На Европа и требаат поголеми и посилни банки кои ќе можат да се натпреваруваат со американската и кинеската конкуренција, изјави претседателката на Европската централна банка (ЕЦБ) Кристин Лагард. Таа се согласи со шефот на италијанскиот банкарски гигант „UniCredit“ Уникредит и неговото залагање за консолидација во подготовката на теренот за евентуално преземање на германската „Commerzbank“.

Италијанската банка „UniCredit“, која е сопственик и на „Загребачка банка“ размислува за спојување со германскиот кредитор „Commerzbank“, во кој на почетокот на септември купи девет проценти од акциите, вклучувајќи пакет акции во сопственост на германската влада и акции купени на берзата.

Тие потоа известија дека користеле финансиски инструменти за да го подготват теренот за зголемување на уделот до 21%, под услов да добијат зелено светло од Европската централна банка (ЕЦБ). Од „UniCredit“ додадоа дека побарале дозвола последователно да го зголемат удделот на 29,99 проценти.

Потезите на италијанската банка кренаа прашина во германските политички кругови и во раководството на „Commerzbank“, но и синдикатите се кренаа на нозе.

Извршниот директор на „UniCredit“ минатата недела на конференција во Лондон рече дека сите опции се отворени за нив, вклучително и спојување.

„Commerzbank е само инвестиција за UniCredit, но ние исто така можеме да ги здружиме силите и да направиме нешто поголемо“, изјави Андреа Орцел.

„На Европа и се потребни поголеми банки и спојувањето на UniCredit и Commerzbank би било тест“, рече шефот на италијанскиот кредитор.

Претседателката на ЕЦБ се согласи со неговото мислење на сослушувањето во комисијата на Европскиот парламент.

„Според мое мислење, прекуграничните спојувања се пожелни, банките кои можат вистински да се натпреваруваат со другите институции ширум светот, вклучително и американските и кинеските банки, во однос на длабочината и опсегот (на деловното работење) се пожелни“, изјави Лагард.

„Консолидацијата на банките е во интерес на Европа“, рече првиот човек на ЕЦБ, а прекуграничните спојувања имаат многу предности, доколку произведат поголеми, поагилни и посилни институции.

Сепак, таа се огради со напомена дека нејзините изјави не треба да се сфатат како директна интервенција во конкретен договор и посочи дека спојувањата носат одредени ризици за кои треба да одлучува приватниот сектор.

Конечната одлука за поврзувањето ќе ја донесе Управниот совет на ЕЦБ

„Commerzbank“ е системски важна банка, така што нејзин супервизор е ЕЦБ, чиј надзорен одбор ќе одлучува за барањето на „UniCredit“ да купи 21 отсто од акциите на германскиот кредитор.

Нејзините членови обично се фокусираат на елементи на управување со ризик, како што се капиталот, ликвидноста, деловните планови и управувањето, при обработката на апликациите.

„UniCredit“ побара и зелено светло за зголемување на својот удел на 29,99 проценти. Група од шест претставници на ЕЦБ минатата недела изјавија за „Reuters“ дека начелно го поддржуваат спојувањето на двете банки, додавајќи дека отпорот на Берлин, според нив, е во спротивност со принципот на европската интеграција.

Конечната одлука за поврзувањето ќе ја донесе Управниот совет на ЕЦБ на чело со претседателката Кристин Лагард.