Во мај 2026 година, во земјава се регистрирани вкупно 131.723 туристи, од кои 106.756 се странски, а 24.967 домашни, покажуваат најновите податоци на Државниот завод за статистика.

Во истиот период се остварени 236.727 ноќевања, при што 75,8% се реализирани од странски, а 24,2% од домашни туристи, што уште еднаш ја потврдува доминантната улога на странските посетители во туристичкиот промет.

Во периодот јануари – мај 2026 година, вкупниот број туристи е зголемен за 2,6% во споредба со истиот период лани. Притоа, бројот на домашните туристи е намален за 4,4%, додека бројот на странските туристи бележи раст од 4,9%.

Позитивен тренд е забележан и кај ноќевањата, кои во првите пет месеци од годинава се зголемени за 1% на годишно ниво. Бројот на ноќевањата од домашните туристи е намален за 4,1%, додека кај странските туристи е регистриран раст од 3,3%.

Најбројни странски посетители во мај биле туристите од Турција (34.681), по што следуваат Германија (9.578), Србија (7.605) и Бугарија (4.858), што ја потврдува силната заинтересираност на посетителите од регионот и од клучните европски пазари за туристичката понуда на Македонија.

Цените на нафтата продолжија да растат во вторникот, откако американскиот претседател Доналд Трамп најави воведување такси за бродовите што минуваат низ Ормутскиот Теснец и повторно воспоставување блокада на иранските пристаништа во близина на оваа клучна рута.

Американската нафта ВТИ за испорака во август поскапе за 1,38 отсто, на 79,22 долари за барел, додека северноморската нафта „брент“ за септември порасна за 1,27 отсто, на 84,36 долари за барел. Растот следува откако „брент“ во претходната сесија поскапе за 9,6 отсто.

Трамп изјави дека САД ќе наплаќаат такса во висина од 20 отсто од вредноста на целиот товар што се транспортира преку Ормутскиот Теснец, нарекувајќи ги Соединетите Американски Држави „чувар“ на оваа важна нафтена рута.

Тој најави и обновување на блокадата на иранските пристаништа во близина на теснецот, што дополнително ги зголеми стравувањата од ескалација на конфликтот со Техеран и можни нарушувања во глобалното снабдување со сурова нафта.

Американската Централна команда соопшти дека блокадата ќе стапи во сила во вторник во 16 часот по источноамериканско време.

Од „Ситигруп“ предупредија дека предлогот за воведување такси значително го зголемува ризикот од натамошна воена ескалација и дека цените на нафтата би можеле подолго време да останат на високо ниво.

Пред почетокот на американските и израелските напади врз Иран на 28 февруари, низ Ормутскиот Теснец минувала приближно една петтина од светската понуда на нафта. Сообраќајот на бродови значително се намалил откако Иран почнал да напаѓа пловила во теснецот, но започнал да закрепнува по постигнувањето привремен договор меѓу Вашингтон и Техеран.

Цените на станбените недвижности и кириите во Европската Унија продолжиле да растат и во првите месеци од 2026 година, покажуваат најновите податоци на Евростат. Во дел од земјите, поскапувањето на становите и куќите било и за околу десет процентни поени повисоко од стапката на инфлација.

Во првиот квартал од годинава, цените на недвижностите во ЕУ биле повисоки за 5,1 процент во споредба со истиот период лани, додека кириите се зголемиле за три проценти. За споредба, просечната инфлација во Унијата изнесувала 2,3 проценти.

Најголем годишен раст на цените е регистриран во Португалија, каде што недвижностите поскапеле за 17,8 проценти. Следуваат Бугарија со раст од 14,8 проценти, Словачка со 14,4 и Хрватска со 14,3 проценти.

Меѓу најголемите европски економии, најсилно поскапување е забележано во Шпанија, каде што цените пораснале за 12,8 проценти. Со тоа земјата се најде на петтото место според растот на цените меѓу анализираните европски држави.

Двоцифрено зголемување е евидентирано и во Литванија, Унгарија, Латвија и Чешка. Во Словенија цените пораснале за 9,3 проценти, во Данска за 8,3, а во Романија за 7,8 проценти.

Над просекот на ЕУ биле и Ирска, со раст од 6,8 проценти, Полска со шест проценти и Холандија со 5,2 проценти.

На спротивната страна е Франција, каде што цените се зголемиле за само 0,1 процент. Финска е единствената земја во која е забележан пад, и тоа од два проценти во споредба со првиот квартал од 2025 година.

Од нордиските земји, само Данска имала раст над просекот на Европската Унија. Во Норвешка цените пораснале за 4,6 проценти, во Исланд за 2,8, а во Шведска за 2,6 проценти.

Особено изразена разлика меѓу растот на цените и инфлацијата е забележана во Португалија, Бугарија, Словачка, Хрватска и Шпанија. Во овие земји, недвижностите поскапеле за приближно десет процентни поени повеќе од општото ниво на цените.

Растот продолжил и на квартално ниво. Во споредба со последните три месеци од 2025 година, цените на недвижностите во ЕУ се зголемиле за 1,2 проценти, а кириите за 0,7 проценти.

Податоците за 2025 година покажуваат и дека европските домаќинства во просек издвојувале 18,9 проценти од расположливиот приход за трошоци поврзани со домувањето. Во одредени земји, овој удел надминувал и 30 проценти.