Народната банка е доследна во одржувањето на макроекономската стабилност како најсоодветен амбиент за водење бизнис и создавање поволни услови за раст и развој на домашната економија. За таа цел, централната банка секогаш води соодветни политики, коишто гарантираат стабилни и предвидливи услови. Ова беше посочено на денешната работна средба помеѓу гувернерот на Народната банка, Трајко Славески и претседателот на Стопанската комора на Македонија, Бранко Азески, којашто се одржа во просториите на Комората, во присуство на членови на Управниот одбор на Комората и на претставници на медиумите.

Банкарскиот сектор е стабилен, со историски висока капитална адекватност, што претставува значаен потпорен столб за економската стабилност и за економијата во целина. Во интерес на унапредувањето на финансиската вклученост и за зголемена ефикасност на банкарските услуги, Народната банка веќе ги презеде првите активности за намалување на надоместоците кај одделни банкарски услуги. Активностите ќе се одвиваат и понатаму, со цел да се унапреди пристапот до финансиските услуги за граѓаните и за компаниите.

Во рамките на денешната работна средба беше истакнато дека девизните резерви се стабилни и се движат меѓу 4,6 и 4,7 милијарди евра. Тоа претставува соодветно ниво, со оглед на тоа што резервите покриваат околу 4,5 месеци од увозот на стоки и услуги, односно над светскиот стандард од 3 месеци. Управувањето со резервите се врши внимателно, согласно утврдените принципи на сигурност и ликвидност, со постојан надзор од стручните служби на Народната банка.

Средбата заврши со заедничка оцена дека е неопходна поголема вклученост на институциите за поддршка на економијата, преку редовен и отворен дијалог, како и носење економски политики што се насочени кон реалните предизвици на деловната заедница.

Финтек компанијата Revolut најави значително проширување на своето присуство во Европа преку отворање на нова регионална централа во Париз, креирање на 400 нови работни места и аплицирање за француска банкарска лиценца. Оваа стратегија е дел од планот на компанијата за инвестиции во вредност од над една милијарда евра во Франција во наредните три години.

Новата централа во Париз ќе служи како хаб за Западна Европа и ќе ги покрива операциите на Revolut во Франција, Германија, Шпанија, Италија, Португалија и Ирска. Одлуката за формирање на штаб во Франција е поткрепена со силниот раст на францускиот пазар, каде Revolut има повеќе од пет милиони корисници, и со поддршката од локалните институции.

Во рамки на проширувањето, компанијата планира да вработи најмалку 200 луѓе само во Франција, зголемувајќи го вкупниот број на вработени во земјата на над 500. Дополнително, се предвидува трансфер на околу 600 постојни вработени од други земји во Франција, со фокус на сектори како што се корисничка поддршка, развој на производи и кредитни услуги. Новите вработувања ќе бидат распределени и во останатите западноевропски пазари.

Revolut веќе поседува банкарска лиценца од Литванија, која ѝ овозможува да нуди основни банкарски услуги низ ЕУ. Меѓутоа, добивањето на француска банкарска лиценца би ѝ овозможило на компанијата да понуди поширок спектар на производи, како што се хипотекарни кредити, оврдрафт, инвестициски производи и мобилни услуги специфични за францускиот пазар.

Компанијата исто така најави назначување на Беатрис Коса-Думургиер, поранешен член на управни одбори на Сосиете Женерсл и БНП Парибас, за извршен директор на новата западноевропска централа. Таа ќе ја води експанзијата во регионот и ќе ја предводи комуникацијата со француските регулатори.

Со отворањето на регионална централа во Франција и поднесувањето апликација за локална банкарска лиценца, Revolut испраќа јасен сигнал за своите долгорочни намери на европскиот пазар и зајакнување на своето позиционирање како конкурентен играч во банкарскиот сектор. Оваа стратегија е исто така дел од поширокиот напор за подобро усогласување со регулаторните барања и за поддршка на растот на клиентската база, која само во Франција се очекува да достигне 10 милиони до 2026 година.

Останува да се види дали францускиот регулатор, ќе ја одобри лиценцата, но засега Revolut демонстрира решителност за продлабочување на своето присуство на еден од клучните европски пазари.

Во согласност со член 158 од Законот за хартии од вредност, Шпаркасе Банка АД Скопје како Акционерско друштво со посебни обврски за известување, ја информира јавноста и заинтересираните субјекти за настанати промени во составот на својот Надзорен одбор.

Имено, на ден 15 јули 2025 година, до Банката е доставена формална оставка од страна на г-ѓа Габриела Шмол, која ја извршува функцијата член на Надзорниот одбор на Шпаркасе Банка АД Скопје. Согласно регулативата, оставката ќе стане правосилна со денот на добивање на согласност од Народната банка на Република Северна Македонија (НБРСМ) за новиот кандидат кој ќе биде предложен и именуван како нејзина замена од страна на Собранието на акционери на Банката.

Габриела Шмол, со своето професионално искуство и стратешки придонес, одигра значајна улога во работата на Надзорниот одбор во изминатиот период. Шпаркасе Банка упатува благодарност за нејзината посветеност и конструктивен ангажман во рамките на Надзорниот одбор.

Во моментот, Надзорниот одбор на Шпаркасе Банка АД Скопје е составен од следните членови:

• Д-р Георг Бухер – Претседател;
• Валбурга Зајдл – Заменик претседател;
• Славиша Којиќ – Член;
• Габриела Шмол – Член;
• Глигор Бишев – Член;
• Горан Петревски – Независен член;
• Татјана Шишковска – Независен член.