Во новото издание на FinSight разговараме со Снежана Станковиќ, Претседателка на Управниот одбор во Сава пензиско за клучните измени што ќе го обликуваат пензискиот систем во наредниот период.

Пензискиот систем во земјава влегува во нова фаза на трансформација. Со најавените измени во Законот за задолжително пензиско осигурување се воведува нов концепт на управување со пензиските заштеди, кој треба да овозможи поголема флексибилност, но и поголема одговорност за осигурениците.

Во ова интервју, Снежана Станковиќ, Претседателка на Управниот одбор на Сава пензиско, објаснува што конкретно носат реформите и како тие ќе се применуваат во пракса. Една од клучните новини е воведувањето на три инвестициски портфолија – растечко, балансирано и конзервативно, што отвора прашања околу тоа кој ќе ја носи одлуката за инвестирање и како ќе се распределуваат средствата во зависност од возраста и ризичниот профил на осигурениците.

Дополнително, се дискутира дали новите правила ќе ги опфатат и постоечките осигуреници, како и кои се потенцијалните предизвици во предложените законски решенија. Во разговорот се осврнуваме и на интересот за доброволниот (трет) пензиски столб, кој сè повеќе добива на значење во контекст на долгорочното финансиско планирање.

Покрај пензиските теми, интервјуто отвора и пошироки прашања за одржливоста на системот, финансиската писменост и навиките на младите генерации кога станува збор за пензиско планирање.

Воедно, како дел од GEA – Алијансата за родова еднаквост на работното место, се разговара и за родовиот јаз во финансискиот сектор, разликите во застапеноста и платите, како и за конкретните активности што треба да придонесат кон поголема еднаквост.

Ова интервју нуди релевантни погледи за сите кои сакаат да разберат како денешните реформи ќе влијаат врз нивната финансиска сигурност во иднина.

Новинар: Наташа Мерсовска

„Луѓето очекуваат брзи одлуки, особено кога те следат… Исклучително е вредно да се слушаат луѓето од тимот, бидејќи да се води еден тим не значи дека одлуките и насоките одат едносмерно – секогаш е двосмерно. На крајот сите треба да бидеме убедени во нешто за да можеме да го исполниме. А тоа е нешто што се учи низ годините…“, вели Тони Стојановски, Главен извршен директор и претседател на Управниот одбор на НЛБ Банка Скопје во поткастот на М6 Step Forward.

Со повеќе од 30 години искуство во банкарскиот сектор на различни раководни позиции, Стојановски зад себе има исклучително богата професионална кариера. Во разговорот споделува лични видувања и практични примери за тоа како, преку инклузивен процес на работење, се создаваат и водат успешни тимови, како се гради доверба со клиентите и вработените, за вистинското значење на лидерството, за факторите за оддржување стабилност во еден динамичен финансиски свет, но и за клучните вредности за одржлив успех.

Па во контекст на тоа, Стојановски ќе рече дека токму пристапот кон луѓето, начинот на комуникација со вработените, клиентите и соработниците се клучни за успешно функционирање на една современа финансиска институција. Способноста да се слуша, да се мотивира и да се гради доверба станува подеднакво важна како и професионалната експертиза. Преку личен пример на континуирана едукација, постојано надоградување и посветеност, Тони Стојановски се стреми своите професионални и лидерски вредности да ги преслика и во организациската култура, пренесувајќи ги и на вработените во НЛБ
Банка. На тој начин создава средина што ги мотивира тимовите заеднички да растат, да соработуваат и да градат стабилен и успешен банкарски систем. „Важно е да се почитуваат луѓето на начин на кој ќе се почувствуваат почитувани, бидејќи само така можат да бидат корисен и продуктивен дел од тимот“ – порачува тој.

Истовремено, Стојановски става силен фокус на младите и нивната иднина во
банкарскиот сектор – како да се охрабрат да го трасираат својот професионален пат, да веруваат во сопствениот потенцијал и да бидат вредни и трпеливи на патот кон успехот. Тој ги поттикнува храбро да ги искористат можностите што ги носи модерното банкарство и да гледаат на секој предизвик како на нова можност за раст. Лидерството и животното искуство, се еден процес кој бара време и ситуации за да се дојде до одредено ниво….и да се научи како да се реагира во одредени кризи и непредвидливи околности.. „И тоа е нешто што се учи со годините“ – ќе заклучи Стојановски.

Собранието ги изгласа Ана Митреска и Игор Величковски за вицегувернери на Народната банка – со мандат од седум години и одговорност во период на засилени глобални економски ризици.

Во најновата епизода на FinSight, разговараме за тоа како централната банка ќе се справи со инфлациските притисоци, растот на цените на енергенсите и неизвесноста од геополитичките тензии. Дали нè очекува заострување на монетарната политика? Кога може да дојде до раст на каматните стапки?

Отвораме и тема за модернизацијата на платежниот систем – придобивките од SEPA плаќањата и воведувањето на инстант системот TIPS, како и нивното влијание врз граѓаните и компаниите.

Интервју со јасни ставови, конкретни проекции и увид во тоа како ќе се води економската политика во наредните години.

Премиерата на YouTube каналот се емитува денес во 12:00 часот.

Новинар: Наташа Мерсовска