Македонска берза, во соработка со ЕБОР и PwC, ги поканува домашните компании со потенцијал за раст да се приклучат на специјално креирана програма за проценка на нивната подготвеност за прибирање капитал преку пазарот на капитал.

Проектот е наменет за амбициозни и успешни компании кои планираат нов инвестициски циклус, размислуваат за долгорочна стратегија и генерациски континуитет, сакаат независна проценка на вредноста и потенцијалот на својот бизнис или не ја исклучуваат можноста во иднина да прибираат капитал преку издавање акции или обврзници.

Компаниите што ќе учествуваат во проектот ќе добијат пристап до ексклузивна лидерска академија, индивидуална проценка на подготвеноста за излегување на пазарот на капитал, како и професионален извештај со препораки за понатамошен развој.

Од Македонска берза посочуваат дека ова е можност компаниите да добијат независна експертска проценка за тоа каде се наоѓаат денес и како во иднина можат да привлечат инвеститори.

До 70 проценти од трошоците за учество ќе бидат покриени преку грант обезбеден од ЕБОР. Рокот за пријавување е 1 септември 2026 година, а повеќе детали за учество и начинот на аплицирање се достапни на веб-страницата на Македонска берза.

Од полноќ ќе важат нови цени на горивата, откако Регулаторната комисија за енергетика донесе одлука со која малопродажните цени на нафтените деривати во просек се намалуваат за 0,27 проценти во однос на претходната пресметка.

Според новата одлука, од 30 јуни 2026 година, од 00:01 часот, ЕУРОСУПЕР БС-95 ќе се продава по максимална цена од 84,50 денари за литар, додека ЕУРОСУПЕР БС-98 ќе чини 86,50 денари за литар. Двата бензина поскапуваат за 0,50 денари.

Дизел горивото ЕУРОДИЗЕЛ БС поевтинува за 0,50 денари и неговата нова максимална цена ќе изнесува 80 денари за литар.

Цената на Екстра лесното масло за домаќинство не се менува и останува 79,50 денари за литар. Мазутот М-1 НС поевтинува за 0,796 денари за килограм и ќе се продава по цена од 41,495 денари за килограм.

Од РКЕ посочуваат дека при пресметката се земени предвид движењата на референтните цени на светските берзи, каде што е забележано намалување кај бензините, дизелот, екстра лесното масло и мазутот. Истовремено, курсот на денарот во однос на доларот бил повисок за 1,5132 проценти во споредба со претходната пресметка.

Регулаторната комисија нагласува дека утврдените цени се максимални. Трговците на големо и мало имаат можност горивата да ги продаваат и по пониски цени од највисоките дозволени.

Германскиот автомобилски гигант „Фолксваген“ се соочува со една од најтешките одлуки во својата историја. Компанијата, која со децении важи за симбол на германската индустриска моќ, подготвува длабока реорганизација што би можела да донесе масовно намалување на бројот на вработени, затворање производствени погони и нова корпоративна структура.

Според информациите што ги објавија германскиот „Manager Magazin“ и агенцијата „Ројтерс“, раководството на групацијата разгледува план со кој би можеле да бидат укинати до 100.000 работни места. Тоа би било двојно повеќе од претходно договорената програма со синдикатите од крајот на 2024 година, кога беше предвидено до 2030 година да се намалат околу 50.000 позиции.

Плановите, според извештаите, веќе биле претставени од извршниот директор Оливер Блуме пред највисокото раководство, а за нив треба да расправа и Надзорниот одбор на состанок закажан за 9 јули. Од „Фолксваген“ не ги коментираат доверливите документи, но признаваат дека групацијата мора да помине низ сериозни промени.

Една од најдраматичните мерки што се разгледува е затворање на четири фабрики во Германија. Според информациите, производството постепено би можело да запре во погоните на „Фолксваген“ во Хановер, Цвикау и Емден, како и во фабриката на „Ауди“ во Некарсулм. Со тоа би биле директно погодени повеќе од 45.000 работни места.

Производството во овие фабрики, според планот, би престанало откако актуелните модели ќе го завршат својот животен циклус, без да бидат заменети со нови. Сепак, спроведувањето на ваков план нема да биде лесно, бидејќи „Фолксваген“ има договор со синдикатите за заштита на работните места до крајот на 2030 година, додека кај „Ауди“ таквата гаранција важи до 2033 година.

Работничкиот совет и моќниот синдикат IG Metall веќе најавуваат силно противење на можни затворања фабрики и масовни отпуштања.

Реорганизацијата не се однесува само на намалување на трошоците. Според објавените информации, раководството размислува основниот бренд „Фолксваген“ и бизнисот со автомобилски компоненти да ги издвои во посебни компании. Таквата структура би можела во иднина да ѝ овозможи на групацијата полесно да привлекува капитал или одделни делови од бизнисот да ги листира на берза.

Покрај тоа, се планира и кратење на инвестициите за околу 15 проценти во следните пет години, на нешто повеќе од 130 милијарди евра.

Причините за ваквите радикални чекори се поврзани со сè поголемиот притисок врз компанијата. Во првиот квартал од годинава нето-добивката на групацијата се намалила за 28 проценти, на 1,56 милијарди евра, додека приходите паднале за два проценти, на 75,7 милијарди евра.

Дополнителен проблем се американските царини, кои според проценките на компанијата создаваат околу четири милијарди евра дополнителни годишни трошоци. Истовремено, „Фолксваген“ се соочува со сè посилна конкуренција на кинескиот пазар, каде што веќе ја загуби долгогодишната лидерска позиција. Во 2024 година беше престигнат од BYD, а во 2025 година падна и зад Geely. Само во првиот квартал продажбата на групацијата во Кина се намалила за околу 20 проценти.

Скапата транзиција кон електрични возила, конкуренцијата од кинеските производители, царините во САД и падот на профитабилноста го ставаат „Фолксваген“ пред одлуки кои до неодамна изгледаа незамисливо.