Корисниците на НЛБ haPPy картичката ќе добијат 10 проценти кешбек при купување билети за концерти и други настани преку платформата kupikarta.com.

Промотивната понуда важи за сите билети купени во периодот од 21 до 26 јули со НЛБ haPPy картичка.

Од НЛБ Банка информираат дека целта на кампањата е на корисниците да им овозможи дополнителна поволност при купувањето билети за настапите на нивните омилени изведувачи и да придонесе за создавање незаборавни летни спомени исполнети со музика и добра атмосфера.

Повеќе информации за Mastercard haPPy кредитната картичка се достапни на интернет-страницата на НЛБ Банка.

Raiffeisen Bank International, односно РБИ, соопшти дека заклучно со 20 јули добила изјави за прифаќање на понудата за преземање што се однесуваат на вкупно 10.703.509 акции на Addiko Bank.

Ова претставува 55,50 отсто од сите акции опфатени со понудата, со што моментално е надминат минималниот праг на прифаќање од повеќе од 55 отсто.

Во бројката се вклучени и 1.878.167 акции во сопственост на Alta Group, кои претставуваат 9,63 отсто од вкупниот број издадени акции на Addiko Bank.

Акционерите што ја прифатиле понудата пред подобрувањето на конкурентската понуда, објавено на 17 јули, имаат право да се повлечат до 23 јули во 17 часот. Сепак, до 20 јули во 9:30 часот не била примена ниту една изјава за повлекување.

Рокот за прифаќање на доброволната јавна понуда на РБИ завршува на 29 јули 2026 година во 17 часот.

Халкбанк АД Скопје ја започнува иницијативата „Cashless Bitola“, наменета за поддршка на дигитализацијата на микро, малите и средните компании во Битола.

Преку оваа понуда, локалните трговци ќе можат да прифаќаат плаќања со картички преку услугата Mobi POS, со која мобилниот телефон се претвора во ПОС-терминал, без потреба од дополнителен уред и сложени процедури.

Компаниите што ќе се пријават нема да плаќаат месечен надомест ниту провизија по трансакција во првите три месеци од инсталацијата. Дополнително, тие ќе добијат Visa Business Debit Card без годишна членарина во период од 12 месеци.

Понудата е ограничена на најмногу 50 трговци и ќе се реализира по принципот „прв пријавен, прв услужен“. Пријавувањето трае до 31 август 2026 година или до пополнување на слободните места, во филијалата на Халкбанк во Битола.