Цените на нафтата утрово забележаа раст на азиските пазари, откако американскиот претседател Доналд Трамп изјави дека одговорот на Иран на американските предлози за прекин на војната е „целосно неприфатлив“.

Техеран својот одговор го испратил преку Пакистан, кој посредувал меѓу двете страни, барајќи итен прекин на конфликтот и гаранции дека нема да има нови американско-израелски напади врз Иран, објави иранската полуофицијална агенција „Тасним“.

Меѓународната цена на нафтата Брент порасна за 3,8 проценти и достигна 105,20 долари за барел, додека американската сурова нафта поскапе за 4 проценти, на 99,30 долари.

Клучниот поморски премин, Ормутскиот Теснец, практично е затворен уште од почетокот на војната на 28 февруари, што сериозно го наруши глобалното снабдување со нафта и гас.

Реагирајќи на условите на Техеран, Трамп на социјалните мрежи порача:

„Штотуку го прочитав одговорот на таканаречените ирански ‘претставници’. Не ми се допаѓа – целосно е неприфатлив.“

Американските услови вклучуваат обновување на слободниот премин низ Ормутскиот Теснец и прекин на иранското збогатување ураниум, пренесува американскиот портал Axios.

Израелскиот премиер Бенјамин Нетанјаху изјави дека војната со Иран нема да заврши додека нивните резерви на збогатен ураниум не бидат „отстранети“.

Примирјето прогласено на почетокот на април, со цел да се овозможат мировни преговори, главно се почитува, и покрај повремените размени на оган.

Трамп на 21 април го продолжи примирјето на неопределено време за да му даде можност на Иран да претстави „обединет предлог“.

Цените на енергенсите силно осцилираат од почетокот на конфликтот, а цената на Брент повторно се искачи над 100 долари по барел откако примирјето стапи во сила на 8 април.

Ормутскиот Теснец, низ кој вообичаено поминува околу една петтина од светските испораки на нафта и гас, останува практично затворен по заканите од Техеран за напади врз бродови што би се обиделе да поминат, како одговор на американско-израелските напади.

Големите енергетски компании во меѓувреме бележат раст на профитот поради наглиот скок на цените на нафтата и гасот на светските пазари.

Saudi Aramco соопшти дека добивката во првите три месеци од годинава пораснала за повеќе од 25 проценти во споредба со истиот период во 2025 година.

Извршниот директор на компанијата, Амин Насер, изјави дека нивниот нафтовод низ Саудиска Арабија се покажал како „клучна артерија за снабдување“ и помогнал да се избегнат прекини во транспортот предизвикани од војната со Иран.

Минатиот месец BP објави дека профитот во првиот квартал повеќе од двојно се зголемил, додека Shell минатата недела соопшти дека и нивната заработка значително пораснала.

Азиско-пацифичките берзи во петокот забележаа пад, поради зголемената загриженост од обновените тензии меѓу САД и Иран во услови на кревко примирје.

Јужнокорејскиот индекс „Kospi“ ослабе за 0,67 отсто, додека индексот на малите компании „Kosdaq“ порасна за 0,62 проценти. Јапонскиот „Nikkei“ 225 падна за 0,36 отсто, по делумното повлекување на инвеститорите по рекордното ниво достигнато во четвртокот.

Австралискиот индекс „S&P/ASX 200“ ги продолжи загубите и се намали за 1,44 проценти.

Кинескиот индекс „CSI300“ се тргуваше со пад од 0,60 отсто, додека хонгконшкиот „Hang Seng“ индекс ослабе за 0,82 проценти.

Во меѓувреме, фјучерсите на нафтата ги намалија претходните добивки. Фјучерсите на американската нафта „West Texas Intermediate“ за јуни пораснаа за 1,07 проценти и достигнаа 95,82 долари за барел. Цената на „Brent“ суровата нафта за јули се зголеми за 1,38 проценти, на 101,44 долари за барел.

Според аналитичарите, пазарите внимателно ги следат геополитичките случувања на Блискиот Исток, што влијае врз расположението кај инвеститорите и движењата на енергетските пазари.

И покрај негативните движења на берзите, во април беше забележан раст на цените на дел од акциите на Македонската берза, а инвеститорскиот интерес ја прошири листата на добитници во споредба со март, кога единствено акцијата на Мермерен комбинат беше во позитива.

Најголем месечен раст оствари акцијата на Макстил, која зајакна за 24,3 проценти и достигна цена од 133 денари. За споредба, во март просечната вредност на оваа акција изнесуваше 107 денари, кога беше евидентирана како најголем губитник на месечно ниво.

На позитивната листа следува НЛБ банка. Акцијата на банката од 55.039 денари на крајот на март се искачи на 58.000 денари во април, што претставува раст од 5,38 проценти.

Раст бележи и акцијата на Хотели Метропол Охрид, која поскапе за 5,2 проценти. Просечната цена по акција се зголемила од 250 на 263 денари.

Акцијата на Гранит во април достигна 1.550 денари, што е зголемување од 5,08 проценти во однос на мартовските 1.475 денари.

Позитивен месец имаше и Макпетрол, чија акција порасна за 2,65 проценти – од 109.007 денари во март на 111.900 денари во април.

Од друга страна, најголем пад во април е регистриран кај Македонијатурист. Акцијата загуби 15,72 проценти од вредноста и се намали од 9.847 на 8.299 денари.

ТТК банка остана меѓу акциите со негативен тренд, со пад од 9,71 проценти. Просечната цена се намали од 1.449 на 1.308 денари, откако и во март беше меѓу најголемите губитници.

Трет месец по ред паѓа и вредноста на обичната акција на Стопанска банка Скопје. Во април падот изнесува 3,53 проценти, а акцијата месецот го заврши со просечна цена од 2.274 денари, наспроти 2.357 денари во март.

Намалување е забележано и кај Тетекс Тетово, каде цената по акција се спушти од 1.982 на 1.930 денари, односно за 2,62 проценти.

Со пад го заврши месецот и најтргуваната акција на Македонската берза – Комерцијална банка. Нејзината вредност се намали за 2,39 проценти, од мартовските 27.978 денари на 27.310 денари во април.