Управата за јавни приходи го заврши годишното оданочување на граѓаните за 2025 година, при што биле генерирани вкупно 863.100 годишни даночни пријави.

Од нив, 704.443 пријави се достапни на корисничките профили во системот е-Даночни услуги, додека преостанатите се однесуваат на лица кои сè уште немаат регистрирано профил на порталот.

Од УЈП ги повикуваат граѓаните кои немаат кориснички профил да се регистрираат, за да можат да ја проверат својата даночна пријава и да утврдат дали имаат обврска за доплата или право на поврат на данок.

Од вкупниот број достапни пријави, 26.653 биле лично потврдени од даночните обврзници, а 1.145 биле коригирани. Останатите 676.645 пријави биле службено потврдени од УЈП.

Според Управата, голем број граѓани не извршиле личен увид во пријавите. Оттаму предупредуваат дека непроверената пријава може да доведе до ненавремено откривање грешки, неточни податоци или дополнителни даночни обврски.

Податоците покажуваат дека 208.857 пријави содржат износ за доплата во вкупна вредност од 208,98 милиони денари. Кај 313.519 пријави е евидентиран повеќе платен данок во износ од 53,91 милиони денари, додека 182.067 пријави се без разлика за доплата или поврат.

Вкупно 617 даночни обврзници побарале враќање на повеќе платен данок во износ од 32,4 милиони денари.

Вкупниот пријавен доход за 2025 година изнесува 612,87 милијарди денари, додека пресметаниот данок на личен доход достигнал 39,82 милијарди денари.

Во споредба со 2024 година, пријавениот доход е зголемен за 74,1 милијарда денари, а пресметаниот данок на личен доход за 4,86 милијарди денари.

Годишната инфлација во Романија забави на 10,42% во јуни, во однос на 10,85% во мај, покажуваат најновите податоци на романскиот Национален институт за статистика (INS).

Најсилен раст и натаму бележат цените на услугите, кои на годишно ниво се зголемиле за 13,67%, додека цените на непрехранбените производи пораснале за 12,29%, а храната поскапела за 5,75%.

На месечно ниво, индексот на потрошувачките цени во јуни пораснал за 0,06% во споредба со мај. Притоа, цените на храната се намалиле за 0,44%, додека услугите и непрехранбените производи забележале раст од 0,49%, односно 0,19%.

Аналитичарите на „Erste Group“ оценуваат дека мај најверојатно го означил врвот на инфлацијата за 2026 година и очекуваат поизразено забавување во наредните месеци, поттикнато од поволни базни ефекти. Нивната прогноза е дека инфлацијата до крајот на годината ќе се намали на 5,9%, доколку не дојде до нови надворешни шокови, особено поврзани со глобалните цени на енергенсите.

Во меѓувреме, Централната банка на Романија ја задржа референтната каматна стапка на 6,5%, без промена, продолжувајќи внимателно да ги следи инфлациските движења и економските ризици.

Во текот на минатата недела, преку пет нетрговски трансакции била променета сопственоста на вкупно 1.050 акции, покажуваат податоците на Централниот депозитар за хартии од вредност.

Нетрговските трансфери се вршат врз различни законски основи, меѓу кои подарување и наследување хартии од вредност.

Најголем удел во вкупниот број пренесени акции има „Алкалоид“ АД Скопје, со 573 акции, односно повеќе од половина од сите евидентирани трансфери. Акцијата на компанијата е меѓу најликвидните на Македонската берза, а нејзината просечна цена изнесува 22.399,20 денари.

На второто место е „Гранит“ АД Скопје, со 272 пренесени обични акции. Просечната берзанска цена на акцијата на градежната компанија изнесува 1.456 денари.

Во евиденцијата се запишани и 114 обични акции на ФЗЦ „11 Октомври“ АД Куманово. Во последните 52 недели со оваа акција биле склучени само шест берзански трансакции, додека просечната цена изнесува 399 денари.

Без берзанско тргување биле пренесени и 90 обични акции на „Димко Митрев“ АД Велес. Со акциите на оваа компанија во изминатите 12 месеци не била реализирана ниту една берзанска трансакција.

Меѓу нетрговските трансфери е евидентирана и една обична акција на ТТК Банка. Нејзината последна просечна берзанска цена, формирана при тргувањето на 8 јули, изнесувала 1.257,65 денари.