НЛБ Групацијата ја објави својата намера дополнително да ја зголеми цената во својата доброволна јавна понуда за преземање на Адико Банка АГ на 37 евра по акција, со цел стекнување контролен пакет во австриската банка.

Со новата понуда, НЛБ нуди цена која е за 10,50 евра по акција повисока цена во однос на конкурентската понуда. Од банката истакнуваат дека ова претставува значителна премија за акционерите на Адико Банка.

Според пресметките на НЛБ, новата цена е за 41,4 проценти повисока од просечната цена на акцијата во последните шест месеци, која изнесувала 26,17 евра заклучно со 15 јуни 2026 година. Исто така, понудата е за 39,6 проценти повисока од берзанската цена на затворање на акцијата на истиот датум, како и од цената понудена од конкурентот Рајфајзен Банка Интернационал (RBI).

Главниот извршен директор на НЛБ, Блаж Бродњак, изјави дека банката останува посветена да обезбеди фер и еднаков третман на сите акционери и дека подобрената понуда има за цел да создаде дополнителна вредност за сопствениците на акции.

„Фер, независен и еднаков третман на сите акционери не е само наш водечки принцип, туку и наша цел – заедно со континуираното создавање вредност за акционерите. Нашата подобрена понуда го одразува токму тоа. Со ова понатамошно зголемување, цената на понудата за акции ќе претставува премија од 39,6%, што е 10,50 евра по акција во однос на конкурентската цена на понудата. Сметаме дека ова е единствена, атрактивна и профитабилна можност за акционерите на Адико Банка да ги монетизираат своите акции, поради што ги охрабруваме самостојно да ги проценат предностите на понудата на НЛБ“, изјави извршниот директор на НЛБ, Блаж Бродњак.

Банката потсетува дека акционерите кои веќе ја прифатиле конкурентската понуда ќе имаат можност да ја повлечат својата согласност и да се приклучат на понудата на НЛБ, согласно правилата утврдени од Австриската комисија за преземање.

Од НЛБ посочуваат дека, врз основа на повеќегодишната комуникација со надлежните институции, очекуваат навремено да ги добијат сите потребни регулаторни одобренија, вклучително и од Европската централна банка, доколку понудата биде успешна.

Со оваа понуда, НЛБ дополнително ја заострува битката за преземање на Адико Банка, една од најинтересните банкарски трансакции во регионот во последните години.

Извршниот одбор на Народната банка донесе одлука стапката на противцикличниот заштитен слој на капиталот за изложеностите на банките во земјава да остане на истото ниво од 2%. Одлуката е донесена врз основа на редовната квартална оцена на системските ризици, според податоците заклучно со првиот квартал од 2026 година. Оваа стапка ќе важи од третото тримесечје на 2027 година и се оценува дека таа е соодветна на тековните макрофинансиски услови и на состојбите во банкарскиот систем.

На кредитниот пазар и натаму има солидна кредитна активност, но банкарскиот систем е добро капитализиран и ликвиден, со задржана стабилност и отпорност на шокови. Тоа е видливо и преку ниската стапка на нефункционални кредити, којашто и натаму опаѓа, и преку солидната профитабилност.

Одлуката за задржување на истата стапка на противцикличниот заштитен слој на капиталот е поддржана и од построгите макропрудентни мерки за квалитетот на кредитната побарувачка. Тие се во примена од крајот на претходната година, а во првото тримесечје од 2026 година се забележуваат првичните влијанија преку подобрата структура на новите кредити од аспект на кредитните стандарди применети од страна на банките. Ваквата поставеност на макропрудентните мерки би придонесла за ограничување на системските ризици во следниот период и за натамошно задржување на стабилноста и отпорноста на банкарскиот сектор. Народната банка ќе продолжи со внимателно следење на системските ризици и редовно, на квартална основа, ќе ја преоценува висината на стапката.

Повеќе од 130 вработени во НЛБ Банка, вклучувајќи ги и членовите на Управниот одбор, учествуваа во еколошка акција за чистење на Водно, со цел придонес кон зачувување на животната средина и подобрување на јавните простори.

Акцијата се одржа под мотото „За почисто Водно“, а волонтерите собираа отпад од зелените површини и рекреативните патеки на планината, која претставува едно од најпосетуваните природни подрачја во Скопје.

Од Банката информираат дека преку различни еколошки иницијативи досега биле реализирани повеќе од 400 волонтерски часови. Според нив, ваквите активности се дел од заложбите за заштита на природата, подигнување на еколошката свест и унапредување на квалитетот на живот во заедницата.

Посебен акцент на настанот било учеството на деца, со што дополнително се промовира важноста од развивање одговорен однос кон животната средина уште од најрана возраст.

Од НЛБ Банка посочуваат дека ќе продолжат да поддржуваат и организираат проекти кои придонесуваат за одржлив развој, зачувување на природните ресурси и јакнење на еколошката култура.

Меѓу активностите реализирани во изминатиот период се и акцијата „За почиста Виница“, во која се вклучиле вработените од експозитурите во источниот регион, како и донацијата на садници од лаванда за Холандскиот парк во Охрид.

Еколошките и општествено одговорни проекти се дел од стратегијата на НЛБ Групацијата и се реализираат во сите земји каде што таа работи.