Минималните трошоци на едно четиричлено семејство во февруари се зголемени за речиси илјада денари во споредба со јануари, покажуваат податоците на Сојузот на синдикати на Македонија кој ја прави синдикалната потрошувачка кошничка.

Синдикалната минимална кошница за февруари изнесува 67 382 денари и во однос на синдикалната минимална кошница во јануари е зголемена за 969 денари. Со изнајмен стан од 60 квадрати, вредноста на синдикалната минимална кошничка се зголемува на 82.757 денари.

Зголемување од речиси илјада денари има и во делот на храната односно ако за јануари биле потребни минимум 24 211 денари, во февруари за истата намена биле потребни 25.156 денари.

Од ССМ велат дека за само два месеца од почетокот на годината, најавеното усогласување на минималната плата што треба да се случи во март, е изедено со растот на минималната синдикална кошничка.

„За само два месеца едно семејство е посиромашно за две илјади денари. За 24 месеци, односно околу колку што одбиваа да ја зголемат минималната плата вредноста на синдикалната минимална кошница е зголемена за повеќе од 10.000 денари и затоа наместо да се препукуваат на грбот на работниците и политичките партии да застанат со нив, да ја изгласаат минималната плата која треба да иузнесува 600 евра и да ги зголемат сите останати плати за најмалку 6.000 денари“, вели претседателот на ССМ Слободан Трендафилов.

ССМ им остави простор на Владата и работодавачите до крајот на февруари да се договорат за зголемувањето на минималната плата, во спротивно најавуваат уште еден протест и организирање генерален штрајк.

Трговскиот дефицит на САД достигна 901 милијарда долари во 2025 година, покажуваат податоците на „U.S. Census Bureau и Bureau of Economic Analysis“. Ова е едно од највисоките нивоа во последните години, поттикнато од силната домашна побарувачка и растечкиот увоз на индустриски производи, автомобили, електроника, енергенси и потрошувачка стока.

Најголемиот дел од дефицитот произлегува од трговската размена со China, Mexico и European Union, каде увозот значително го надминува извозот. Во декември 2025 година, дефицитот достигна 70,3 милијарди долари, надминувајќи ги очекувањата на аналитичарите.

Економистите предупредуваат дека ваквото продлабочување на дефицитот укажува на силна потрошувачка и економска активност, но истовремено може да го засегне домашното производство и конкурентноста на одредени индустриски сектори. Федералните власти ќе продолжат да ја следат ситуацијата во контекст на монетарната политика, трговските договори и меѓународните пазари.

Германија, заедно со Франција, Италија, Холандија, Полска и Шпанија, најави зголемен напор за усогласување на правилата на пазарите на капитал во ЕУ. Германскиот министер за финансии, Ларс Клингбајл, истакна дека темпото на европско ниво не е доволно брзо за предизвиците со кои се соочува Европа.

„Сè уште верувам дека темпото што моментално го доживуваме на европско ниво не е соодветно на предизвиците со кои се соочуваме како Европа“, изјави Клингбајл во Брисел на денешната средба со министрите за финансии на Франција, Италија, Холандија, Полска и Шпанија.

„Сакаме решенија за цела Европа и на тоа работиме шестмината со цел зајакнување на суверенитетот на Европа и правење на силна Европа, особено во овие турбулентни времиња, и работиме на тоа да обезбедиме да играме посилна улога на меѓународен план“, додаде тој.

Средбата во Брисел се фокусираше на забрзување на развојот на капиталните пазари, како и на формирање сојузи за штедење и инвестиции. Лидерите посочија дека секоја земја-членка сè уште има свои правила и даночни структури, што ја отежнува интеграцијата и дека целта е создавање поефикасна средина за бизнис и зајакнување на европскиот економски суверенитет.