Connect with us

Банки

Средба Ангеловска-Бежоска ‒ Габриел: Поддршка од ЕИБ за спроведување на стратегијата за „зазеленување“ на финансискиот систем

Објавено

на

Европската инвестициска банка ги цени активностите коишто ги презема Народната банка во изминативе неколку години во сферата на зеленото финансирање и е подготвена да обезбеди поддршка за активностите планирани во периодот 2023 ‒ 2025 година. Со оглед на значајноста на ризиците коишто ги носат климатските промени во глобални рамки, вклучително и за финансиските системи, од 2020 година „зелената“ и одржлива економија стана една од стратегиските цели на Народната банка. Во 2021 година, Народната банка стана членка на Меѓународната мрежа на зелени финансии во која членуваат централни банки и финансиски регулатори, а во 2022 година за првпат беше спроведена и анкета за оцена на свесноста за овие ризици и начинот на управување со нив од страна на банкарскиот систем. Народната банка е во завршна фаза на изготвување на тригодишната Стратегија за поттикнување на зелените финансии.

На средбата, гувернерката посочи дека Стратегијата на Народната банка за поттикнување на зелените финансии ќе засега повеќе сегменти, меѓу кои се финансиската стабилност, банкарската регулатива и супервизија, монетарната политика, истражувањето, финансиските пазари и понатамошниот развој на организациската култура и капацитетите во Народната банка. Некои од позначајните активности во рамките на Стратегијата се подготовката на насоките за работењето на банките во доменот на управувањето со климатските ризици, како и стрес-тестирањата за оцена на отпорноста на банкарскиот систем на климатските промени.

Претставникот на ЕИБ, Бјорн Габриел, позитивно ги оцени досегашните активности на Народната банка и изрази подготвеност да го поддржи спроведувањето на Стратегијата преку програмата на ЕИБ „Зазеленување на финансиските системи“. Поддршката ќе биде насочена кон јакнење на капацитетите за оцена на влијанието на климатските ризици врз стабилноста на банкарскиот систем, мерки за заштита, развивање политики, регулативна рамка и соодветни инструменти за справување со ризиците. Подетално за формите и начинот на поддршка помеѓу ЕИБ и вработените од Народната банка кои работат во оваа област беше разговарано на работилницата организирана во Народната банка.

Досегашните заложби на Народната банка за раст на зеленото финансирање вродија со значителен напредок. Имено, од почетокот на прибирањето на податоците за зелени кредити во земјава (крајот на 2019 година), заклучно со првиот квартал од годинава, се забележува удвојување на вкупната сума на издадените зелени кредити. Во овој период, „зелените кредити“, или кредитите за финансирање обновлива енергија, енергетска ефикасност, одржливо земјоделство и технолошки иновации, пораснаа и сега изнесуваат 3,7% од вкупните кредити. Народната банка преку низа мерки го поддржува зеленото финансирање, вклучително и преку измените во инструментот за задолжителна резерва.

Банки

Континуиран растечки тренд на користењето на дигиталните канали за извршување на електронските плаќања

Објавено

на

Народната банка на Република Северна Македонија ги објави податоците од доменот на платежната статистика за третиот квартал од 2024 година, кои покажуваат постојан тренд на зголемена употреба на дигиталните канали за извршување на плаќањата во земјата. Овие податоци се особено значајни, бидејќи ја истакнуваат промената во навиките на граѓаните во насока на сѐ поголема  употреба на платежните картички при иницирање на плаќањата, како и  користење на решенијата за мобилно плаќање кај електронските кредитни трансфери (платните налози). 

Во третиот квартал од 2024 година се забележува  значителен годишен раст кај бројот и вредноста на платежните трансакции на граѓаните во трговијата во земјата. Трансакциите  со картички, издадени од домашните даватели на платежните услуги, пораснале за 10,2% по број и за 13,6% по вредност. Овој раст најмногу се должи на високиот годишен раст на бројот на плаќањата во е-трговијата во земјата, кој изнесува 29,2%, како и растот од 8,8% на плаќањата преку терминалските уред ПОС.

Покрај тоа, забележан е и годишен раст во бројот на  плаќањата на граѓаните со платни налози. Бројот на платежните трансакции се зголемил за  9,9%, а вредноста на остварените трансакции пораснала за 22,2%. Ова укажува на натамошно зголемување на употребата на дигиталните канали за иницирање на овие плаќања. Најзначајни се резултатите од употребата на апликациите за мобилно плаќање, кои покажуваат годишен раст од 50,2% во бројот на платежните трансакции споредено со истиот период од 2023 година. Во рамките на овие податоци, се истакнува податокот дека граѓаните извршиле 65% од вкупниот број електронски иницирани платни налози преку мобилните платежни апликации, што покажува дека мобилните апликации за плаќање стануваат сѐ попопуларни, бидејќи нудат побрзи и поедноставни решенија за  иницирање на платежните трансакции.

Податоците од доменот на платежната статистика за третиот квартал од 2024 година, освен што ги опфаќаат платежните трансакции на граѓаните во земјата, вклучуваат и податоци за платежните трансакции на правните лица во земјата. За повеќе информации, податоците се достапни на следнава врска.

Продолжи со читање

Банки

Стопанска банка ќе финансира 11 нови проекти за подобрување на условите во општеството за лицата со попреченост

Објавено

на

На денот кога го прослави јубилејниот 80. роденден, Стопанска банка ги објави добитниците на нови 11 грантови за асоцијации на лица со пречки во развојот како дел од шестото издание на општествено-одговорната кампања „Сонуваме.Менуваме“. Оваа долгогодишна кампања на Банката е наменета за подигнување на јавната свест за поголема инклузија на лицата со попреченост и градење подобро општество за сите.

Доделените грантови се во вкупна вредност од 30.000 евра и се наменети за реализација на различни проекти со кои се подобруваат и олеснуваат условите во општеството за лицата со попреченост. Стопанска банка, како и во годините претходно, објави јавен повик до сите асоцијации, училишта и здруженија на лица со попреченост, при што пристигнаа 26 барања.

Специјална комисија на Банката ги оценуваше сите пристигнати барања, по што избра 11 проекти кои ќе бидат реализирани во следните месеци со финансиска поддршка на Стопанска банка и со кои значително ќе се подобрат условите за секојдневна дружба, социјализација и едукација на децата со пречки во развојот низ земјата. Добитниците на грантовите и нивните проекти се објавени на веб-страницата на Стопанска банка. Преку платформата „Сонуваме.Менуваме“, во оваа и претходните години, Стопанска банка има инвестирани над 115.000 евра за реализација на повеќе од 60 инклузивни проекти.

Во рамки на шестото издание на „Сонуваме.Менуваме“ вчера се реализираа и две прикажувања на музичко-театарскиот спектакл „Необичен ден“ во кој главните ликови се омилените јунаци од „5+ Фамилија“ заедно со деца со попреченост. Со впечатлива игра на актерите и нивните пријателчиња со попреченост, колоритни костими, одлична музика и спектакуларни визуелно-сценски елементи, учесниците во „Необичен ден“ пред многубројната публика уште еднаш ја пренесоа пораката дека сите заедно треба да влијаеме на менување на свеста за значењето на инклузијата, со што ќе создаваме свет без предрасуди и поделби.

Претставата „Необичен ден“, зад која стојат Стопанска банка во соработка со ОXО продукција,  ќе се прикажува во Македонскиот народен театар (МНТ) и во јануари.

Продолжи со читање

Банки

Дигитална зона 24/7 и нов современ изглед доби Филијалата на Комерцијална банка во Струмица

Објавено

на

Филијалата на Комерцијална банка во Струмица доби нов современ изглед и дигитална зона 24/7, со што на клиентите ќе им обезбеди уште поголемо корисничко задоволство преку модерни технологии и пријатен амбиент.

Реновираната филијала во Струмица е дизајнирана за да обезбеди поефикасни и побрзи банкарски услуги во секое време.

На огромно задоволство на Комерцијална банка, на клиентите им се нудат следните услуги: 

  • Банкарство 24/7 преку банкомати за уплата и исплата на готовина и дигитални киосци.
  • Банкомат приспособен за користење од лица со посебни потреби.
  • Брза и комплетна услуга од стручни и искусни банкарски службеници.
  • Бесплатна обука за користење електронско и мобилно банкарство.
  • Персонализирано банкарство за паметни финансиски одлуки.

Дигиталната зона на Филијалата е опремена со два банкомати, од кои едниот овозможува уплата и подигање готовина, како и со дигитален киоск, кој е современо решение за плаќање сметки за јавни услуги (ЕВН, Телеком, А1, БЕГ и Телекабел) без провизија, без посета на шалтер и со картичка од која било банка. На дигиталниот киоск може да се испечати и извод од платежна сметка на физичко лице за која има претплата на Интернет банка. Влезот во дигиталната зона 24/7 е овозможен со сите банкарски картички.

Во Филијала Струмица клиентите на шалтерите ги имаат на располагање стандардните банкарски производи и услуги, како што се отворање платежна сметка во денари или во девизи, плаќање во земјата и во странство, брз трансфер на пари, менувачко работење, кредитни и депозитни производи, можност за купување удели во инвестициски и пензиски фондови и осигурителни полиси, како и e-commerce услуги. Шалтерите во Филијалата се отворени од понеделник до петок од 8 до 16 часот и во сабота од 9 до 12 часот.

Филијалата на Комерцијална банка во Струмица останува посветена на потребите на граѓаните и на компаниите во овој економски значаен и динамичен регион. Со понудата на ефикасни и модерни финансиски решенија Комерцијална банка има за цел да го поддржи економскиот раст и да остане доверлив партнер на клиентите во Струмичкиот регион.

Продолжи со читање

Популарно