Цените на нафтата се стабилизираа на азиските берзи во четврток, откако во претходната сесија паднаа за околу 2%, додека инвеститорите го проценија напредокот во разговорите меѓу САД и Иран, но остануваат претпазливи во однос на можноста за конечен договор.

Фјучерсите на Брент пораснаа за 0,2% на 67,57 долари за барел, додека американската WTI нафта се искачи за 0,2% на 62,45 долари, при што двата референтни индекса се движат близу двонеделните минимуми.

Иако Техеран и Вашингтон постигнаа начелно разбирање за клучните принципи во нуклеарните разговори, иранскиот министер за надворешни работи Абас Аракчи изјави дека тоа не значи дека договорот е неизбежен. Аналитичарите оценуваат дека пазарот останува претпазлив, со ограничен простор за посилен раст на цените сè додека нема конкретен дипломатски пробив.

Дополнителна геополитичка неизвесност внесува најавата за заеднички поморски вежби на Иран и Русија во Оманското Море и северниот Индиски Океан, како и неодамнешните воени активности на Иран во теснецот Хормуз, што останува клучна точка за глобалното снабдување со енергенси, пред се нафта.

Цената на златото во вторникот забележа пад од над 2%, под влијание на намалената ликвидност поради празниците на клучните азиски и американски пазари, додека посилниот долар и ублажувањето на геополитичките тензии го зголемија притисокот.

Спот цената на златото се намали за 1,5% на 4.917,9 долари за унца, откако претходно падна на 4.862 долари, најниско ниво во последната недела. Американските фјучерси за април изгубија 2,2%, спуштајќи се на 4.936,6 долари за унца.

„Тенката ликвидност поради празниците во последните 24 часа, особено во Кина и Азија, но очигледно и во Соединетите Американски Држави, значи дека едноставно немавме понуда на пазарот“, изјави Кајл Рода, виш аналитичар на пазарите на капитал во „Capital.com“.

Според аналитичарите, празничните затворања на пазарите во Кина, Хонг Конг, Сингапур, Тајван и Јужна Кореја поради Лунарната Нова Година, како и неработниот ден во САД поради Денот на претседателите, значително ја намалија ликвидноста, што го засили ценовниот притисок.

Дополнителен негативен фактор беше и растот на индексот на американскиот долар за 0,3%, што го прави златото поскапо за инвеститорите кои користат други валути. Пазарите со внимание го очекуваат и записникот од јануарскиот состанок на Федералните резерви, кој би можел да даде нови сигнали за идната монетарна политика.

Кај останатите благородни метали, среброто падна за 2% на 75,05 долари за унца, платината за 1,5% на 2.010,7 долари, додека паладиумот загуби 1,9% и се спушти на 1.692 долари за унца.

Цените на нафтата забележаа пад втора последователна недела, под влијание на намалените геополитички тензии меѓу САД и Иран и очекувањата дека понудата ќе расте побрзо од побарувачката. На лондонскиот пазар, цената на барел нафта поевтини за 0,5% на 67,75 долари, додека во САД барел нафта се тргува за 62,89 долари, што е пад од околу 1% во однос на минатата недела.

Краткотрајниот раст на цените во првиот дел од минатата недела беше поттикнат од тензиите меѓу САД и Иран, но изјавата на американскиот претседател за можен договор во наредните 30 дена ги намали очекувањата. Сепак, пазарите продолжуваат внимателно да го следат развојот, особено по повторното распоредување на носач на авиони во Блискиот Исток и изјавите на Иран во врска со нуклеарната програма.

Аналитичарите нагласуваат дека понудата во 2026 година веројатно ќе расте побрзо од побарувачката. „International Energy Agency“ проектира раст на побарувачката за околу 850.000 барели дневно, додека понудата би можела да се зголеми за 2,4 милиони барели дневно. ОПЕК, пак, проценува дека побарувачката ќе порасне за 1,38 милиони барели дневно, а производителите би можеле да ја зголемат понудата од април, подготвувајќи се за летната сезона.

Пазарните движења го рефлектираат внимателниот баланс меѓу геополитичкиот ризик и динамиката на понудата и побарувачката на светските пазари.