Зголемените долгови на државите и растечкиот притисок врз глобалните пазари на обврзници би можеле дополнително да ја зајакнат улогата на биткоинот како заштита од макроекономски ризици, оценува инвестициската компанија Bitwise во најновата анализа.

Според извештајот, земјите и компаниите во 2026 година ќе треба да позајмат околу 29 трилиони долари, што е за 17 проценти повеќе во споредба со 2024 година и речиси двојно повеќе од нивото пред една деценија. Проценките се базираат на податоци на ОЕЦД.

Од Bitwise посочуваат дека дури 78 проценти од задолжувањето на владите во земјите членки на ОЕЦД ќе биде наменето за рефинансирање на постојните долгови, а не за нови јавни расходи. Според компанијата, ваквата состојба може да ги зголеми стравувањата на инвеститорите за одржливоста на јавните финансии.

Во такво опкружување, биткоинот би можел да привлече поголемо внимание како алтернативно средство кое не е директно поврзано со државните кредитни системи.

Посебен акцент во анализата е ставен на Јапонија, каде јавниот долг достигнува речиси 230 проценти од бруто-домашниот производ. Воедно, приносот на 10-годишните јапонски државни обврзници се искачил на 2,66 проценти, додека приносот на 30-годишните обврзници достигнал рекордно високо ниво.

Bitwise наведува дека повисоките приноси во Јапонија би можеле да поттикнат дел од капиталот на јапонските инвеститори да се врати на домашниот пазар, наместо да се инвестира во американски државни обврзници.

Компанијата предупредува дека притисоците не се ограничени само на Јапонија. Во САД приносот на 30-годишните државни обврзници во мај достигнал 5,11 проценти, највисоко ниво од 2007 година.

Иако повисоките каматни стапки краткорочно можат негативно да влијаат врз криптовалутите, Bitwise смета дека евентуални потреси на пазарот на обврзници би можеле да ги принудат централните банки повторно да обезбедат дополнителна ликвидност, што историски било позитивно за биткоинот.

Во извештајот се наведува и моделот на инвеститорот Грег Фос, според кој теоретската „фер вредност“ на биткоинот би можела да достигне околу 224.000 долари доколку криптовалутата добие поширока примена како заштита од ризиците поврзани со државниот долг. Од компанијата нагласуваат дека ова не претставува официјална прогноза за цената.

Во меѓувреме, истражувачот на биткоин познат под псевдонимот Сминстон проценува дека најголемата криптовалута би можела да се движи во опсег од 90.000 до 255.000 долари до крајот на 2026 година, врз основа на неговиот модел „Bitcoin Decay Channel“.

Повеќето водечки криптовалути бележат пад во последните 24 часа, при што пазарот е под влијание на нов бран на продажен притисок и зголемена краткорочна волатилност.

Најголемата криптовалута, биткоин се тргуваше по цена од околу 73.490 долари, со дневен пад од 0,77%, додека и понатаму ја задржува доминантната позиција на пазарот на криптовалутите.

Етериум забележа пад од 1,49%, движејќи се околу границата од 2.000 долари, во услови на претпазливо расположение кај инвеститорите.

Меѓу поголемите губитници се издвојува „BNB“ со пад од 5,37% на околу 698 долари, додека „XRP“ се намали за 1,61%. Солана исто така, беше во негативна зона со пад од 1,24%, тргувајќи се околу 82 долари.

Стабилните криптовалути останаа релативно стабилни, при што Tether (USDT) и USD Coin (USDC) се задржаа блиску до вредноста од 1 американски долар.

Аналитичарите оценуваат дека ваквите краткорочни осцилации се типични за криптопазарот, кој останува чувствителен на глобалните економски движења, монетарните политики и општото инвеститорско расположение.

Цената на биткоинот падна под 73.000 долари за првпат по неколку месеци, откако новите американски воздушни напади врз Иран предизвикаа силна распродажба на криптовалутите и другите ризични средства на глобалните пазари.

Според податоците на CoinDesk, биткоинот во азиското тргување се спуштил на 72.978 долари, што претставува пад од 3,4 проценти за 24 часа и 6,3 проценти на неделно ниво.

Пад бележеле и останатите водечки криптовалути. Ethereum изгуби 4,2 проценти и се спушти под нивото од 2.000 долари, додека Solana, XRP и Dogecoin исто така беа во минус.

Пазарниот пад предизвика масовни ликвидации на позиции со левериџ. Според CoinGlass, во последните 24 часа биле ликвидирани крипто-позиции во вредност од речиси една милијарда долари, при што најголем дел биле „лонг“ позиции, односно облози на раст на цените.

Главниот удар врз пазарите дојде по американските воздушни напади врз иранска воена локација во близина на Ормутскиот Теснец, еден од најважните светски коридори за транспорт на нафта. Истовремено, САД воведоа и нови санкции против Иран.

Тензиите на Блискиот Исток предизвикаа пад и на глобалните берзи, додека цената на нафтата порасна поради стравувањата од можна ескалација на конфликтот и нарушување на транспортот низ теснецот.

Американскиот претседател Доналд Трамп изјави дека ниту една држава нема да го контролира Ормутскиот Теснец и дека САД ќе продолжат да го надгледуваат регионот.