Комитетот за економски и монетарни прашања на Европскиот парламент го одобри долгоочекуваното дигитално евро, како дел од напорите на Европската Унија да ја намали зависноста од платежни системи контролирани од САД.

Дигиталната валута, која се очекува да биде воведена до 2029 година, треба да ја зајакне европската автономија во плаќањата и да претставува дигитална форма на пари издадени и гарантирани од Европската централна банка. Таа нема да ја замени готовината, туку ќе ја надополни, заедно со постојните банкарски услуги.

Според податоците на Европската централна банка, американските платежни гиганти Visa и Mastercard учествуваат со 61 отсто во картичните плаќања во еврозоната и речиси целосно доминираат кај прекуграничните картични трансакции.

Предлогот предвидува граѓаните да можат да чуваат дигитални евра во посебен дигитален паричник, со ограничување на износот што ќе може да се поседува, а кое допрва треба да биде утврдено. Системот би овозможувал онлајн и офлајн плаќања и, според најавите, би обезбедувал високо ниво на приватност, без Европската централна банка директно да ги идентификува корисниците преку нивните платежни податоци.

Основната инфраструктура би ја обезбедила ЕЦБ, додека комерцијалните банки и давателите на платежни услуги би им ги нуделе услугите на клиентите. Финансиските институции се очекува да добијат надомест за учество во системот, додека трговците би плаќале пониски провизии од сегашните картични трансакции.

Европската централна банка го поздрави гласањето, наведувајќи дека позицијата на парламентарниот комитет истовремено ја штити готовината како законско средство за плаќање и го обликува дигиталното евро.

Италијанскиот европратеник Пасквале Тридико, кој го водеше досието во име на Левицата, ја оцени одлуката како „историска“ и како голема победа за граѓаните и малите бизниси.

Европската Унија не е единствена во развојот на јавна дигитална валута. Кина веќе го воведе дигиталниот јуан, а Русија најави дека дигиталната рубља ќе стане оперативна во септември 2026 година. САД, пак, имаат поинаков пристап, откако претседателот Доналд Трамп се откажа од плановите за дигитална валута издадена од Федералните резерви и ја поддржа употребата на стабилни криптовалути.

Европскиот парламент треба формално да ја потврди позицијата на комитетот на пленарна седница во Стразбур на почетокот на јули, по што ќе започнат преговори со 27-те земји членки. Законодавците се надеваат дека конечен договор ќе биде постигнат до крајот на годината.

Реалната нето-плата во државата во април пораснала за 1,6 отсто на годишно ниво, по растот од 3,1 отсто во март, според податоците од Државниот завод за статистика.

Просечната месечна нето-плата исплатена по вработен во април 2026 година изнесувала 48.779 денари. Во споредба со април минатата година, просечната нето-плата номинално е зголемена за 7,3 отсто.

Растот, според статистичарите, главно се должи на зголемувањето на платите во секторите финансиски дејности и дејности на осигурување, каде што е забележан раст од 27 отсто, водоснабдување, канализација, управување со отпад и санација на околината со раст од 9,4 отсто, како и трговија на големо и мало и поправка на моторни возила и мотоцикли со раст од 9,2 отсто.

Во споредба со претходниот месец, раст на просечната нето-плата е регистриран во финансиските и осигурителните дејности, трговијата и административните и помошните услужни дејности.

Податоците покажуваат дека платите продолжуваат да растат номинално, но реалниот раст е поумерен, што значи дека инфлацијата и натаму го ограничува ефектот од зголемувањето врз куповната моќ на граѓаните.

Цената на златото продолжи со падот во текот на последното интрадневно тргување, пробивајќи го нивото на поддршка од 4.100 долари, кое претходно беше посочено како крајна надолна цел во анализата на Economies.com.

Според анализата објавена на 24 јуни 2026 година, ваквото движење укажува на продолжен продажен притисок и засилен негативен моментум, со што златото влегува во нова фаза на пад.

Падот следува откако цената делумно ја ублажи состојбата на препродаденост на индексите на релативна сила, што отвори простор за дополнително намалување без јасни сигнали за пресврт на трендот.

Аналитичарите оценуваат дека главниот краткорочен надолен тренд и натаму доминира, а можноста за нови загуби останува висока, особено по губењето на важна поддршка која претходно го ограничуваше продажниот притисок.