Акционерите на Стопанска банка а.д. Битола кои имаат намера своите акции да ги продадат на Комерцијална банка АД Скопје, можат да го сторат тоа со потпишување на писмена изјава во просториите на Комерцијална банка односно во централата и во нејзините експозитури ширум земјата, секој работен ден од 08 до 16 часот. Крајниот рок за потпишување на изјавата е до 22.09.2024 година.

“Во врска со понудата за преземање на сите акции од Стопанска банка а.д. Битола од страна на Комерцијална банка АД Скопје, Банката упатува на точка 5.2.1 од проспектот, каде помеѓу останатите детални податоци на процедурата за прифаќање на понудата согласно член 38 од Законот за преземање на акционерските друштва уредено e дека имателите на акции од Стопанска банка АД Битола може да ја потпишат писмената изјава за прифаќање на понудата во просториите на Комерцијална банка, со седиште на ул. Васил Иљоски бр. 3, како и во нејзините филијали низ Републиката.”, се вели во информацијата што Комерцијална банка АД Скопје ја објави на својата веб страна.

Писмената изјава може да се потпише во периодот од 26.08.2024 година до 22.09.2024 година, секој работен ден од 08:00 до 16:00 часот.

Комерцијална банка АД Скопје ги откупува акциите по единечна цена од 3.200 денари за акција за кои е издвоен вкупен износ од 20,3 милиони евра уплатени на сметка во Централниот регистар за хартии од вредност.