Заменик-претседателот на Владата и министер за транспорт Александар Николоски оствари работни средби во американскиот Стејт департмент, посветени на унапредување на стратешкото партнерство меѓу Македонија и САД, со фокус на политичката и економската соработка.

Како што информира Министерството за транспорт, на средбата со заменик-помошникот државен секретар за Европа, Даниел Лоутон, било потврдено силното партнерство меѓу двете држави, засновано на меѓусебна поддршка, демократски вредности и заедничка определба за продлабочување на економските и трговските врски.

По средбите во Стејт департментот, Николоски изјави дека Соединетите Американски Држави претставуваат клучен стратешки партнер на Македонија и дека разговорите биле насочени кон натамошно зајакнување на соработката во повеќе области, вклучително и во рамките на НАТО.

Тој посочи дека на состаноците било разговарано и за економската соработка, особено за прашања поврзани со енергетската транзиција и развојот на важни инфраструктурни проекти.

„Се осврнавме на значењето на паневропските коридори 8 и 10 кои минуваат низ Македонија и имаат суштинско значење за економскиот развој и безбедноста на државата. Разговаравме и за продлабочување на соработката во наредниот период, како и за повторно активирање на Стратешкиот дијалог меѓу двете земји“, изјави Николоски.

Според него, на средбите бил разгледан и трговскиот договор меѓу двете држави, кој треба да придонесе за зголемување на деловната соработка и трговската размена.

Вицепремиерот Николоски престојот во Вашингтон го продолжува со учество на глобалниот настан „Transforming Transportation 2026“.

Агенцијата „Thrivity“, во име на свој клиент, реномирана компанија провајдер на финансиски услуги, објави оглас за вработување на позицијата референт за ликвидност со работна локација во Скопје.

Од компанијата информираат дека позицијата е наменета за финансиски професионалци со аналитички пристап кои сакаат да работат во динамична финансиска средина и да бидат дел од процесите што ја обезбедуваат стабилноста и ликвидноста на организацијата.

Работните задачи вклучуваат следење и управување со дневната ликвидносна позиција, анализа на паричните текови и ликвидносните показатели, како и тргување со финансиски инструменти на домашниот и меѓународниот пазар. Исто така, избраниот кандидат ќе учествува во подготовка на анализи и извештаи за менаџментот и ALCO, како и во соработка со банки, инвеститори и корпоративни партнери.

Компанијата нуди работна средина со високи етички стандарди, флексибилно работно време со можност за работа од различни локации, поддршка за професионален развој и континуирана едукација, како и можност за вклучување во дигиталната трансформација на финансиските процеси.

За позицијата се бара високо образование од областа на економија, финансии или банкарство, најмалку две до три години релевантно искуство во treasury, ликвидност или финансиски пазари, ACI Dealing лиценца, одлични аналитички способности и напредно познавање на Excel, како и добро познавање на англиски јазик.

Заинтересираните кандидати можат да аплицираат преку следниот линк.

Авиокомпаниите ширум светот предупредуваат дека цените на авионските билети ќе се зголемат поради наглиот раст на цените на горивото, предизвикан од ескалацијата на конфликтот на Блискиот Исток.

Австралиската авиокомпанија „Qantas Airways“ и „Air New Zealand“ во вторникот соопштија дека ги зголемуваат цените на билетите, нагласувајќи дека глобалната авиоиндустрија се соочува со сериозен и ненадеен пораст на трошоците за гориво.

Цената на авионското гориво, која пред почетокот на конфликтот изнесувала околу 85 до 90 долари по барел, во последните денови нагло пораснала и достигнала меѓу 150 и 200 долари по барел, соопшти националниот авиопревозник на Нов Зеланд. Поради неизвесноста околу развојот на конфликтот, компанијата ја суспендирала и својата финансиска прогноза за 2026 година, пренесува „Reuters“.

Американско-израелската војна против Иран предизвика силен раст на цените на нафтата, нарушување на глобалниот воздушен сообраќај и рекордно зголемување на цените на авионските билети на одредени линии. Ова, според извештаите, предизвикува страв од значително намалување на побарувачката за патувања и можност за масовно приземјување на авиони, јавува „Фена“.

Дополнително, хаосот во воздушниот простор на Блискиот Исток создава нови проблеми за авиокомпаниите. Според службата за следење летови „Flightradar24“, авиони што во вторникот наутро пристигнувале во Дубаи накратко кружеле во воздух поради можен ракетен напад, објавено е на мрежата „X“. Летовите подоцна сепак успешно слетале.

Од „Qantas“ соопштија дека, покрај зголемувањето на цените на меѓународните летови, разгледуваат и можност за пренасочување на дел од капацитетите кон Европа, додека авиокомпаниите и патниците се обидуваат да ги избегнат нарушувањата на Блискиот Исток, каде нападите со дронови и ракети значително го ограничуваат воздушниот сообраќај.