Во време кога корпоративната одговорност сè повеќе се сведува на зборови и кампањи, Flex Group избра да зборува со дела. Во месецот посветен на женското здравје, групацијата обезбедува бесплатни превентивни прегледи на дојка за сите свои вработени жени.

Flex Group, која ги обединува Flex Credit, Zemi Pari, Flex Broker, NAN и Flex Pay, денес брои речиси 400 вработени, од кои над 90% се жени. Со оваа иницијатива, групацијата испраќа силна порака дека грижата за вработените започнува со нивното здравје, како физичко, така и ментално. Наместо да чекаат институционални решенија или масовни акции, Flex Group ја презема одговорноста да овозможи превенција таму каде што може да направи вистинска разлика, на работното место.

„Во групации каде што жените се срцето на секојдневното функционирање, ваквите чекори не се само социјално одговорни, туку се и нужни. Превенцијата не смее да биде привилегија“, вели Јоана Спасовска, генерален директор на Flex Credit.

Во услови кога податоците за доцна дијагностицирање на рак на дојка во Македонија сè уште се загрижувачки, иницијативи како оваа се пример за тоа како приватниот сектор може да биде двигател на позитивни промени. Без многу бучава, но со искрена грижа и конкретни мерки.

За помалку од еден месец, на 4 ноември во Националната опера и балет во Скопје ќе се одржи 8. регионална конференција за е-трговија, во организација на Асоцијацијата за е-трговија на Македонија. Оваа година конференцијата доаѓа со свеж концепт – две паралелни сцени, на кои ќе се одржуваат инспиративни главни говори и интерактивни практични работилници.

Конференцијата по четврти пат ги отвора вратите за регионалната публика и очекува да собере над 800 учесници – успешни претприемачи, е-трговци, директори, менаџери, како и претставници од владини и невладини организации. Ќе бидат присутни гости од Македонија, Србија, Босна и Херцеговина, Албанија, Косово, Црна Гора, Бугарија, Грција и Хрватска, што ја прави конференцијата најголем и најзначаен регионален настан од ваков вид.

Ова издание носи и тематско проширување – покрај е-трговијата, фокусот ќе биде ставен на маркетингот и вештачката интелигенција (AI), две области кои ја движат дигиталната трансформација и го забрзуваат развојот на индустријата. Новиот концепт веќе предизвика голем интерес кај компаниите и професионалците од целиот регион.

Агендата е објавена и оваа година вклучува инспиративни презентации, панел дискусии и практични сесии кои ќе ја доближат иднината на е-трговијата и ќе понудат конкретни алатки за раст на бизнисите.

Конференцијата традиционално ќе започне со обраќање на претседателката на АЕТМ, Нина Ангеловска Станков, која ќе ги претстави клучните трендови и сознанија за развојот на е-трговијата во регионот во 2025 година.

По нејзиното излагање, на главната сцена следуваат презентации и панел дискусии од претставници на светски познати компании како Dolce & Gabbana, TikTok, Visa, Booking, Publicis Groupe, Brainster Next, Korpa, Bigburg, Direct media, Wolt и многу други. Тие ќе споделат искуства и експертиза во области како што се вештачка интелигенција, анализа на податоци, SEO, маркетинг стратегии, достава, експанзија на бизниси, плаќања и е-трговија.

На паралелните практични сесии, учесниците ќе имаат можност да научат повеќе за користење маркетинг податоци за раст, нови можности за инвестирање, креирање кратки видеа, како и практични алатки за примена на вештачка интелигенција, со експерти од Publicis Groupe, AI at Work by Brainster, Zephyr Angels и Shortsify.co.

Овогодинешната конференција е поддржана од Visa како платинум партнер, Халкбанк како стратешки партнер, Корпа како партнер за храна и достава, Brainster како AI партнер и A1 како дигитален партнер. Ananas и Casys се златни партнери, а сребрени партнери се Комерцијална банка, IUTE, Филип Морис Интернационал, Сава пензиско друштво, Гранд Скопје, Public Cloud Group и Wolt, заедно со повеќе бронзени партнери.

И оваа година, се очекува конференцијата да биде целосно распродадена, потврдувајќи го големиот интерес и значењето на настанот за развојот на е-трговијата во регионот.

Повеќе информации за агендата, говорниците и билетите се достапни на официјалната веб-страница:www.ecommerceconference.mk.

Шведска планира до средината на 2026 година да воведе можност за офлајн плаќања со картички, што ќе им овозможи на граѓаните да извршуваат трансакции и без интернет конекција.

Иницијативата, предводена од Шведската централна банка – Риксбанк е резултат на постигнат договор со водечките даватели на платежни услуги за користење на физички картички и ПИН кодови за основни купувања, како што се храна и лекови, дури и во услови на прекин на комуникациската инфраструктура.

Според гувернерот на Риксбанк, Ерик Тедин, ова претставува „важна пресвртница во подготовките за потенцијални безбедносни закани и зајакнување на стабилноста на платежниот систем“.

Овој потег е дел од пошироката национална стратегија за отпорност на кризи и вонредни ситуации, особено во контекст на зголемените геополитички ризици и загриженоста за можни саботажи на дигиталната инфраструктура.

Иницијативата на Шведска веќе наидува на поддршка од соседните земји како Финска, Норвешка, Данска и Естонија, кои најавија слични планови за заштита на своите платежни системи.

Компанијата Visa истакнува дека офлајн плаќањата во други европски држави покажале висока ефикасност и стабилност дури и за време на големи интернет прекини, со што се потврдува потребата за диверзификација на платежната инфраструктура.

Оваа мерка се очекува да придонесе за зголемена доверба на потрошувачите и стабилност на финансиските текови, а истовремено претставува пример за балансирање на дигиталниот напредок со сигурноста и достапноста на основните финансиски услуги.