Во согласност со својата општествено одговорна платформа „Повеќе од финансии – поддршка за заедницата“, Flex Credit продолжува да инвестира во проекти кои создаваат трајна вредност за локалната заедница.

По повод големиот јубилеј „100 години Скопје ЗОО“, Зоолошката градина во Скопје доби ново катче – комплетно изградена и опремена куќичка за желки (Centrochelys sulcata). Проектот е реализиран на директно барање на Зоолошката градина, а финансиран и самостојно изграден од страна на финансиското друштво Flex Credit, како дел од нивната долгорочна стратегија за општествена одговорност.

Оваа нова инфраструктура, е дизајнирана да ги подобри условите за живот на животните, но и да стане составен дел од редовната едукативна и забавна програма на Скопје ЗОО. Со ова, посетителите – особено најмладите, ќе добијат можност одблиску да се запознаат со желките во средина која ги исполнува сите современи стандарди.

За менаџментот на Flex Credit, овој проект е потврда дека вистинската грижа за заедницата се мери преку видливи и одржливи дела.

„Овој значаен јубилеј на Зоолошката градина нè потсетува колку е важно да ги негуваме и поддржуваме местата што имаат непроценлива вредност за сите генерации скопјани. Токму затоа, со огромно задоволство одговоривме на барањето на ЗОО Скопје. Нашата цел со оваа инвестиција е директно да придонесеме во подобрување на условите, да го поддржиме развојот на институцијата и да создадеме поубаво и поедукативно искуство за сите посетители – особено за децата. Затоа што за Flex Credit, општествената одговорност никогаш не била само зборови, туку конкретна акција на терен“, изјави Тина Трпковска, Маркетинг директор на Flex Credit.

Новата куќичка за желки од денеска е официјално отворена за сите посетители, збогатувајќи ја содржината на Скопје ЗОО во годината на нејзиниот голем јубилеј.

Вештачката интелигенција веќе ја менува брзината со која функционира е-трговијата. Токму затоа, 9. Регионална конференција за е-трговија оваа година ќе се оддржи под темата “From Wait to Go: E-comm @ AI Speed!”, на 3 ноември 2026 година во Националната опера и балет во Скопје, во организација на Асоцијацијата за е-трговија.

Темата ја отсликува една од најголемите трансформации што индустријата ја има доживеано досега, односно преминот од бавни, мануелни процеси и неизвесност, кон паметни системи поддржани од вештачка интелигенција кои носат побрзи одлуки, подобра персонализација, автоматизација и поголема ефикасност. Концептот “From Wait to Go” симболично ја претставува промената што веќе се случува. Светлото е веќе зелено, а индустријата влегува во нова ера – ера на интелигентна е-трговија, автоматизација и раст со брзина на вештачка интелигенција.

Интересот за овогодинешното издание е рекорден уште од самиот старт. Првите 100 билети по Ultra Early Bird цена беа распродадени во рекордно времее, а организаторите очекуваат ова да биде најголемото и најпосетено издание досега.

Во текот на изминатите години, конференцијата прерасна во еден од најрелевантните регионални настани за е-трговија, кој обединува повеќе од 900 учесници од над 10 земји, вклучувајќи е-трговци, маркетинг експерти, payment провајдери, платформи, fintech компании, банки и логистички компании.

Досега, на сцената на конференцијата говореле бројни говорници и експерти од компании како OpenAI, TikTok, Booking, Zalando, Alibaba, Meta, Google, Viber, Dolce & Gabbana, како и некои од најпознатите регионални лидери и професионалци од е-трговијата.

Покрај главната сцена, и оваа година ќе биде организирана паралелна сцена со практични и hands-on работилници на најразлични теми кои ќе придонесат за раст на бизнисите. Работилниците ќе бидат фокусирани на конкретни алатки, стратегии, AI решенија, маркетинг, продажба, аналитика и оптимизација на online продажба, со цел учесниците да добијат применливо знаење и практични вештини што ќе можат веднаш да ги имплементираат во своето работење.

И оваа година, конференцијата ќе ги обедини сите клучни чинители од e-commerce екосистемот – е-трговци, банки, финтек компании, поштенски и логистички оператори, телекомуникациски компании, ИТ компании, маркетинг експерти, инвеститори и друго. Преку актуелни теми, практични искуства и светски трендови, учесниците ќе добијат нови знаења, инспирација и можност за квалитетен нетворкинг што отвора нови соработки и бизнис можности.

Повеќе информации за конференцијата се достапни на следниот линк: https://ecommerceconference.mk/.

Управата за јавни приходи ја започна третата фаза од проектот е-Фактура, со која на компаниите им се овозможува тестирање на системот преку нова веб-апликација наменета за електронска размена на фактури.

Од УЈП информираат дека во оваа фаза деловните субјекти ќе можат да креираат, испраќаат, прифаќаат, одбиваат и сторнираат електронски фактури во тест-околина, без оглед на нивната големина или степенот на техничка подготвеност.

Проектот досега помина низ две развојни етапи. Во првата беше тестирана интеграцијата на ERP-системите на компаниите со платформата е-Фактура, додека во втората беа воведени дополнителни API-сервиси за преземање и обработка на електронски фактури, како и можност за тестирање на повеќе даночни индикатори.

Новата веб-апликација поддржува тестирање на општа фактура со 12 даночни индикатори и има за цел да им овозможи на компаниите полесна подготовка за идната примена на системот.

За потребите на структурираното тестирање, УЈП воспоставила соработка со околу 200 компании кои ќе учествуваат како избрани тестирачи. Тие, во координација со даночни агенти од институцијата, ќе тестираат различни сценарија и ќе доставуваат повратни информации за функционирањето на платформата.

Паралелно со техничките активности, Управата продолжува и со едукативни активности за бизнис-заедницата. Досега се организирани околу 30 информативни средби преку стопанските комори и деловните здруженија, а во наредниот период се најавени нови презентации низ повеќе региони во државата.

Од УЈП најавуваат и дополнителни материјали за поддршка, вклучувајќи вебинар и детално упатство за користење на системот. Институцијата ги повика сите компании активно да ја користат тест-платформата и да доставуваат предлози, забелешки и информации за евентуални технички проблеми, со цел понатамошно унапредување на системот е-Фактура.

Особен акцент е ставен и на компаниите кои сè уште немаат назначено даночен агент, при што од УЈП ги охрабруваат да се вклучат во тестирањето и навремено да пријавуваат евентуални потешкотии при користењето на платформата.