Германија, заедно со Франција, Италија, Холандија, Полска и Шпанија, најави зголемен напор за усогласување на правилата на пазарите на капитал во ЕУ. Германскиот министер за финансии, Ларс Клингбајл, истакна дека темпото на европско ниво не е доволно брзо за предизвиците со кои се соочува Европа.

„Сè уште верувам дека темпото што моментално го доживуваме на европско ниво не е соодветно на предизвиците со кои се соочуваме како Европа“, изјави Клингбајл во Брисел на денешната средба со министрите за финансии на Франција, Италија, Холандија, Полска и Шпанија.

„Сакаме решенија за цела Европа и на тоа работиме шестмината со цел зајакнување на суверенитетот на Европа и правење на силна Европа, особено во овие турбулентни времиња, и работиме на тоа да обезбедиме да играме посилна улога на меѓународен план“, додаде тој.

Средбата во Брисел се фокусираше на забрзување на развојот на капиталните пазари, како и на формирање сојузи за штедење и инвестиции. Лидерите посочија дека секоја земја-членка сè уште има свои правила и даночни структури, што ја отежнува интеграцијата и дека целта е создавање поефикасна средина за бизнис и зајакнување на европскиот економски суверенитет.

Управата за јавни приходи ги заврши регистрацијата и доброволна дерегистрацијата на даночните обврзници за данокот на додадена вредност (ДДВ).

Од УЈП денеска информираа дека врз основа на поднесените барања во текот на јануари извршена е регистрација на 1.199 даночни обврзници за што се донесени исто толку решенија за задолжителна и доброволна регистрација за ДДВ.

Во истиот период, врз основа на барањата за доброволна дерегистрација, Управата за јавни приходи извршила и прекинување на регистрацијата кај 231 обврзници за што се донесени исто толку решенија за дерегистрација.

Рокот за поднесување на пријавите беше до 15 јануари.

Европската Унија од 1 јули 2026 година воведува фиксна царина од најмалку три евра за мали пратки што пристигнуваат директно до потрошувачите, најчесто од Кина, со цел сузбивање на нелојалната конкуренција и заштита на домашниот пазар.

Советот на ЕУ ја одобри мерката со која се укинува досегашното ослободување од царина за пратки со вредност под 150 евра. Само во 2024 година во Унијата пристигнале 4,6 милијарди вакви пакети, од кои дури 91% биле од Кина.

Во преодниот период од 1 јули 2026 до 1 јули 2028 година ќе се применува фиксна царина од три евра, по што системот ќе премине на редовни царински стапки, со целосно ставање во функција на новиот европски царински Data Hub.

Клучната новина е што царината нема да се пресметува по пакет, туку по категорија на производи во истиот пакет. Така, доколку една пратка содржи две различни категории стоки, царината ќе изнесува шест евра, а за три категории – девет евра.

Мерката има за цел да воспостави фер пазарни услови, да ги заштити европските трговци и да обезбеди дополнителни приходи во буџетот на ЕУ и земјите членки, без да се наруши протокот на е-трговија.