Од 1 август скопјани ќе плаќаат повисока цена за централното греење, откако Регулаторната комисија за енергетика ги утврди новите цени за корисниците на топлинска енергија во главниот град.

Најголемо зголемување е предвидено за корисниците приклучени на системот на „ЕСМ Снабдување“, каде цената на топлинската енергија ќе биде повисока за 5,96 проценти.

Поскапување следува и за корисниците на „ЕСМ Енергетика“, односно на таканареченото железарско парно, за кои цената се зголемува за 5,18 проценти.

Кај корисниците на „Скопје Север“, односно „ЕнергоЕколог“, зголемувањето ќе изнесува 3,65 проценти.

Според пресметките на Регулаторната комисија, за просечен стан со површина од околу 60 квадратни метри, месечната сметка за греење би се зголемила за приближно 140 денари.

Новите цени ќе почнат да се применуваат од 1 август, пред почетокот на новата грејна сезона.

Од РКЕ посочуваат дека и покрај корекцијата на цените, нивото на цените за топлинска енергија во земјава и понатаму е поволно во споредба со соседните држави.

Регулаторната комисија за енергетика донесе нова одлука со која од полноќ се зголемуваат малопродажните цени на горивата во просек за 4,55 проценти.

ЕУРОСУПЕР БС-95 поскапува за три денари и ќе се продава по цена од 93 денари за литар, додека ЕУРОСУПЕР БС-98 исто така поскапува за три денари и новата цена ќе изнесува 95 денари за литар.

ЕУРОДИЗЕЛ поскапува за 4,50 денари и ќе чини 98,50 денари за литар. Екстра лесното масло за домаќинство поскапува за пет денари и ќе се продава за 98 денари за литар. Цената на мазутот се зголемува за 2,726 денари и ќе изнесува 48,099 денари за килограм.

Од Регулаторната комисија посочуваат дека референтните цени на светските пазари во однос на претходната пресметка пораснале за 6,229 проценти кај бензините, 7,442 проценти кај дизелот, 8,051 проценти кај екстра лесното масло и околу 8,159 проценти кај мазутот.

Новите цени ќе почнат да се применуваат од 00:01 часот на 28 јули 2026 година.

Американските власти го продолжија до 22 август рокот во кој се дозволени одредени активности поврзани со странските средства на рускиот енергетски гигант „Лукоил“. Одлуката доаѓа во период кога Бугарија повторно го става во фокус прашањето за непречената работа на рафинеријата во Бургас.

Продолжувањето беше објавено истиот ден кога бугарскиот премиер Румен Радев телефонски разговараше со американскиот секретар за енергетика Крис Рајт за енергетската соработка меѓу двете земји.

Според бугарската владина прес-служба, во разговорот биле опфатени повеќе стратешки енергетски прашања, меѓу кои диверзификацијата на снабдувањето со енергија во Југоисточна Европа, подобрувањето на регионалното поврзување и изградбата на Вертикалниот гасен коридор.

Радев и Рајт разговарале и за проектот за изградба на нови реактори во нуклеарната централа „Козлодуј“ со американска технологија, како и за можностите за развој на големи центри за податоци и инфраструктура поврзана со вештачката интелигенција.

Бугарскиот премиер посебно го нагласил значењето на непреченото функционирање на рафинеријата во Бургас, оценувајќи дека нејзината работа е важна не само за Бугарија, туку и за поширокиот регион.

Паралелно со разговорите, Канцеларијата за контрола на странски средства при американското Министерство за финансии, ОФАК, го продолжи до 22 август 2026 година важењето на лиценцата што овозможува преговори и склучување условни договори за продажба на „Лукоил интернешнл ГмбХ“ и неговите компании.

Станува збор за компанијата преку која „Лукоил“ управува со значителен дел од своите средства надвор од Русија. Сепак, лиценцата не значи автоматско одобрение за продажба или пренос на тие средства. За реализација на евентуална зделка е потребна посебна дозвола од американските власти.

Одделна американска лиценца, која се однесува на одржувањето и работењето на бензинските станици на компанијата надвор од Русија, останува во сила до 29 октомври 2026 година.

Американските власти нагласуваат и дека во рамки на дозволените активности не смее да се врши пренос на средства кон лица или сметки во Руската Федерација.

Прашањето за иднината на „Лукоил“ е особено значајно за Бугарија поради рафинеријата во Бургас, која е еден од клучните енергетски капацитети во земјата и подолго време се наоѓа во центарот на разговорите поврзани со санкциите кон Русија и енергетската сигурност.

Кон крајот на јуни претставници на „Литаско“, компанија од групацијата „Лукоил“ и акционер во „Лукоил Нефтохим Бургас“ и „Лукоил Бугарија“, разговараа со претставници на бугарската влада. Една од темите беше функционирањето на рафинеријата и ограничувањата што влијаат врз трговијата со нафта преку компании регистрирани во Швајцарија.