Американскиот претседател Доналд Трамп воведе дополнителни царини од 50 отсто за широк спектар производи од Канада, со што се отвора нов фронт во трговскиот спор меѓу двете земји.

Новите царини ќе опфатат канадски производи во вредност од речиси 20 милијарди долари, меѓу кои вино, млечни производи, цемент, мебел, хокејска опрема, базени, рибарски прачки, облека и перики. Мерките ќе почнат да се применуваат на 19 август 2026 година.

Трамп се повика на членот 338 од американскиот Закон за царини од 1930 година, кој му дозволува на претседателот да воведе казнени царини до 50 отсто за земји за кои е оценето дека ги дискриминираат американските производи. Според „Ројтерс“, ова е прва позната употреба на оваа одредба во нејзината речиси стогодишна историја.

Американската администрација ја обвини Канада за дискриминаторски третман на автомобилите, алкохолните пијалаци и млечните производи произведени во САД. Царините ќе важат и за производите што ги исполнуваат условите од трговскиот договор меѓу САД, Мексико и Канада.

Од мерките ќе бидат изземени енергентите, калиумовите соли, рибата, критичните минерали и производите што веќе се опфатени со други американски царини.

Канадскиот премиер Марк Карни изјави дека неговата влада доставила сеопфатни предлози за решавање на трговските спорови со Вашингтон и оцени дека претходните американски царини го прекршуваат северноамериканскиот трговски договор.

Тој предупреди дека трговскиот спор ги зголемува трошоците за семејствата, особено во САД, но нагласи дека Канада е подготвена за интензивни разговори за решавање на отворените прашања.

Регулаторната комисија за енергетика донесе одлука за зголемување на малопродажните цени на нафтените деривати во просек за 5,88 проценти.

Од полноќ, ЕУРОСУПЕР БС-95 поскапува за три денари и ќе се продава по цена од 90 денари за литар, додека ЕУРОСУПЕР БС-98 се зголемува за три денари и ќе чини 92 денари за литар.

Цената на ЕУРОДИЗЕЛ се зголемува за шест денари, на 94 денари за литар. Екстра лесното масло за домаќинство поскапува за седум денари и ќе се продава за 93 денари за литар. Мазутот поскапува за 3,205 денари, на 45,373 денари за килограм.

Од Регулаторната комисија посочуваат дека референтните цени на светските пазари бележат значително зголемување. Цените на бензините пораснале во просек за 9,003 проценти, на дизелот за 14,963 проценти, на екстра лесното масло за 13,2 проценти, а на мазутот за околу 10,686 проценти.

Владата истовремено донесе одлука со која акцизата за бензините е намалена за еден денар за литар, а за дизелот за два денари за литар.

Новите цени почнaa да се применуваат од 00:01 часот на 21 јули 2026 година.

Стравувањата од нов бран на инфлација повторно се во фокусот на инвеститорите, бидејќи конфликтот на Блискиот Исток ги одржува цените на нафтата на високо ниво, оценуваат аналитичарите.

Според проценките на „Блекрок“, конфликтот би можел да придонесе за раст на глобалната вкупна инфлација за околу 0,8 процентни поени. Последиците, сепак, нема да бидат еднакви во сите региони.

Европа и делови од Азија, кои во поголема мера зависат од увоз на енергија, ќе бидат поизложени на поскапувањето на енергентите и на растот на потрошувачките цени.

Од банката ОЦБЦ предупредуваат дека нов енергетски шок, во услови кога американскиот пазар на труд покажува знаци на стабилизација, би ја натерал Федералната резерва да остане фокусирана на ризиците од повисока инфлација.

Главниот инвестициски стратег на „ПНЦ асет менаџмент“, Јунг-Ју Ма, смета дека построгиот пристап на американската централна банка ќе продолжи сѐ додека не дојде до олеснување на состојбата на пазарите на нафта и намалување на другите инфлациски притисоци.

Тој предупреди дека неколку квартали со повисоки цени на нафтата и продолжени инфлациски притисоци би можеле да ги загрозат позитивните движења кај профитните маржи на малите и средните американски компании.

Цените на нафтата се намалија во раното тргување во петокот, но и натаму се движат кон неделна добивка, додека САД и Иран продолжуваат со меѓусебни напади.