Со дополнетиот Предлог-ребаланс на Буџетот за 2026 година се предвидуваат дополнителни средства за капитални инвестиции, земјоделството, социјалната заштита и општините, соопшти министерката за финансии Гордана Димитриеска-Кочоска пред пратениците во Собранието.

Според неа, измените се направени за усогласување на буџетските проекции со актуелните економски услови, но и за обезбедување средства за законските обврски и владините развојни приоритети.

Со ребалансот вкупните приходи се ревидираат на 379,5 милијарди денари, што е за 1,2 проценти повеќе во споредба со првично планираниот Буџет. Даночните приходи се проектирани на 213,2 милијарди денари и остануваат речиси на претходно планираното ниво.

Вкупните расходи, пак, се зголемуваат на 425,8 милијарди денари. Дополнителните средства се насочуваат кон исплата на зголемените плати во секторите каде што е предвиден раст, земјоделството, социјалната заштита, општините и капиталните инвестиции.

Во исто време, расходите за стоки и услуги се намалуваат за околу 800 милиони денари преку прераспределба на средствата.

Најголемо зголемување има кај капиталните расходи, кои со ребалансот се предвидени на околу 46 милијарди денари, односно за 5,8 милијарди денари повеќе од првичниот Буџет.

Средствата ќе се користат за инфраструктурни проекти, меѓу кои Коридорите 8 и 10-д, железничката инфраструктура, комунални и енергетски проекти, водоснабдување, управување со отпад, како и инвестиции во образованието, здравството, земјоделството и општините.

Димитриеска-Кочоска информираше дека капиталните расходи во периодот од јануари до јуни годинава достигнале 19,4 милијарди денари, што е раст од 53,5 проценти во однос на истиот период минатата година.

Во рамки на измените, за Министерството за земјоделство се предвидени дополнителни 170 милиони денари за изградба на дистрибутивни центри во Скопје и Струмица, како и за реновирање и адаптација на зградата на ИПАРД.

Дополнително, предвидени се 10 милиони денари за реконструкција на факултети, 12 милиони денари за Јавното обвинителство за продолжување на лиценца за софтвер, шест милиони денари за транспорт на вода за населението во Општина Гостивар поради прогласената епидемија и еден милион денари за Управата за извршување на санкции.

Со прифатените амандмани се обезбедуваат и средства за поддршка на жените кои се занимаваат со земјоделство, воспоставување национална СОС линија за жртви на семејно и родово базирано насилство и отворање два згрижувачки центри за жртви на насилство.

Владините проекции за 2026 година предвидуваат реален раст на БДП од 3,5 проценти, раст на инвестициите од 7,2 проценти и на просечната нето-плата од 8,3 проценти. Стапката на невработеност се очекува да се намали на 11 проценти, додека проектираната просечна инфлација изнесува 4,5 проценти.

Министерката порача дека ребалансот не значи промена на економската политика, туку приспособување на буџетот на новите околности, и ги повика пратениците да го поддржат предложениот документ.

Собраниската расправа за ребалансот, согласно Деловникот, може да трае до пет дена.

Управата за јавни приходи (УЈП) започна со засилени активности во текот на летната туристичка сезона, со посебен фокус на приходите што физичките лица ги остваруваат од краткотрајно издавање сместувачки капацитети.

Од УЈП информираат дека активностите се насочени кон поттикнување на доброволната даночна усогласеност и обезбедување еднакви услови за сите што вршат дејност во туристичкиот сектор.

Во фокусот се приходите од издавање апартмани, станови, куќи, викендички, соби и други сместувачки капацитети, како и приходите од други сезонски дејности поврзани со туризмот.

УЈП најавува практични насоки за пријавување на доходот, директна комуникација со даночните обврзници, размена на информации со други институции на државно и локално ниво, анализи на ризик и насочени контроли. Предвидена е и информативна кампања преку медиумите и социјалните мрежи.

Од институцијата потсетуваат дека секој приход остварен од издавање сместувачки капацитети подлежи на оданочување согласно законските прописи и ги повикуваат граѓаните навремено да ги исполнат своите даночни обврски.

„Целта не е само да укажеме на законските обврски, туку да им помогнеме на граѓаните навремено и правилно да ги исполнат“, посочуваат од УЈП.

Управата најавува дека ќе продолжи со анализи и контроли базирани на ризик, со цел еднаква примена на законите и спречување нелојална конкуренција кон оние што редовно ги исполнуваат своите обврски.

На 16 септември 2026 година, во Skopje Marriott Hotel, ќе се одржи Finelevate Digital Summit 2026, деловна конференција посветена на иднината на дигиталните финансии, иновациите и трансформацијата на банкарскиот, осигурителниот и финтек секторот.

Конференцијата ќе обедини претставници од банки, осигурителни компании, финтек компании, регулатори, јавни институции, технолошки компании и експерти од регионот, со цел да се отвори суштинска дискусија за следната фаза на развој на финансискиот сектор.

Фокусот на настанот ќе биде ставен на клучните теми кои директно ја обликуваат иднината на финансиските услуги: дигитално банкарство, платежни иновации, вештачка интелигенција, сајбер безбедност, дигитален идентитет, модернизација на податоци, регулаторна усогласеност и нови модели на клиентско искуство.

Под мотото „Иднината не чека. Создадете пред промената да стане очигледна.“, Finelevate Digital Summit 2026 има за цел да поттикне практична размена на знаење, стратешки дијалог и поврзување меѓу институциите и компаниите кои активно ја креираат дигиталната трансформација на финансискиот пазар.

Настанот е организиран од Finelevate, независна бизнис, истражувачка и advisory платформа насочена кон забрзување на дигиталната трансформација, иновациите и конкурентноста на финансискиот сектор во Македонија и регионот.

Агендата, говорниците и деталите за учество ќе бидат објавени дополнително преку официјалните канали на Finelevate.

Повеќе информации се достапни на: