Американскиот претседател Доналд Трамп изјави дека Кина се согласила да купува нафта од САД, во однапред снимено интервју за Fox News емитувано во четвртокот вечерта.

Изјавата доаѓа во време кога Вашингтон и Пекинг се обидуваат да постигнат конкретни трговски и економски договори за време на билатералниот самит што се одржува во Кина.

„Се согласија дека сакаат да купуваат нафта од Соединетите Американски Држави. Ќе одат во Тексас, ќе почнеме да испраќаме кинески бродови во Тексас, Луизијана и Алјаска“, изјавил Трамп по средбата со кинескиот претседател Си Џинпинг во Пекинг.

Трамп додал и дека Кина се согласила да помогне во преговорите со Иран и да не испорачува воена опрема за Техеран. Според него, кинескиот лидер сакал да го види Ормускиот Теснец отворен и без наплата за поминување.

Кина е најголемиот купувач на иранска нафта и купува околу 90 проценти од иранскиот извоз на сурова нафта. Според податоците на американската влада, Кина во текот на 2025 година увезувала околу 1,4 милиони барели иранска нафта дневно.

Во исто време, извозот на американска сурова нафта и нафтени деривати во Кина бележи пад втора година по ред. Минатата година извозот бил намален за 25 проценти на годишно ниво и достигнал 237,8 милиони барели.

Особено голем пад е регистриран кај извозот на сурова нафта, кој во 2025 година се намалил за 95 проценти во споредба со 2023 година, на околу 8,4 милиони барели.

Кинеското Министерство за надворешни работи во петокот соопшти дека двајцата лидери постигнале „низа нови консензуси“ за време на средбата, вклучително и договор за изградба на „конструктивна и стратешка стабилност“ во билатералните односи во следните три години и понатаму.

Во однос на конфликтот со Иран, Пекинг повикал на што побрзо повторно отворање на бродските рути и ги повикал завојуваните страни да работат на „сеопфатен и траен прекин на огнот“, со цел стабилизација на Блискиот Исток и регионот на Заливот.

Трамп и Си Џинпинг треба повторно да се сретнат и денеска за да го заокружат дводневниот самит, кој привлече големо внимание во јавноста, но и отвори можности за нови договори, вклучително и пристап на американски компании до кинескиот пазар и купување американски производи.

Пекинг воедно предупредил дека погрешното решавање на прашањето за Тајван би можело сериозно да ги наруши односите меѓу двете земји.

Посетата на Трамп е прва посета на актуелен американски претседател на Кина по речиси девет години. Според најавите, двајцата лидери ќе одржат работен ручек пред американската делегација да отпатува за Вашингтон.

Стартапи од Македонија и регионот добиваат нова можност за забрзан раст и излез на интернационалната сцена преку „Western Balkans Startup Accelerator“ програмата креирана од еден од најреномираните топ светски акцелератор и инвеститор „Startup Wise Guys“ и поддржана од Zephyr Angels како нивен инвестициски партнер од Македонија.

Стартапите ќе добијат практична поддршка за раст, развој на продукт, fundraising и излез на интернационални пазари преку хибриден формат што комбинира online и onsite сесии низ регионот и Европа.

Дополнително, стартапите добиваат можност за инвестиција од 50.000€, а најдобрите тимови ќе можат да аплицираат и за дополнителна follow-on инвестиција до 250.000€.

Ова не е класична едукативна програма, туку hands-on искуство за founders кои сакаат брзо да учат, да градат релевантни контакти и да го позиционираат својот стартап на следното ниво.

Апликациите се отворени до 18 мај.

Повеќе информации и аплицирање: Western Balkans Startup

Western Balkans Startup Accelerator

ПР објава

Повеќе од 70 експерти, претставници на лаборатории, институции, регулатори и компании од регионот учествуваат на 10. Регионален симпозиум на лаборатории за нафта и нафтени деривати, кој се одржува во Охрид со поддршка на ОКТА.

На јубилејното издание на симпозиумот присуствуваат претставници од Северна Македонија, Грција, Бугарија, Хрватска, Словенија, Србија и Босна и Херцеговина, кои преку презентации и стручни дискусии разменуваат искуства за најновите стандарди, технологии и предизвици во секторот за нафта и нафтени деривати.

Главниот извршен директор на ОКТА, Димитриос Пасхос, истакна дека ваквите иницијативи претставуваат важен дел од стратегијата на компанијата за развој на регионална соработка и размена на знаење.

Според него, поврзувањето на експертите и институциите од регионот е клучно за понатамошен развој на секторот и за одржување високи стандарди за квалитет и безбедност на горивата.

Од организацискиот комитет посочија дека симпозиумот во изминатата деценија прераснал во значајна регионална платформа за професионална комуникација и соработка меѓу лабораториите и компаниите од нафтениот сектор.

Настанот го отвори градоначалникот на Охрид, Кирил Пецаков, додека министерката за енергетика, рударство и минерални суровини Соња Божиновска се обрати преку видео порака, нагласувајќи ја важноста на контролата на квалитетот и модернизацијата во енергетскиот сектор.

Во рамки на симпозиумот беше ставен акцент и на дигитализацијата и модернизацијата на лабораториските капацитети, како предуслов за поголема точност и усогласеност со европските стандарди.

Од ОКТА посочија дека компанијата во изминатиот период ја модернизирала и дигитализирала опремата за тестирање во лабораторијата за контрола на квалитетот на горивата, која е прва акредитирана лабораторија од ваков тип во земјава и работи според европски и американски стандарди.

Учесниците оценија дека иднината на секторот ќе зависи од уште поголема регионална соработка, воведување нови технологии и постојано унапредување на системите за контрола и мониторинг на квалитетот на горивата.