Еврото повторно ослабе во однос на американскиот долар во европското тргување во вторникот, прекинувајќи ја тридневната серија на закрепнување и повторно приближувајќи се до најниското ниво во последните 13 месеци.

Единствената европска валута е на пат да забележи втор последователен месечен пад, бидејќи инвеститорите и понатаму му даваат предност на американскиот долар како посигурна инвестициска и резервна валута на девизниот пазар.

Курсот EUR/USD се намали за 0,25 отсто, на 1,1395 долари, од почетното ниво од 1,1422 долари. Во текот на денот еврото достигна највисоко ниво од 1,1426 долари.

Во понеделникот еврото зајакна за 0,35 отсто во однос на доларот, што беше трет последователен дневен раст, како дел од закрепнувањето од 13-месечниот минимум од 1,1325 долари.

Покрај купувањето од пониски нивоа, еврото доби поддршка и од договорот меѓу САД и Иран за запирање на непријателствата и продолжување на техничките преговори во рамки на претходно договорената 60-дневна рамка.

Сепак, на месечно ниво, еврото во јуни е во минус од 2,3 отсто во однос на американскиот долар и останува на пат да го заврши месецот со втор последователен пад.

Притисокот врз европската валута се поврзува со силната побарувачка за доларот по поостриот тон на Федералните резерви на САД, како и со зголемената побарувачка за доларот како сигурно засолниште во услови на геополитички тензии околу Иран.

Во фокусот на инвеститорите денеска е извештајот за инфлацијата во Германија за јуни, кој може да даде важни сигнали за идните потези на Европската централна банка. Податоците ќе бидат внимателно следени бидејќи можат да влијаат врз очекувањата дали ЕЦБ ќе се одлучи за ново зголемување на каматните стапки до крајот на годината.

Според пазарните проценки, во моментов постои околу 30 отсто веројатност за зголемување на каматите од 25 базични поени на јулскиот состанок на ЕЦБ. Истовремено, дел од извештаите укажуваат дека централната банка би можела да паузира со дополнително затегнување на монетарната политика доколку цените на енергенсите останат блиску до сегашните нивоа.

Ако германската инфлација биде пониска од очекувањата, можноста за ново зголемување на каматите во еврозоната оваа година би можела дополнително да се намали. Тоа би создало нов притисок врз еврото во однос на доларот и останатите водечки светски валути.

Засега, девизните пазари остануваат под силно влијание на американската монетарна политика, геополитичките ризици и очекувањата за идните чекори на ЕЦБ. Во такво окружување, еврото тешко успева да изгради постабилно закрепнување.

Американските берзи во понеделникот забележаа раст, додека инвеститорите ја проценуваа паузата во непријателствата меѓу САД и Иран, во нестабилна сесија со која започна скратената трговска недела.

Индексот Dow Jones Industrial Average беше во плус за 360 поени, односно 0,7 отсто, движејќи се кон рекордно затворање. Поширокиот индекс S&P 500 порасна за 1,1 отсто, додека технолошкиот Nasdaq Composite се тргуваше за околу два отсто повисоко.

Alphabet беше меѓу најголемите добитници на денот, со раст од повеќе од четири отсто, на првиот ден од тргувањето како член на Dow Jones. Акциите на Comcast, пак, пораснаа за шест отсто, откако компанијата соопшти дека ќе ги издвои своите медиумски и технолошки бизниси во две јавно тргувани компании. Раздвојувањето се очекува да биде завршено за околу една година.

Позитивно се движеше и секторот на полупроводници. VanEck Semiconductor ETF (SMH) зајакна за повеќе од три отсто, откако претходно бележеше пад од 3,1 отсто. Акциите на Astera Labs, KLA и Applied Materials пораснаа за повеќе од 11 отсто поединечно, предводејќи го закрепнувањето во секторот.

Овие движења доаѓаат во период кога Волстрит ја започнува скратената трговска недела, бидејќи американската берза во петок ќе биде затворена поради Денот на независноста.

„Можно е да има нешто послаба ликвидност поради скратената трговска недела и празникот, па може да се видат поголеми поместувања од очекуваното“, изјави за CNBC Џо Тигај, портфолио менаџер во Equity Armor Investments.

Тој додаде дека се ближи и крајот на кварталот, што може да предизвика таканаречено „улепшување“ на портфолијата, бидејќи советниците сакаат позициите што ги прикажуваат во кварталните извештаи да изгледаат попривлечно за клиентите. Според него, многу од големите компании годинава веќе оствариле силни добивки, па инвеститорите имаат интерес да ги задржат тие позиции.

На пазарното расположение влијаеше и договорот меѓу САД и Иран од неделата за запирање на непријателствата и овозможување слободен премин на комерцијалните бродови низ Ормускиот Теснец. Договорот следуваше по викенд на воени размени, кои се закануваа да ги нарушат разговорите за смирување на конфликтот.

Американски официјален претставник за CNBC изјави дека техничките разговори треба да продолжат во сите области опфатени со Меморандумот за разбирање, додавајќи дека двете страни засега ќе се повлечат, а пловилата ќе можат слободно да се движат.

САД во текот на викендот нападнаа ирански воени цели, како одговор на иранските напади во Ормускиот Теснец. Американскиот претседател Доналд Трамп потоа упати нови закани кон Иран, наведувајќи на Truth Social дека американски авиони нападнале ирански складишта за ракети и дронови, како и крајбрежни радарски локации, поради, како што напиша, повторно кршење на договорот за прекин на огнот.

И покрај геополитичката неизвесност, инвеститорите на почетокот на неделата покажаа поголем апетит за ризик, особено во технолошкиот и полупроводничкиот сектор, што им помогна на главните берзански индекси да завршат во зелена зона.

Глобалните финансиски пазари влегуваат во период на отрезнување по силниот раст во изминатиот период, додека инвеститорите сè повеќе ја преиспитуваат одржливоста на досегашниот наратив за брз профит и високи вреднувања.

Технолошките акции минатата недела забележаа значителна корекција, при што индексот NASDAQ падна за речиси 5 отсто. Високите пазарни вреднувања се најдоа под притисок, а дополнителна неизвесност предизвика информацијата дека OpenAI размислува за одложување на својата иницијална јавна понуда за следната година. Тоа дополнително го разниша оптимизмот околу секторот за вештачка интелигенција.

Несигурноста на пазарите ја зголеми и Федералните резерви на САД, кои испратија кратка и недоволно јасна порака до инвеститорите, оставајќи простор за различни толкувања околу идните каматни стапки.

Особено силен удар претрпе секторот на полупроводници, иако Micron објави импресивни резултати, со раст на приходите од 346 отсто, на 41 милијарда долари. Сепак, инвеститорите сè повеќе се прашуваат дали огромните вложувања во инфраструктура за вештачка интелигенција се оправдани, особено во услови на високи каматни стапки.

На макроекономски план, PCE инфлацијата во САД изнесува 6,5 отсто, што е највисоко ниво од 2022 година, но во рамките на очекувањата. Падот на цената на нафтата под 70 долари би можел да го ублажи инфлаторниот притисок, иако пазарите и понатаму сметаат дека е можно ново зголемување на каматните стапки веќе во септември.

Промена на расположението е видлива и на пазарите на суровини и криптовалути. Златото падна под 4.000 долари, додека биткоинот се спушти под 60.000 долари, со што дополнително е разнишана неговата перцепција како „дигитално злато“.

Според аналитичарите, биткоинот сè повеќе се однесува како високо волатилна технолошка акција, а не како сигурно засолниште во кризни времиња. Институционалниот капитал се повлекува од биткоин ETF-фондовите и се пренасочува кон американските државни обврзници, чии приноси се движат околу 4,5 отсто. Тоа создава дополнителен притисок врз крипто пазарот.

Во исто време, инвеститорите стануваат сè поселективни. Софтверските компании губат дел од привлечноста, додека побарувачката за хардвер расте поради развојот на AI инфраструктурата. Apple веќе најави поскапување на уредите поради растот на цените на компонентите, што укажува на дополнителни притисоци во синџирите на снабдување.

Иако технолошките гиганти досега го носеа растот на берзанските индекси, повеќе компании бележат остри падови. Coinbase изгуби 69 отсто од вредноста, додека Oracle и Salesforce паднаа по 57 отсто, што покажува дека ранливоста во секторот е поширока.

Во вакво пазарно окружување, крајот на приказната за биткоинот како „дигитално злато“ не е изолиран случај, туку симптом на поширока промена. Пазарите повторно се враќаат кон основите, а скапата и нестабилна имотна класа сè потешко ја оправдува својата цена.