Банката истакнаа дека со оваа акција вработените уште еднаш покажале дека и еден мал гест може да има големо значење за оние на кои им е потребна помош.

Стопанска банка упати благодарност до сите вработени кои учествуваа во акцијата, нагласувајќи дека со својата несебичност придонесуваат за поддршка, надеж и шанса за живот.

Крводарителската акција е дел од активностите преку кои Банката и нејзините вработени ја поддржуваат хуманоста и општествената одговорност.

Комерцијална банка АД Скопје беше спонзор на јубилејното 25. издание на Годишната конференција на Македонска берза, која се одржа вчера, 22 септември.

Конференцијата собра водечки експерти од финансискиот сектор, инвеститори, носители на политики и претставници на бизнис-заедницата, кои дискутираа за иднината на финансискиот сектор и пазарот на капитал.

Во фокусот беа развојот на пазарите на капитал, финансирањето на растот на компаниите и алтернативните извори на финансирање, како и влијанието на дигиталната трансформација, вештачката интелигенција и новите финансиски технологии врз финансискиот сектор.

Од Комерцијална банка истакнаа дека со поддршката на вакви иницијативи придонесуваат за размена на знаење, идеи и искуства, како и за развој на стабилно, современо и конкурентно финансиско окружување.

Банката упати и честитки до Македонска берза за 25 години посветеност на развојот на пазарот на капитал и финансиската заедница.