Комерцијална банка објави нов пакет поволности за компаниите кои користат Visa Business картички, овозможувајќи им пристап до дигитални алатки и услуги по пониски цени.

Преку програмата, деловните корисници ќе можат да добијат попуст од 8 отсто за услугите на Google Cloud, кои вклучуваат алатки за пресметување, складирање податоци, машинско учење и аналитика.

Дополнително, достапен е и попуст од 8 отсто за Google Workspace, пакет што ги опфаќа Gmail, Docs, Drive, Calendar и Meet, со цел да се подобри ефикасноста на деловната комуникација и соработка.

За корисниците на Microsoft 365 е обезбеден попуст од 5 отсто, што покрај Word, Excel и PowerPoint ги вклучува и услугите Teams, OneDrive и SharePoint.

Во рамки на понудата се предвидени и поволности за користење на Amazon Web Services (AWS), насочени кон оптимизирање на трошоците и забрзување на деловните иновации.

Од Комерцијална банка велат дека современиот бизнис бара брзи и паметни решенија, а новите поволности преку Visa Business картичките се наменети за зголемување на продуктивноста и поефикасно управување со деловните процеси.

Граѓаните сè почесто ги користат мобилните телефони за извршување на електронски плаќања, покажуваат најновите податоци на Народната банка на Република Северна Македонија.

Според објавените статистики, во текот на 2025 година дури 71,7 отсто од електронските кредитни трансфери биле иницирани преку мобилни уреди. Во исто време, учеството на компјутерите како средство за електронско банкарство се намалило на 27,8 отсто.

Од Народната банка посочуваат дека овие податоци укажуваат на континуиран раст на довербата на корисниците во дигиталните финансиски услуги и мобилното банкарство.

Трендот е дел од пошироката дигитална трансформација на финансискиот сектор, при што мобилните уреди сè повеќе го преземаат приматот како најкористен канал за брзо и едноставно извршување на плаќањата.

Растот на мобилните плаќања е показател и за зголемената прифатеност на современите финтек-решенија, кои овозможуваат полесен пристап до банкарските услуги во секојдневниот живот.

Народната банка го објави Конкурсот за доделување на Годишната награда за млади истражувачи за најдобар труд од областа на макроекономијата и банкарството за 2027 година. Наградата се доделува со цел да се поттикне развојот на научната мисла и изработката на истражувачки трудови од областа на макроекономијата, банките и банкарските системи, како и да се афирмираат млади и стручни кадри.

Право на учество на Конкурсот имаат државјаните на Република Северна Македонија на возраст до 35 години. Вработените во Народната банка и членовите на Советот на Народната банка немаат право на учество.

Трудот со кој се конкурира треба задолжително да содржи и осврт кон македонската економија на соодветната тема. Трудот не смее да надминува 80.000 карактери со празни места (без фусноти, прилози, графикони, табели, апстракт, библиографија и анекси) и препорачливо е да има стандардна структура на научно истражување.

Авторите можат да конкурираат и со труд којшто веќе бил објавен, но не пред 1 јануари 2025 година. При поднесувањето на веќе објавен труд, потребно е да се наведе кога и каде е објавен.

Трудовите се доставуваат по електронски пат, во форматот „Word“, на електронската адреса: [email protected], со назнака: „За Годишната награда на Народната банка на Република Северна Македонија“. Покрај трудот, авторот треба да достави и биографски податоци. Доставените трудови ќе имаат третман на материјали со доверлив карактер.

Еден автор може да поднесе само еден труд. Трудовите може да бидат напишани на македонски, албански или англиски јазик.

Трудовите ќе се оценуваат според повеќе критериуми, меѓу кои се релевантноста на истражуваното подрачје за македонскиот контекст, квалитетот на освртот на литературата, јасноста на дефинирањето на проблемот и целите на истражувањето, соодветноста на анализата и применетите методи, како и квалитетот на заклучоците и препораките.

Крајниот рок за доставување на трудовите е 1 февруари 2027 година.

Наградата е во парична форма. За првонаградениот труд се доделува награда во износ од 130.000 денари, а за второнаградениот труд наградата изнесува 65.000 денари.

Конкурсот е објавен на веб-страницата на Народната банка.